Bakıda Azərbaycan və ABŞ nümayəndələri TRIPP marşrutunun həyata keçirilməsi, onun boyunca infrastrukturun qurulması və marşruta nəzarət edəcək idarəetmə şirkətinin yaradılmasını müzakirə ediblər. Görüşdə Azərbaycan-Ermənistan sülh prosesinin irəlilədilməsi, davamlı sülhün və regional təhlükəsizliyin təmin olunması məsələləri də nəzərdən keçirilib. Tərəflər həmçinin Vaşinqtonda imzalanmış üçtərəfli bəyannamənin nəticələrini və Azərbaycan-ABŞ strateji tərəfdaşlığının perspektivlərini müzakirə ediblər.
TRIPP layihəsi üzrə idarəetmə şirkətinin yaradılması və marşrut boyunca infrastrukturun qurulması ilə bağlı müzakirələr hansı mərhələdədir və bu prosesin praktiki olaraq başlaması üçün hansı addımların atılması gözlənilir?
ABŞ və Azərbaycan arasında TRIPP marşrutunun reallaşdırılması ilə bağlı müzakirələrin intensivləşməsi layihənin artıq siyasi bəyanatlar mərhələsindən çıxaraq praktiki icra prosesinə yaxınlaşdığını göstərir. Marşrut üzrə idarəetmə şirkətinin yaradılması və zəruri infrastrukturun formalaşdırılması istiqamətində atılan addımlar layihənin institusional əsaslarının qurulması baxımından mühüm mərhələ hesab olunur.
Arzuxan Əlizadə: "TRIPP-in uğurla reallaşması sülhün iqtisadi əsaslarını daha da gücləndirə bilər"
Məsələ ilə bağlı “Bakı-Xəbər” qəzetinə açıqlama verən AMİP lideri, deputat Arzuxan Əlizadə bildirib ki, TRIPP marşrutu ilə bağlı idarəetmə şirkətinin yaradılması və marşrut boyunca zəruri infrastrukturun formalaşdırılması layihənin siyasi müzakirələrdən praktiki icra mərhələsinə keçidi baxımından mühüm əhəmiyyət daşıyır.
Onun sözlərinə görə, Azərbaycan və ABŞ nümayəndələri arasında bu istiqamətdə aparılan müzakirələr tərəflərin layihənin reallaşdırılması üçün artıq institusional və texniki məsələləri konkretləşdirməyə başladığını göstərir. İdarəetmə şirkətinin formalaşdırılması isə marşrutun koordinasiyalı, təhlükəsiz və səmərəli fəaliyyətinin təmin edilməsi baxımından əsas mexanizmlərdən biri olacaq.
Arzuxan Əlizadə qeyd edib ki, bundan sonrakı mərhələdə bir sıra mühüm məsələlərin dəqiqləşdirilməsi gözlənilir. Buraya marşrutun texniki parametrlərinin müəyyənləşdirilməsi, infrastrukturun qurulması üzrə yol xəritəsinin hazırlanması, maliyyələşmə və investisiya mexanizmlərinin formalaşdırılması, həmçinin idarəetmə şirkətinin hüquqi statusunun və fəaliyyət prinsiplərinin razılaşdırılması daxildir.
Deputatın fikrincə, TRIPP-in reallaşdırılması Azərbaycan-Ermənistan sülh gündəliyi ilə paralel şəkildə irəliləməlidir. Çünki bu layihə yalnız nəqliyyat və logistika təşəbbüsü kimi qiymətləndirilməməlidir. Marşrutun fəaliyyətə başlaması Cənubi Qafqaz ölkələri arasında iqtisadi əlaqələrin genişlənməsinə, yeni ticarət imkanlarının yaranmasına və regionda uzunmüddətli sabitliyin möhkəmlənməsinə ciddi töhfə verə bilər.
"Azərbaycan üçün əsas məqsəd bu marşrutun real iqtisadi və nəqliyyat imkanlarına çevrilməsini təmin etməkdir. Ona görə də bundan sonrakı mərhələdə siyasi razılaşmaların konkret texniki və hüquqi qərarlarla tamamlanması, tikinti və infrastruktur işlərinin başlanması, eləcə də marşrutun idarə olunması mexanizminin tam formalaşdırılması vacibdir", – deyə Arzuxan Əlizadə vurğulayıb.
O əlavə edib ki, Azərbaycan-ABŞ strateji tərəfdaşlığının inkişafı TRIPP-in həyata keçirilməsi prosesinə əlavə imkanlar yarada bilər. Xüsusilə maliyyələşmə, texnologiya, logistika və təhlükəsizlik sahələrində əməkdaşlığın genişləndirilməsi layihənin effektivliyini artıra bilər.
Deputatın sözlərinə görə, TRIPP-in uğurla reallaşması Azərbaycanın regional tranzit və logistika imkanlarını genişləndirməklə yanaşı, Cənubi Qafqazın yeni ticarət xəritəsinin formalaşmasına da təsir göstərə bilər.
"TRIPP yalnız yeni nəqliyyat bağlantısının yaradılması deyil, eyni zamanda regionda iqtisadi qarşılıqlı asılılığın gücləndirilməsi baxımından strateji layihədir. İqtisadi əlaqələr genişləndikcə sülhün qorunması üçün əlavə maraqlar və təminatlar yaranır. Bu baxımdan TRIPP-in uğurla reallaşması regionu yeni logistika və ticarət xəritəsinə daxil etməklə yanaşı, sülhün iqtisadi əsaslarını daha da gücləndirə bilər", – deyə Arzuxan Əlizadə bildirib.
Akif NƏSİRLİ
