Samir Hümbətov: “...O deməkdir ki, Rusiya Avropaya hücum edib qısa müddətdə hansısa bir ərazini işğal edə bilər”
Rusiyanın xarici işlər naziri Sergey Lavrov hər kəsi Rusiya Prezidenti Vladimir Putinin Avropanın Rusiyaya mümkün hücumunun nəticələri ilə bağlı sözlərini xatırlamağa çağırıb. “Rusiya Prezidenti Vladimir Putin dedi və o da bunu bir neçə dəfə təkrarladı: 'Bizim heç kimə hücum etmək niyyətimiz yoxdur'. Bu, axmaqlıqdır, axmaqlıqdır. Bu, heç bir dövlətçiliyin tamamilə olmamasını təmsil edir. Amma bu söhbətlər sizin hücumunuza hazırlıq demək olarsa, sizi əmin edirəm ki, müharibə tamamilə fərqli və çox qısa olacaq. Mən sizə bu sözləri xatırlamağı məsləhət görərdim", - deyə Lavrov Birinci Kanalda yayımlanan "Böyük Oyun" verilişində bildirib.
Rusiya xarici işlər naziri Rusiyanın Avropaya hücum etmək niyyətində olmadığını vurğuladı.
Lavrov həmçinin bildirib ki, Moskva Qərbin Arktikanı hərbiləşdirmək siyasətindən narahatdır.
Onun sözlərinə görə, ABŞ, Norveç və digər ölkələr bu yaxınlarda regionda hərbi təlimlər keçiriblər və nazirin sözlərinə görə, bu təlimlərin ssenarisi Rusiya ilə silahlı münaqişəni nəzərdə tuturdu.
Qısa müharibə nə deməkdi?
Beynəlxalq Münasibətlər və Diplomatiya Araşdırmaları Mərkəzinin rəhbəri, politoloq Samir Hümbətov baki-xeber.com-a bildirdi ki, Rusiya konkret olaraq Avropanı hədələyir. “Açıq şəkildə görünür ki, Rusiya Avropaya Ukrayna üzərindən meydan oxumağa çalışır. Düzdür, Ukrayna müharibəsində Rusiyanın hələ ki ciddi birb uğuru yoxdur. Deyə bilərik ki, ərazisinin 20 faizini işğal edib. Amma ölkə, ordu, güc nisbətinə baxsaq Rusiya Ukraynanı ən azı 5-7 dəfə qabaqlayıb, ancaq bununla belə faktiki olaraq Rusiya Ukrayna cəbhəsində ciddi uğur əldə edə bilməyib. Rusiya da bu uğursuzluğu nədə görür? Fikirləşir ki, Ukrayanaya yardım edən Avropa ölkələridir. Bütövlükdə götürdükdə Avropa İttifaqı və Böyük Britaniyanın birlikdə Ukraynaya verdiyi dəstəyin nəticəsində Ukrayna hələ ki ayaqdadır. Burada söhbət maliyyə vəsaitindən, silahdan və hərbi texnikadan gedir. Ona görə də fikrimcə, Lavrov səthi olaraq Avropaya meydan oxumağa çalışır və bu açıqlaması ilə Avropaya demək istəyir ki, əgər siz dolayısı Ukraynaya yardımı davam etdirəcəksinizsə bizim üçün artıq legitim hədəf olacaqsınız. Bunu da bu vaxta qədər deyiblər. Ancaq “qısa müddətli müharibə olacaq” anlayışı o deməkdir ki, Rusiya Avropaya hücum edib qısa müddətdə hansısa bir ərazini işğal edə bilər”.
S.Hümbətov hesab edir ki, burada NATO faktorunu kənara qoymaq olmaz. O, qeyd etdi ki, yəni Rusiya Ukrayna ilə müharibəyə getdiyi kimi Avropa ilə də getsə o halda artıq Avropa qitəsinin böyük bir hissəsi NATO üzvü olduğu üçün bu artıq birbaşa NATO ilə müharibədir. “NATO-nun 5-ci maddəsi işə düşə, nəticə etibarı ilə Rusiya ilə NATO arasında müharibəyə çevrilə bilər. Bu da təbii ki, sonu görsənməyən bir vəziyyət yarada bilər”-deyə S.Hümbətov vurğuladı.
İradə SARIYEVA
