Şəmsəddin Əliyev: “ABŞ cinayətkarlıqla mübarizə aparan polisində müşahidəçi statusunda iştirak etməsi Azərbaycan DİN-nin son 25-30 il ərzində cinayətkarlıqla mübarizə sahəsində əldə etdiyi uğurların nəticəsidir”
Amerika Polis Qüvvələri Birliyinin (AMERİPOL) Direktorlar Şurasının 5-ci Fövqəladə Sammiti çərçivəsində Azərbaycan Respublikasının Daxili İşlər Nazirliyinin təşkilatda müşahidəçi statusunda təmsil olunması təmin edilib.
Bu barədə Daxili İşlər Nazirliyinin (DİN) Mətbuat xidməti məlumat yayıb.
Bildirilib ki, müvafiq status Azərbaycan Respublikasının Daxili İşlər Nazirliyinin AMERİPOL-a üzv dövlətlərin aidiyyəti hüquq-mühafizə orqanları ilə əməkdaşlıq əlaqələrinin genişləndirilməsi, beynəlxalq polis əməkdaşlığı çərçivəsində qarşılıqlı məlumat və qabaqcıl təcrübə mübadiləsinin aparılması, eləcə də təşkilatın müvafiq tədbirlərində iştirak imkanlarının artırılması baxımından mühüm əhəmiyyət daşıyır.
Müşahidəçi statusu eyni zamanda transmilli mütəşəkkil cinayətkarlıq, narkotik vasitələrin qanunsuz dövriyyəsi, kibercinayətkarlıq, ekstremizm, insan alveri və digər müasir təhdidlərə qarşı mübarizə sahəsində beynəlxalq əməkdaşlığın daha da inkişaf etdirilməsinə xidmət edir.
“Polisə Dəstək” İctimai Birliyinin sədri Şəmsəddin Əliyev baki-xeber.com-a bildirdi ki, DİN-nin ABŞ Polis Qüvvələr Birliyinin Direktorlar Şurasının 5-ci Fövqəladə Sammitində müşahidəçi statusunda təmsil olunması DİN tarixində mühüm bir hadisədir. “Bu olduqca mühüm hadisədir. ABŞ cinayətkarlıqla mübarizə aparan polisində müşahidəçi statusunda iştirak etməsi Azərbaycan DİN-nin son 25-30 il ərzində cinayətkarlıqla mübarizə sahəsində əldə etdiyi uğurların nəticəsidir. Cinayətkarlıqla mübarizə siyasətinin formalaşdırılmasında prinsipiallıq, peşəkarlıq mövqeyi sərgilədiyinə görə bu statusu qazanıb. Burada həm nizam-nizam intizam, polis əməkdaşlarının səriştəsi, peşəkarlığı, ədalətli mübarizəsi əsas götürülüb”.
Ş.Əliyev qeyd etdi ki, Azərbaycan polisi narkotik vasitələrin qanunsuz dövriyyəsinə, transmilli mütəşəkkil cinayətkarlığın bütün növlərinə qarşı mübarizə ilə bağlı üzərinə götürdüyü bütün beynəlxalq öhtəlikləri qüsursuz yerinə yetirir. “Azərbaycan polisi öz üzərinə götürdüyü öhtəlikləri digər ölkələrə nümunə olacaq şəkildə həyata keçirir. Bu səbəbdən də DİN-in bu statusda təmsil olunması qürurvericidir. Hesab edirəm ki, Azərbaycan DİN bundan sonra da bu sahədə örnək olacaq şəkildə öz fəaliyyət istiqamətlərini həyata keçirəcək. Azərbaycan DİN təkcə ölkədə cinayətkarlıqla mübarizə siyasətini formalaşdırdığına görə deyil, eyni zamanda BMT-nin narkotik vasitələrin qanunsuz dövriyyəsi, cinayətkarlığa qarşı mübarizə sahəsindəki siyasətin formalaşdırılmasında da öz töhfəsini verir. Bu istiqamətdə olan konvensiyaların, normaların yerinə yetirilməsi, insan hüquq və azadlıqlarının qorunması, onların təhlükəsizliyinin təmin edilməsi məsələsində də Azərbaycan polisi nümunədir.
Müxtəlif səpkilərdə beynəlxalq tədbirlərə Bakının ev sahibliyi etməsi də çox ciddi hadisədir. Bakı indiyə qədər ən müxtəlif istiqamətlərdə olan beynəlxalq tədbirlərə uğurla ev sahibliyi edib. Bu sıradan bir hadisə deyil. Əgər ölkəmizdəki səfirliklərin, diplomatik korpusların, onların kontingentlərinin təhlükəsizliyi təmin olunmasaydı, onların hüquqları qorunmasaydı, bütövlükdə ölkədə sabitlik, əmin-amanlıq hökm sürməsəydi bu beynəlxalq tədbirlərin Bakıda keçirilməsi mümkün olmazdı. Təbii ki, bunun ekskolasiyası genişlənib, birada iştirak edən dövlətlər, rəsmilər, nümayəndələr bu tədbirlərdən sonra məmnunluqlarını ifadə edirlər. ABŞ-da Azərbaycan polisinin bu məsələdə iştirakını, zəhmətini təqdir edir, onu mükafatlandırır”-deyə Ş.Əliyev bildirdi.
İradə SARIYEVA
