Hüseyn İbrahimov: “Putin bu kimi məsələlərdən maksimum yararlanaraq vaxtı uzadır”
ABŞ Konqresinin Nümayəndələr Palatası gözləntilərin əksinə olaraq, Rusiyaya və onun əsas ticarət tərəfdaşlarına qarşı yeni sanksiyaları nəzərdə tutan qanun layihəsinə baxmağa başlamayıb. Yay tətilindən sonra Respublikaçılar Partiyasının rəhbərliyi təşəbbüsü səsverməyə çıxarılması prioritet olan qanun layihələri siyahısına daxil etməyib.
“Bloomberg”in yaydığı məlumata görə, layihə Konqresə noyabrın 3-də keçiriləcək aralıq seçkilərədək səsverməyə çıxarılmaya bilər. Eyni tədbir Moskvanın enerji sanksiyalarından yayınmasına ən çox kömək edən beş ölkəyə də şamil olunur. Bütün bunlardan sonra Rusiya prezidenti Vladimir Putin Ukrayna məsələsində mövqeyini yumuşaldarmı?
Sözügedən məsələni baki-xeber.com-a şərh edən sosioloq Hüseyn İbrahimovun fikrincə, belə güzəştli mövqe Rusiyanın xeyrinə işləyir: “Çünki Putin yalnız güc dilindən anlayır. Düzdür, bu, o demək deyil ki, Respublikaçılar Partiyası bundan sonra mövqeyini dəyişməyəcək. Hələ seçkilərə var və bu müddət ərzində Rusiyanın necə mövqe tutması sanksiyalar məsələsinə öz təsirini göstərəcək. Sanksiyaların təxirə salınması təkcə Ukrayna məsələsi ilə bağlı deyil. Bu, Yaxın Şərqdə gedən proseslərlə, İranla qarşıdurmanın nə ilə nəticələnəcəyi və ABŞ-Rusiya münasibətləri ilə bağlı olan məsələdir. Hesab edirəm ki, Tramp administrasiyası bütün bunların necə inkişaf edəcəyini nəzərə aldığı üçün kəskin addımların atılmasından ehtiyat edir. ABŞ Rusiyanın əsas tərəfdaşlarına qarşı sanksiyalardan ona görə yayınır ki, neftin qiymətinin daha kəskin artacağından ehtiyat edir. Onsuz neçə vaxtdır neftin qiyməti yüksəkdir və 100 dollar ətrafındadır. Ancaq o da məlumdur ki, Putin bu kimi məsələlərdən maksimum yararlanaraq vaxtı uzadır. Hər vasitə ilə atəşkəsin əldə edilməsindən yayınmağa çalışır. Problem ondadır ki, Putin müharibəni dayandırmaq istəmir. Bu günlərdə Bişkekdə keçirilən Şanxay Əməkdaşlıq Təşkilatının toplantısında Hindistanın dövlət başçısı Putinə müharibəni dayandırmağı tövsiyə etdi. Ancaq Putin diplomatik qaydada ümumi fikirlər işlədərək bu çağırışdan yayındı. Ukrayna işğala məruz qalsa da, ciddi müqavimət göstərir. Bir sözlə, bir sıra məsələlərə görə ABŞ-ın yumuşaq mövqe sərgiləməsi Putinin şərtləri daha da sərtləşdirməsinə gətirib çıxara bilər. Ona görə də Moskvaya təzyiqlər artırılmalıdır. İmkan vermək olmaz ki, vaxtın uzadılması Putinin xeyrinə işləsin”.
Vidadi ORDAHALLI
