Martın 2-də vəfat edən Məşədi Dadaş məscidinin imamı, ilahiyyatçı Hacı Şahin Həsənli dəfn edilən gündən onun qəbrini ziyarət edənlərin ardı-arası kəsilmir. Gecə saatlarında qəbiristanlıqda xeyli ziyarətçi olur, mərsiyələr oxunur. Dinşünasların fikrincə, bir möminin məzarının gecə saatlarında ziyarət edilməsi, orada mərsiyə oxunması islamda bəyənilməyən əməl sayılır.
Hacı Şahin Həsənli dəfn ediləndən sonra hələ də tərəfdarlarının, onu dəyərləndirən insanların məzarı üstünə toplanması müəyyən müzakirələr doğurub. Bunu düzgün hesab edənlər də, düzgün hesab etməyənlər də var. Camaat arasında bəzi belə mülahizələr də var ki, insanların onun qəbrinin ətrafına toplanması, ümumiyyətlə bu toplanmalar guya onun qəbri üçün hansısa təhlükələr olduğu üçündür və bunun bu “təhlükənin” qarşısını almaq məqsədinə xidmət etdiyini göstərirlər. Belə bir fikirlər var ki, görünür, Hacı Şahinin qəbri üçün hansısa bir təhlükə var, ona görə də tərəfdarları onun məzarı ətrafında, yaxınlığında olmağa üstünlük verirlər. Onun məzarı üçün hər hansı bir təhlükə ola bilərmi?
Qeyd edək ki, təhlükə ilə bağlı ciddi əsaslar olarsa, heç dövlət camaatın bu istiqamətdə belə fəallıq göstərməsini gözləmədən özü bunu önləməyə çalışar, mühafizə təyin edər və s. Yəni dövlətin bu sarıdan bir narahatlığı yoxdursa, demək məzar üçün təhlükə məsələsi o qədər də real görsənmir.
“Əgər təhlükə olsa belə, onu qorumaq dövlətin təhlükəsizlik orqanlarının vəzifəsidir, beş-on mərsiyəçinin yox”
Milli Cəbhə Partiyasının (MCP) sədr müavini, ilahiyyatçı Tural İrfan “Bakı-Xəbər”ə bildirdi ki, mərhum ilahiyyatçının məzarı ilə bağlı hər hansı bir təhlükənin olduğunu iddia etmək absurd yanaşmadır. “Qeyd etdiyiniz şəxsin və ya istənilən müsəlmanın qəbrini İslam dininə görə müəyyən edilmiş qaydada ziyarət etmək gərəkdir.
Dinimizə görə, gecə qəbir ziyarət etmək icazəlidir. Hətta gecə dəfn mərasimi də olar. Peyğəmbər salavatullahın özü də, Həzrət Fatimə salam olmuş da gecə dəfn edilib. Lakin qəbirlərin gecə ziyarət edilməsinin ənənə şəklini alması doğru deyil. Çünki gecə baş tutan ziyarət göründüyü kimi digər insanların narahatlığına, müzakirə və mübahisələrə səbəb olur.
Qəbir üstündə mərsiyə, mahnı, nohə, ağı demək, ağlaşma mərasimi qurmaq isə Peyğəmbərin hədislərinə görə ölünün ruhunu incitməkdir. Eyni zamanda axirət inancına ziddir. İslam dininə görə, mömin insan öləndən sonra Cənnətə gedir. Cənnətə gedən adam üçün də təəssüflənmək, niyə öldü deyə hay-küy salmaq əqidəyə ziddir.
Mərhumun məzarı üstündə onun bağışlanması üçün dua edilməli, Quran ayələri oxunub ibrət olsun deyə ziyarətçilərə şərh olunmalıdır ki, həyatdan, ölümdən ibrət alsınlar. Yoxsa qəbir üstünü ağlaşma, mərsiyyəxanlıq yerinə çevirmək olmaz.
Mərhumun qəbrinə hansısa təhlükənin olmasına gəlincə, bunun tamamilə uydurma olduğunu hesab edirəm. Əvvəla ona nə təhlükə ola bilər? İkincisi də, Azərbaycan Respublikasının hüquq-mühafizə orqanlarının sahəsinə aid olan işi kimin ixtiyarı var ki, özü həyata keçirsin? Əgər təhlükə olsa da belə, onu qorumaq vəzifəsi dövlətin təhlükəsizlik orqanlarının vəzifəsidir, beş-on mərsiyəçinin yox.
Həmin qəbrin üstündə aksiya təşkil edənlər (mən bu toplanışları aksiya hesab edirəm-T.İ) əsasən məzhəbçiliyi qabardan, əsasən İranyönlü etiqada mənsub olanlardır. Yoxsa tarixən ölkəmizdə mövcud olan yerli şiəlikdə belə şeylər yoxdur və olmayıb.
İranda adıçəkilən mərhuma dövlət rəsmilərinin də qatıldığı yas mərasimlərinin təşkil olunması onun İran üçün böyük əhəmiyyət kəsb etdiyinin sübutudur”.
T.İrfanın sözlərinə görə, ölünü, qəbiri müqəddəsləşdirmək İslam dininə yaddır. “Əksinə, İslam dini hətta qəbrin itməsini lazım bilir. Qəbri, ölünü ilahiləşdirib müqəddəsləşdirmək, pirə çevirmək ancaq siyasi məqsədlər üçün İran rejiminin ənənələrindəndir. Onlar hətta ölmüş adamlardan da siyasi məqsəd üçün sui istifadə edirlər.
Bu saat İranın ölkəmizdə öz tərəfdaşlarının, eyni əqidə mənsublarının toplaşması üçün əlverişli məkana ehtiyacı var. Məlumdur ki, bir çox məkanlar var ki, orada onların əlaltıları toplaşırdılar, son zamanlar bunun qarşısı alındı. Bir ara da Şəhidlər Xiyabanını, şəhid qəbirlərini məkan seçmək istədilər. Şəhidlərin ziyarəti zamanı siyasi şüarlar səsləndirib, mərsiyə adı altında təxribatlara cəhd etdilər. Bunun da qarşısı alındı. İndi isə məlum mərhumun məzarını pirə çevirib orada toplaşmaq istəyirlər. Hətta dünən gördüm ki, o qəbir artıq müqəddəs yerlərin ziyarəti siyahısına salınıb, şirkətlər zəvvar toplayırlar.
Dini siyasiləşdirmək, məzhəblərə bölmək olmaz. Kənardan çox pis görünür.
Bu kimi halların fəsad verməməsi üçün gərək ölkədəki din böyükləri insanları düz yola yönəltsinlər” - deyə T.İrfan vurğuladı.
Əli TURABOV
