Sosial şəbəkələrdə ölkənin ali təhsil ocaqlarındakı vəziyyətin acınacaqlı olması ilə bağlı konkret faktlara əsaslanan məlumat yayılıb. Həmin məlumatda qeyd edilir ki, bir çox ali məktəblərin rəhbərliyində eyni ailənin təmsilçiləri olan bir neçə şəxs təmsil olunur. Məlum olub ki, əksər universitetlərdə vəzifəli şəxslərin qohumları prorektor (direktor müavini) vəzifəsində çalışır. Buna dair bəzi nümunələr də göstərilir.
Azərbaycan Həmkarlar İttifaqları Konfederasiyasının sədri, deputat Səttar Möhbalıyevin qardaşı Fəhrad Möhbalıyev Əmək və Sosial Münasibətlər Akademiyasının Tədris və elmi işlər üzrə prorektorudur. İddiaya görə, akademiyanın rektoru Hüseyn Qaraşov olsa da, sözügedən təhsil mərkəzini qeyri-rəsmi olaraq Fəhrad Möhbalıyev idarə edir.
Sabiq deputat Əhməd Vəliyev Odlar Yurdu Universitetinin rektorudur. Onun oğlu professor Samir Vəliyev Odlar Yurdu Universitetinin Müşahidə Şurasının sədridir.
Bakı Avrasiya Universitetinin rektoru Nazim Hüseynlinin qızı Nigar Hüseynova universitetin tədris işləri üzrə prorektorudur.
Ağarəhim Rəhimov Bakı Qızlar Universitetinin rektoru vəzifəsindən istefa verdikdən sonra yerinə qızı Sevinc Rəhimova təyin olunub.
Universitet rektorlarının əksəriyyəti öz qohum-əqrabalarını, dostlarını rəhbərlik etdikləri təhsil müəssisələrində vəzifələrə təyin ediblər. Hətta universitetlərin əksəriyyətinin yeməkxanaları belə onların yaxınları tərəfindən idarə edilir.
Ali təhsil ocaqlarında yaradılan klanlaşmanın təhsilimizin gələcəyinə nə kimi mənfi təsiri var?
Filologiya elmləri doktoru, professor İdris Abbasov “Bakı-Xəbər”ə açıqlamasında bildirdi ki, biz bu cür məlumatlarla mediada tez-tez rastlaşırıq: “Bir elm adamı olaraq, özümüz də belə halların mövcudluöunu müşahidə edirik. Bu halın ali təhsil ocaqlarında olması daha da acınacaqlıdır. Çünki gələcək üçün kadr yetişdirən bu müəssisələr tələbələrə pis nümunə göstərmiş olurlar. Müəyyən məqam sahibləri bir neçə yaxın qohumunu eyni təhsil müəssisəsinə rektor, prorektor vəzifəsinə təyin edir. Bütün vəzifələri nəsil şəcərisinə uyğun şəkildə tutmaq xəstəlikdi. Buna başqa ad vermək olmaz. Bir çox hallarda isə bunu bir dəb kimi qəbul edirlər. Məsələyə “ filankəsə olar, mənə yox?” prinsipi ilə yanaşırlar. Olduqca zərərli təmayüldür. Ədalətsizlik, bərabərsizlik, qarşılıqlı kin və küdurət yaradır. Həm də dövləti zəiflədir, ona olan inamı azaldır. Başıpozuqluğa aparan yoldur. Bu işin heç bir müsbət tərəfi yoxdur. Bu iş milli həmrəyliyə zərbə vurur, mənəvi-əxlaqi tənəzzülün təzahürüdür. Bunu edənlər dövləti səmimi sevməyən adamlardı. Çox təəssüflər olsun ki, bəziləri bunu cəsarətlə edir. Sanki “belə də olmalıdır” kimi davranırlar. Bəziləri bu addımı ilə güya iqtidar komandasına aşırı dərəcədə yaxın olduğunu nümayiş etdirir. Əslində qanunvericilik də dövlət idarələrinin rəhbərliyində iki yaxın qohumun təmsilçiliyinə icazə vermir. Ancaq hansısa formada bunu edirlər. Əksər hallarda belə vəziyyət özəl ali təhsil müəsissələrində nəzərə çarpır. Soruşanda deyirlər ki, “özəl yerimizdir, necə istəyirik, elə də idarə edirik. Ancaq təhsil üçün bu keçərli olmamalıdır. Təhsilə bazar təfəkkürü ilə baxmaq olmaz. Belə tayfa təfəkküründə olan təhsil müəssisəsinin hazırladığı kadr hansı dünyagörüşdə olacaq? Çox təəssüf edirəm ki, Elm və Təhsil Nazirliyi belə hallarla bağlı lazımi ölçü götürmür. Nədir, bu işə də ölkə başçısı qarışmalıdır ki, düzəlsin? Bu məsələni siz jurnalistlər də daim gündəmdə saxlamalısınız ki, bəlkə gözlərini var-dövlət örtən həmin adamlar heç olmasa içtimai qınaq qarşısında geri çəkilsinlər. Bu halın qarşısı təcili alınmalıdır!”
Məhəmmədəli QƏRİBLİ
