Azərbaycanın qədim tarixə malik olması, Xəzər dənizi sahilində yerləşməsi, tarixi abidələrlə zənginliyi, dünyanın 11 iqlim qurşağından 9-nun burada mövcudluğu və insanların qonaqpərvərliyi ölkəmizdə turizmin inkişafı üçün geniş imkanlar yaradır. Bu sahədə daha ciddi nailiyyətlər əldə edilməsi, ölkəmizə gələcək turistlərin yerləşdirilməsi, onların rahatlığının, gəliş-gedişinin təmin olunması məqsədilə paytaxt Bakıda və ətraf rayonlarda çoxsaylı otel inşa edilib.
Azərbaycanda turizmin inkişaf etdirilməsi üçün çoxlu sayda iş görülür və görülməkdədir. İnfrastruktur günü-gündən dəyişir, müasir tələblərə cavab verən istirahət mərkəzləri tikilib. Turistlərin rahatlığı üçün Bakı və regionlarda rəngarəng 4-5 ulduzlu otellər mövcuddur. Təbii ki, həmin otellərin qiyməti hər turistin büdcəsinə görə deyil. Bu səbəbdən də 2-3 ulduzlu otellərin tikilib istirahətsevənlərin ixtiyarına verilməsi dəfələrlə müzakirə olunub. Ancaq buna baxmayaraq, hələ də ölkəmizdə 2-3 ulduzlu otellərin sayı yox səviyyəsindədir. Bu isə ölkəyə gələn turistlərin sayına təsir edir.
“Hazırda Azərbaycan otellərinin ulduz təsnifatında müəyyən problemlər yaşanır”
Turizm eksperti Elçin Rüstəmov qeyd etdi ki, turistlərin evlərə üz tutmasının əsas səbəbi 2-3 ulduzlu olmamasıdır: “Kiçik hostellərin və mehmanxanaların olmaması turistləri bu addımı atmağa məcbur edir. Bu isə təhlükəsizlik baxımından əlverişli deyil. Onları cəlb etmək üçün hostellərin qiymətini ucuz etmək lazımdır. Bu, həm turistlər, həm də hostellər üçün sərfəli olur. Çünki onların səhər yeməyi, xüsusi xidmət, otaqların yığışdırılması hostel tərəfindən qarşılanacaq. Mehmanxana işçiləri gələn turistlərə gəzməli yerləri göstərir, ölkə haqqında geniş məlumat verir, onların nəqliyyat problemləri aradan qaldırılır. Evdə qalmaq həm də turistlərdə xüsusi bir sıxıntı yaradır. Amma qiymətlərin ucuz olmasına görə turist buna məcbur olur. Əgər hostellər ucuz olarsa, qonaq ucuz mehmanxanada qalmağa üstünlük verəcək. Avropa ölkələrində bu tipli ucuz mehmanxanaların sayı xeylidir. Həmin mehmanxanalarda xidmətlər adətən bəsit olur. Oradakı ləvazimat və avadanlıq ucuz olduğuna görə turistlərə xeyli sərfəli olur. Bir növ maya dəyərindən xeyli ucuz başa gəlir. Həmçinin beynəlxalq təcrübədə qidalanma və digər mühüm məsələlər mehmanxananın büdcəsinə uyğun olur. Burada xidmətlər də məhduddur. Çünki elə insanlar var ki, adətən bir gecə üçün yatıb getmək istəyirlər. Onlara beşulduzlu hotellərdəki xidmət lazım deyil. Bu, onlara sərf etmir. Azərbaycanda da bu sahənin inkişaf etdirilməsi xeyli vacib məsələdir”.
Ekspert onu da əlavə etdi ki, hazırda Azərbaycan otellərinin ulduz təsnifatında müəyyən problemlər yaşanır: “Məlumdur ki, xarici ölkələrdə oteldə ulduzların xidmət səviyyəsini müəyyən edən xüsusi yoxlama komissiyaları var. Həmin yoxlama komissiyaları mütəmadi olaraq otellərin ulduzlarını xidmət səviyyəsinə görə araşdırır. Otelin xidmət səviyyəsi standarta uyğun deyilsə, dərhal ulduz sayı azalır. Ökəmizdə isə oteldə ulduzların təsnifatlaşdırılmasında müəyyən problemlər mövcuddur. Bəzi otellərdə xidmət səviyyəsinin standarta uyğun olmadığını tək yerli turistlər deyil, ölkəmizə gələn əcnəbilər də təsdiq edirlər. Təbii ki, bu hal ölkənin turizm sektoruna da təsir edir. Adətən turistlər qaldığı otelə əsasən ölkənin imicini formalaşdırırlar. Bu səbəbdən də hesab edirəm ki, otellərə ulduz Avropa standartı əsasında verilməlidir. Göstərilən xidmət müasir standartlara cavab verməlidir. Otellərdə müştəriyə göstərilən xidmətə görə ulduz verilməlidir. 4-5 ulduzlu oteldə müəyyən müddət keçdikdən sonra xidmətin keyfiyyəti aşağı düşərsə, o zaman bu, ulduz sayına təsir etməlidir. Otellərə ulduzun Avropa standartı əsasında verilməsi turizmin inkişafına da səbəb olacaq”.
Günel CƏLİLOVA
