Akif Nağı: “Bu imkanı Ukrayanaya verirlər ki, “Patriot”un komponentlərinə alsın və daxildə də onun istehsalını təşkil edə bilsin”
Avropa Komissiyasının prezidenti fon der Leyen bildirib ki, Aİ ölkələri Ukrayna üçün 90 milyard avroluq kreditdən istifadə edərək “Patriot” sistemləri üçün sursat almağa icazə verən istisna barədə razılığa gəliblər.
Avropa Birliyi Ukraynaya əvvəllər verilmiş 90 milyard avroluq kreditin bir hissəsini Amerikanın “Patriot” hava hücumundan müdafiə sistemləri üçün tutucu raketlərin alınması üçün istifadə etməyə icazə verib. Avropa Komissiyasının prezidenti Ursula fon der Leyen 8 sentyabrda Aİ ölkələri tərəfindən əldə edilən razılaşmanı açıqlayıb.
Onun sözlərinə görə, bu, Kiyevə "Patriot" sistemləri üçün vacib komponentlərin alınması üçün verilən istisnadır. Fon der Leyen əlavə edib ki, bu qərar Ukraynaya növbəti 3,2 milyard avroluq kredit tranşından "öz hava məkanının Rusiya hücumlarından müdafiəsini gücləndirmək" üçün istifadə etməyə imkan verəcək.
Elə həmin gün Almaniyanın müdafiə naziri Boris Pistorius Almaniyanın Bundesverin ehtiyatından Ukraynaya əlavə “Patriot” raketləri göndərəcəyini açıqladı. O, Ukraynanı dəstəkləyən ölkələrin müdafiə nazirlərinin video konfransında bildirib ki, bunlar Patriot PAC-2 hava hücumundan müdafiə sistemi üçün tutucu raketlərdir.
Pistorius həmçinin Almaniyanın Ukraynaya hava-hava raketlərinin tədarükünü artıracağını və dronlar və uzaqmənzilli sursatların tədarükünü davam etdirəcəyini bildirib.
Bu arada, Birləşmiş Krallıq Ukraynaya əlavə 100 milyon funt sterlinq (təxminən 117 milyon avroya bərabər) hava hücumundan müdafiə yardım paketi elan etdi. London hökuməti bildirib ki, paket Ukraynanın qarşıdan gələn qışda Rusiya hücumlarından müdafiə qabiliyyətini gücləndirmək üçün nəzərdə tutulub və digər məsələlərlə yanaşı, Amerika “Patriot” hava hücumundan müdafiə sistemləri üçün raketləri də əhatə edəcək.
Rusiyanın hücumlarının güclənməsi fonunda Ukraynanın təcili olaraq əlavə tutucu raket təchizatına ehtiyacı var. Əvvəllər verilən 90 milyard avroluq Aİ kreditinin şərtləri bu vəsaitin əsasən Avropa istehsalı olan silahların alınması üçün istifadə edilməsini nəzərdə tutur.
Euronews əvvəllər Fransanın Kiyevin 90 milyard avroluq kreditdən istifadəsinə Aİ-nin daha çox nəzarət etməsini tələb etdiyini bildirmişdi. İlkin şərt müdafiə təchizatı üçün ayrılan vəsaitin ən azı 65%-nin Avropa təchizatçılarından silahlara xərclənməsi idi.
Avropa İttifaqının bu addımını şərh edən Azad Vətən Partiyasının sədri Akif Nağı baki-xeber.com-a bildirdi ki, Ukrayna ilə bağlı istisnalar, bu yanaşmalar Ukraynanın vəziyyəti ilə bağlıdır. “Ukrayna Rusiya qarşısından dayanmalıdır, dayana bilməlidir. Buna görə də, ona kənardan əlavə texnika, silahlar, raketlər göndərilir. Amma belə görürük ki, Rusiyanın da imkanları var. Rusiya ilə bu çətin, ağır qarşıdurmada Ukraynaya dəstək verilməlidir. Bu mənada Almaniya və Avropanın digər ölkələri də güzəştlərə gedir. Məsələnin bir tərəfi budur ki, Ukraynanı maksimum dərəcədə Rusiyanın qarşısında silahlandırsınlar. Əsas hədəf bundan ibarətdir. Bir yol ondan ibarətdir ki, sözügedən ölkələr öz arsenalından müəyyən silahları, raketləri Ukraynaya göndərir.
Ən vacib və Rusiya silahları qarşısında dayana bilən silahlardan biri “Patriot” raket kompleksidir ki, bu da Ukrayna üçün hədini artıq vacibdir. Həm Rusiyanın hücumlarından müdafiə olunmaq, həm də uzaq mənzilli hədəflərə, məsafələrə zərbə endirmək üçün vacibdir.
Bir tərəfdən, Ukraynanı həm “Patriot”la təmin edirlər, eyni zamanda onun müəyyən hissələrinin alınmasına da dəstək verirlər. Ukrayna üçün artıq bu vəsait ayrılıb. Məyyən limitlər, vaxt vardı ki, o cür planlı şəkildə istifadə edə bilər. Amma indi istisna hal kimi bu imkanı Ukrayanaya verirlər ki, “Patriot”un komponentlərinə alsın və daxildə də onun istehsalını təşkil edə bilsin”.
A.Nağı qeyd etdi ki, burada da bir neçə məqsəd ortadadır. A.Nağının sözlərinə görə, məqsədlərdən birincisi Ukraynanın mövqeyinin müdafiə qabiliyyətinin gücləndirilməsi və zərbə gücünün artırılmasıdır. “İkincisi də məlum ölkələr Ukrayanaya yardım edirlər, digər tərəfdən də ümumi fonddan Ukrayna artıq özü istifadə edir. Bununla da “Patriot”un istehsalını, ən azından müəyyən hissələrinin yığılmasını Ukrayna özündə təşkil edə bilər. O da həddən artıq vacib məsələdir. Burada digər məsələ ondan ibarətdir ki, müəyyən qədər proses sürətləndirilsin. Gələcəyə də hədəflənmiş bir məsələdir ki, bu gün ola bilər, Rusiya ilə Ukraynanın arasında atəşkəs dəndən bağlı atəşkəs imzalansın, amma müəyyən dövrdən sonra bu münaqişə yenidən alovlana bilər. Hər ehtimala qarşı Ukrayna özünün ehtiyatlarını, öz gücünü daxili istehsal hesabına artırmalıdır.
İndiki şəraitdə ABŞ prezidentinin vasitəçiliyi ilə Rusiya ilə Ukraynan arasında müəyyən razılaşma hiss olunur. Amma nəticə olacaq, olmayacaq hələ heç bilmək olmur. Hiss olunur ki, ilk bir razılaşma oldu, müvəqqəti bir atəşkəs əldə olundu. Həm Rusiya prezidenti Putin buna dəstək verdi, həm də Zelenski razılaşdı. Amma atəşkəs dövrünün özündə buna tam şəkildə riayət olunmurdu.
Ondan sonra isə yenidən raketlərlə, dronlarla bir-birinə qarşı hücumlar davam etdirdilər. Yəni, bunların hamısı göstərir ki, hələ Rusiya ilə Ukrayna arasında ciddi bir sülhün, davamlı atəşkəsin əldə olunması ilə bağlı danışmaq hələ tezli.
Bunu görə də Avropa dövlətləri çalışır ki, həm xaricdən gələn silahlar hesabına, eyni zamanda Ukraynanın daxilindəki istehsal sayəsində onun müdafiə, hücum gücünü artırıb qorusunlar”-deyə A.Nağı əlavə etdi.
İradə SARIYEVA
