Elə bir insan yoxdur ki, marketlərdən yolu düşməsin. Günlük, həftəlik və aylıq ehtiyaclarımızı yaşadığımız yerə yaxın olan bazar və marketlərdən təmin edirik.
İndi böyük marketlər o qədər inkişaf edib ki, demək olar, bazara getməyə ehtiyac qalmır. Marketlərdə kibritdən tutmuş meyvə-tərəvəzə qədər hər şey satılır. Belə xidmətin olması insanlar üçün çox yaxşıdır. Bir çoxlarının fikrincə, marketlərin çoxunda məhsullar təzə olur, bu da çox yaxşı haldır. Lakin yaxşı olmayan məsələ haqq-hesab məsələsidir. Yəni vitrindəki qiymətlə kassadakı qiymət üst-üstə düşmür. Alıcılar, həmçinin, endirim kampaniyalarının arxasında da bəzi hiylələr olduğunu, vaxtı keçən və ya keyfiyyətsiz məhsulların qiymətinin aşağı salındığından şikayətlənirlər.
Maraqlıdır, iri marketlərdə xidmətin səviyyəsinin aşağı olması nə ilə əlaqədardır?
Natiq Əliyev: “Marketlərdə istehlakçı hüquqları kobud şəkildə pozulur”
Marketoloq Natiq Əliyev “Bakı-Xəbər”ə açıqlamasında qeyd etdi ki, Bakının istər mərkəzi, istərsə də kənar küçələrində topdan və ya pərakəndə satış mağazalarının əksəriyyəti böyük endirimlər təklif edir. İlin hər mövsümündə, bayramlarda və xüsusi günlərdə bu endirimlərin həcmi daha da artır: “Bu, istehlakçıların kobud şəkildə aldadılmasıdır. Piştaxtadakı qiymət kassadakı qiymətlə eyni olmalıdır. Marketlər əksər hallarda kartla ödənişdə müştəridən alınmayan malın pulu çıxır. Qabıqlı qozu alan müştəriyə kassada ləpənin qiymətini vurublar. Yaxud da kassada bir qiymət, piştaxtada başqa qiymət olur. İstehlakçının hüququ var ki, piştaxtada qeyd edilən məbləği ödəsin. İstehlakçı hüquqları kobud şəkildə pozulur. Bu halda vətəndaşlar İqtisadiyyat Nazirliyi yanında Antiinhisar Dövlət Xidmətinə şikayət etməlidirlər".
Eyyub Hüseynov: “Müasir marketlər istahlakçıların hüquqlarının ən çox pozulduğu yerdir”
Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında qeyd etdi ki, müasir marketlər istahlakçıların hüquqlarının ən çox pozulduğu yerdir: “Qapıdan girən kimi istehlakçıya potensial oğru kimi baxırlar. Əşyalarını alıb harasa yerləşdirirlər. Orda da bir şey itsə, heç kəs cavabdehlik daşımır. Bütün bunların səbəbi odur ki, marketlər üçün Nazirlər Kabinetinin heç bir qayda-qanunu yoxdur. İstehlakçı problem yaşıyıb dövlət orqanına müraciət edəndə isə deyirlər ki, onların öz ərazisidir, özləri bilər. Vətəndaşlar il ərzində marketlərdə almadıqları mal üçün ümumilikdə 500 milyon manat ödəyirlər. Təchizatçı malı marketə yerləşdirmək üçün bəri başdan külli miqdarda pul verir. Ərzaq malları sektorundan danışsaq, marketlər malın üzərinə təxminən 25 faiz qoyur. Satışdan sonra isə təchizatçılardan 20 faiz geri alır. Bu zaman təxminən 50 faiz qiymət artımı baş verir. Bu da süni qiymət artımına gətirib çıxarır. Təchizatçılar bundan xəbərdar olsa da, səslərini çıxarmağa qorxurlar. Çünki onları ümumiyyətlə şəbəkədən çıxarda bilərlər. Belə bir vəziyyətdə, əlbəttə, marketlərdə istehlakçıların hüquqlarının pozulması halları daim olacaq”.
Günel CƏLİLOVA
