Əhalinin ən çox şikayət etdiyi bələdiyyələrdən biri Abşeron rayonunun Masazır bələdiyyəsidir. Yaradıcı qrupumuzun araşdırmaları zamanı məlum oldu ki, Masazır kənd sakinləri ərazidə bələdiyyənin heç bir abadlıq, yaşıllaşdırma və yol təmiri, əhalinin su ilə təminatı kimi sosial layihələr üzrə iş aparmadığından narazılıq edirlər.
Son aylarda isə ictimai narazılıq yaradan problemlərin sırasına başqa biri də əlavə olunub. Məsələ burasındadır ki, kəndin içindən keçən Bakı-Novxanı yolundan əlavə, son vaxtlar içərilərdə, fərdi yaşayış evlərinin arasında da çoxmərtəbəli yaşayış binalarının tikintisi intensiv xarakter alıb. Sakinlər bildirir ki, müvafiq araşdırmalar aparıblar və məlum olub ki, rayon İcra Hakimiyyəti və FHN-in yalnız üçmərtəbəli, 10-12 metr hündürlükdə evlərin tikintisinə rəsmi icazə verdiyi həyətyanı sahələrdə 7-8 mərtəbəli çoxmənzilli yaşayış binaları tikilməkdədir. Sakinlər bələdiyyənin bir qurum olaraq bu problemlərə heç bir diqqət ayırmadığını, qanunsuz və təhlükəli tikintilərlə bağlı öz səlahiyyətləri çərçivəsində heç nə etmədiyini deyirlər. Sakinlər bələdiyyə üzvlərinin qanunsuz tikinti aparanlarla qeyri-şəffaf işbirliyində olub-olmadığından şübhə edirlər.
"Bakı-Xəbər" redaksiyası olaraq, sözügedən problemləri əhatə edən araşdırma aparmaq niyyəti ilə fevralın 11-də şənbə günü müvafiq rəsmi məktubla bələdiyyə idarəsinə baş çəkdik.
Çox maraqlı bir mənzərə ilə üzləşdik. Əhaliyə vergi borcları ilə bağlı qəbzlər verən hüquq şöbə əməkdaşları, ümumi şöbə deyilən şöbənin xanım müdiri işdə, hətta bələdiyyənin gənc sədri Quliyev Azər İlham oğlu, eləcə də bəzi bələdiyyə üzvlərinin iş yerində olmalarına baxmayaraq, redaksiyamızın adından rəsmi sorğu məktubunu bizdən qəbul edən bir kəs tapılmadı. Ümumi şöbə müdiri xanım əməkdaş bildirdi ki, sədr desə qəbul edə bilər, sədr Azər müəllim isə çox qəribə cavab verdi: "Bu gün qeyri-iş günü olduğu üçün məktubu qəbul etməyimiz qanunsuzluq olar, gedin, həftənin birinci günü gələrsiniz".
Onu da qeyd edək ki, redaksiyamız adından Masazır bələdiyyəsinə rəsmi poçtla da məktub göndərmişik.
“Bakı-Xəbər” qəzeti olaraq əlbəəl Masazır bələdiyyəsinə məktub təqdim etmişik, amma nə bələdiyyə sədri, nə bələdiyyənin şöbə müdiri, nə də hüquqşünası redaksiyamızın rəsmi məktubunu qəbul edib, onlar bu məktubu qəbul etməkdən imtina ediblər. Bu da bələdiyyənin mətbuata bürokratik əngəl yaratmasının əyani nümunəsidir.
Keçən sayımızda Masazır bələdiyyəsinin bu davranışını geniş müzakirəyə çıxaracağımızı qeyd etmişdik.
Bu məktubun bələdiyyə sədri başda olmaqla bu qurumda çalışan şəxslər tərəfindən qəbul edilməməsi, onların mətbuatla əməkdaşlıqdan imtina etməsi, yayınması nə dərəcədə düzgündür? Onlar bununla nə demək istəyirlər?
Akif Nəsirli: “...Tam olaraq korrupsiyanın, rüşvətxorluğun içində boğulub batırlar”
Sabiq bələdiyyə sədri (Beyləqan) Akif Nəsirli hesab edir ki, görünür, bələdiyyə sözügedən məktubda ona ünvanlanacaq suallar barədə məlumatlı olduğu üçün bu addımı atıb. “Bu suallara qanun çərçivəsində cavab vermək imkanları olmadığı üçün çıxış yolunu məktubdan imtina etməkdə görüblər. Amma bu da çıxış yolu deyil. Siz həmin məktubu xəbərnamə ilə poçt vasitəsilə göndərə bilərsiniz. O zaman bələdiyyə bu məktubu qəbul etmək məcburiyyətində qalacaq”.
Hazırda Azərbaycanda bələdiyyələrin fəaliyyətinin elə də razılıqla qarşılanmadığını deyən A.Nəsirli qeyd etdi ki, elə bələdiyyə var maliyyə imkanları çox aşağı səviyyədədir: “Maliyyə imkanları olan bələdiyyələr isə tam olaraq korrupsiyanın, rüşvətxorluğun içində boğulub-batırlar. Yalnız korrupsiyaya bulaşmış bələdiyyələr mətbuatla bu cür davrana bilər. Yəqin sizin məktubunuz da bələdiyyənin fəaliyyəti ilə bağlıdır. O suallara cavab versələr, gərək bütün fəaliyyətlərini açıb ortaya qoysunlar. Ona görə də bəzi bələdiyyələr belə məktubları qəbul etməməkdə, etsələr də cavab verməməkdə son zamanlar ad çıxarıblar. Maliyyə imkanları olan bələdiyyələr tam korrupsiya ilə məşğuldur. İmkanı olmayanlar isə ümumiyyətlə fəaliyyət göstərmir”.
