Azərbaycanda həkimlərin kommersiya məqsədli dərmanları reseptə yazması qadağan olunacaq. Bu barədə səhiyyə nazirinin müavini Rasim İsmayılov Milli Məclisin Səhiyyə komitəsinin sonuncu iclasında məlumat verib.
Onun sözlərinə görə, bu gün mövcud qanunvericiliyə əsasən antibiotik reseptlə verilsə də, lakin bu tələbə riayət edilmir: "Hesab edirəm ki, elektron reseptlə bir çox nöqsanlar aradan qalxacaq. Qeydiyyatsız heç bir dərman vasitəsinə resept yazılmayacaq. Hətta həkim istəsə belə, kommersiya məqsədli dərmanları reseptə yaza bilməyəcək".
Maraqlıdır, yeni qayda bu sahədə nə kimi dəyişikliklərə səbəb olacaq?
“Yeni qərar elektron reseptlərin həm dövlət, həm də ictimaiyyətin dərmanların dövriyyəsinə nəzarətini asanlaşdıracaq”
Professor, həkim ekspert Adil Qeybulla “Bakı-Xəbər”ə açıqlamasında qeyd etdi ki, yeni qərar elektron reseptlərin həm dövlət, həm də ictimaiyyətin dərmanların dövriyyəsinə nəzarətini asanlaşdıracaq. Reseptlərin yazılma qaydalarının standart forması olmalıdır: “Əgər səhiyyə bütövlükdə ölkə üzrə bir sistemə keçərsə və bütün qeydlər vahid bir elektron sistemdə öz əksini taparsa, əlbəttə bu, daha məqsədəuyğun olacaq. Çünki bu halda dərmanların dövriyyəsi ilə bağlı qayda-qanunlara necə əməl olunduğuna həm ictimaiyyət, həm də dövlətin nəzarəti asanlaşacaq”.
Ekspert onu da əlavə etdi ki, dünyanın hər yerində resept yazılır və onu həkimdən tələb etmək xəstənin hüququdur. Dərman maddələrinin keyfiyyət parametrlərinin həlli üçün mütləq həmin preparatı istehsal edən şirkətlə Azərbaycanda onun idxalına məsuliyyət daşıyan şirkət arasında bir müqavilə olmalıdır. Belə olduqda gələcəkdə dərmanın keyfiyyət parametrləri və başqa məsələlərlə bağlı hansısa bir sual yaransa, müqaviləyə istinad edilə bilər. Buna görə də birinci növbədə xaricdən idxal edilən dərmanların keyfiyyət parametrlərinə nəzarət üçün hüquqi mexanizmlər yaradılmalıdır: “Onu da deyim ki, dərman maddələrinin yazılmasında müəyyən məqsədlər var. Məsələn, xəstəyə ambulator şəraitdə bir neçə antibiotik yazılır ki, bu da yolverilməzdir. Yəni bunların hamısı nəzarətə götürüləcək. Bu məsələ mərkəzi qeydiyyata düşsə, problem yavaş-yavaş öz həllini tapacaq. Dərman firmalarının fəaliyyətinə, ayrı-ayrı həkimlər və yaxud şirkətlərlə, apteklərlə əlaqəsinə nəzarət olunacaq. Hesab edirəm ki, bu məsələnin tənzimlənməsi prosesi beynəlxalq qaydalara riayət olunaraq həll edilməlidir ki, mümkün qədər bu işlər öz həllini tapsın. Birinci növbədə reseptlərin yazılması mərkəzləşdirilməlidir ki, qeydiyyata düşsün. Xəstəyə yazılan müalicə vasitələri qeydiyyata düşərsə, artıq bu problem həll olunmuş olacaq, çünki bu, ictimai, müvafiq strukturların nəzarətində olacaq və artıq buna meyllər də azalacaq”.
Günel CƏLİLOVA
