Tanrı sovqatı olan çörək, milliyyətindən və dini mənsubiyyətindən asılı olmayaraq, bütün insanlar üçün müqəddəs nemətdir. Azərbaycanlılar çörəyi hər şeydən üstün tutur, onu duz ilə birlikdə süfrəyə birinci gətirir və süfrədən də axırda aparırlar.
Çörəyə hörmət hər bir azərbaycanlının qanında və canındadır. Bəlkə də elə həmin səbəbdən çörəyə and içir, kiminsə səhlənkarlığı ucbatından yerə düşmüş çörək parçasını qaldırıb öpür və gözün üstünə qoyuruq. Bu, çörəyin müqəddəsliyinə böyük inamdan irəli gəlir. Çörək xalqın və bütövlükdə ölkənin sərvəti olmaqla yanaşı, həm də qüdrətidir. Hər yerdə çörəyə, onun müqəddəsliyinə xüsusi hörmət var.
Onu da qeyd edək ki, qidalanmada çörəkdən çox istifadə edən ölkələr arasında Azərbaycan ön sırada dayanır. Hesablamalara görə, bir azərbaycanlı gün ərzində təxminən 300-350 qram çörək yeyir. Ölkəmizdə bir çox çeşiddə çörək hazırlanır. Ancaq Azərbaycanda qida təhlükəsizliyi ciddi problemlərdən biri kimi qalmaqdadır. Dükan və bazarlarda satılan un məmulatlarının, o cümlədən, çörəyin keyfiyyəti normativlərə uyğun deyil. Xüsusilə çörəyin tərkibindəki qatışıqların tələb olunan təlimata cavab verməməsi insan həyatı üçün təhlükə yaradır. Belə çörəklərlə qidalanma orqanizmdə müxtəlif xəstəliklərin yaranmasına, hətta xərçəngə gətirib çıxara bilər. Son günlər çörəyə insan və heyvan tüklərindən hazırlanan maddənin qatıldığı barədə sosial platformada müxtəlif məlumatlar yayılır. Həmin xəbərlərdə bildirilir ki, çörəyin tez xarab olmasının qarşısını almaq üçün istehsal prosesində tərkibinə donuz və insan tükündən alınan maddə qatılır.
"Abşeron Un" Dəyirmanı: “Ölkəmizdə istehsal olunan unlara sistein qatılmır”
"Abşeron Un" Dəyirmanından bildirildi ki, ölkəmizdə istehsal olunan unlara sistein qatılmır. Bu iddialar kökündən yalnışdır.
Elxan Əliyev: “Son zamanlar çörək və bulka məhsullarının istehsalında donuz və insan tükündən alınan maddədən istifadə edildiyinə dair şübhələr var”
Sosial sahə üzrə ekspert Elxan Əliyev qeyd etdi ki, istər unun rəngini dəyişmək, istər çörəyin tez boyatlaşmasının qarşısını almaq üçün qatqılardan istifadə olunur: “Un dəyirmanlarında unun tez xarab olmasının qarşısının alınması üçün qatqıdan istifadə olunur. Belə qatqılarla bağlı qeyri-şəffaflıq mövcuddur. Məlumata görə, həmin qatqılar tükdən əldə edilir. Həmin maddə Çində istehsal olunubsa, o zaman insan tükündən alınıb. Avropada isə bu maddə qaz və donuz tükündən əldə olunur. Ümumiyyətlə, son zamanlar çörək və bulka məhsullarının istehsalında donuz və insan tükündən alınan maddədən istifadə edildiyinə dair şübhələr var. Çörəyə haram qatılması yolverilməzdir. Belə hallar varsa, araşdırılıb tədbir görülməlidir”.
Həmsöhbətimiz onu da əlavə etdi ki, Çin insan saçından və donuz tükündən hidroliz yolu ilə sistein əldə edən ən böyük istehsalçıdır. Daha sonrakı yerləri Yaponiya və Almaniya tutur.
Günel CƏLİLOVA