Şəmsəddin Əliyev: “Bu məktubun qəbul edilməməsi tamamilə qanunaziddir”
Azərbaycan Mətbuat Şurasının sabiq icra katibi, hüquqşünas Şəmsəddin Əliyev də bizimlə söhbətində bildirdi ki, vətəndaşın, redaksiyanın bələdiyyə və digər qurumlara əlbəəl məktub təqdim etməsi tamamilə qanunidir, amma onun qəbul edilməməsi qanunaziddir. O qeyd etdi ki, bu, vətəndaşların konstitusion hüquqlarının pozulmasıdır. Hüquqşünasın sözlərinə görə, Milli Məclis “Vətəndaşların müraciətlərinə baxılması haqqında” qanun da qəbul edib. “İstər o qanunda, istərsə də konstitutsiyada vətəndaşların müraciətlərinin qəbul edilməməsi, ona cavab verilməməsi sözügedən qanuna ziddir. Bələdiyyə redaksiyanın təqdim etdiyi rəsmi məktubu qəbul etməli idi. Bu məktubun qəbul edilməməsi tamamilə qanunaziddir. Eyni zamanda da vətəndaşların müraciət etmək hüququnun pozulmasıdır”.
Ş.Əliyev deyir ki, qanunvericilikdə təqdim edilən müraciətlərə neçə gün müddətində baxılması barədə yazılıb.
Ş.Əliyev qeyd edir ki, qanunlara uyğun olaraq həm vətəndaşın əlbəəl gətirdiyi müraciət, həm də poçtla gələn müraciət, məktub qəbul edilməli, qeydiyyata alınmalı və vətəndaşa, redaksiyaya müvafiq cavab verilməlidir.
Əziz Qəmbərov: “...Sizin qanunla müəyyən olunmuş müraciətinizin qəbul edilməməsi...”
Digər hüquqşünas Əziz Qəmbərovun bildirdiyinə görə, Azərbaycan Respublikası İnzibati Xətalar Məcəlləsinin (382 maddə ) tələblərinə əsasən müəyyən edilmiş müddət ərzində jurnalistin sorğusuna cavab verməməyə görə 200 manatdan 300 manata qədər cərimə müəyyən edilib. Ə.Qəmbərov hesab edir ki, mətbuat orqanının, jurnalistin bələdiyyəyə, digər qurumlara rəsmi müraciətinin qəbul edilməməsi də qanunaziddir, bu da o qurumlar üçün məsuliyyət yaradır. “Həm jurnalistlərin sorğularına cavab verilməməsi, həm də onların müraciətlərinin qəbul olunmaması informasiya əldə etməklə bağlı qanuna ziddir. Bütün hallarda jurnalistlərin müraciətləri qəbul edilməli, sorğuları cavablandırılmalıdır”.
“İnformasiya əldə etmək haqqında” Azərbaycan Respublikası qanunun 2-ci maddəsinə əsasən hər kəsin qanunla müəyyən edilmiş şəkildə informasiya almaq hüququ var. Bu baxımdan sizin təqdim etdiyiniz məktubu, müraciəti inzibati orqan, bələdiyyə qəbul etməlidir, sorğunuza cavab verməlidir. Qanunun tələblərindən də açıq-aydın görsənir ki, əgər inzibati orqanların əməkdaşları, yaxud digər vəzifəli şəxslər tərəfindən sizin qanunla müəyyən olunmuş müraciətinizin qəbul edilməməsi, sorğunuza cavab verilməməsi İnzibati Xətalar Məcəlləsinin 382-ci maddəsi ilə məsuliyyət yaradır.
Cinayət Məcəlləsində də jurnalistin qanunu fəaliyyətinə mane olma ilə də bağlı müdəa var.
Siz bələdiyyənin bu münasibəti ilə bağlı bələdiyyələrin işlərinə nəzarət edən qurumlara müraciət edə bilərsiniz. Bələdiyyələrin işinə Ədliyyə Nazirliyində nəzarət edilir, eyni zamanda Prezident Adminsitarsiyasında da müvafiq şöbə olmalıdır. Siz o qurumlara müvafiq şikayətinizi bildirə bilərsiniz...”
Hüquqşünas qeyd etdi ki, əgər redaksiya Masazır bələdiyyəsindən rəsmi şikayət edərsə bununla bağlı İnzibati Xətalar Məcəlləsinin sözügedən maddəsi ilə inzibati icraat başlanıla bilər.
Bələdiyyələrlə İş Mərkəzi: “Bizə rəsmi məktubla müraciət edin, biz bu məsələni araşdıracağıq”
Ədliyyə Nazirliyinin Bələdiyyələrlə iş mərkəzi ilə də əlaqə saxladıq. Mərkəzdən bildirdilər ki, Masazır bələdiyyəsinin bu davranışı araşdırılacaq: “Siz bununla bağlı Bələdiyyələrlə iş mərkəzinə müraciət edin ki, bu məsələ araşdırılsın. Siz bizə yazın ki, bələdiyyə sizin təqdim etdiyiniz məktubu qəbul etməyib və bələdiyyədən şikayətiniz var. Bizə rəsmi məktubla müraciət edin, biz bu məsələni araşdıracağıq”.
Leyla QARAXANLI
