Bu günlərdə Azərbaycanda akkreditə olunmuş diplomatik korpusun nümayəndələri Laçın rayonunda olublar. Nümayəndə heyəti 33 ölkədən 60 diplomat və hərbi attaşedən ibarət olub.
Laçın səfəri çərçivəsində xarici diplomatlar Ermənistanla Azərbaycan arasında sərhəd-buraxılış məntəqəsinin yerləşdiyi körpüyə gəliblər. Onlara Ermənistanın bir hərbçimizin yaralanması ilə nəticələnən son təxribatları haqqında məlumat verilib. Bildirilib ki, silahlı təxribata qədər sərhəd-buraxılış məntəqəsi açıq olub. Xankəndidə yaşayan erməniəsilli sakinlər məntəqədən heç bir maneə olmadan istifadə ediblər. Xarici diplomatlara Beynəlxalq Qırmızı Xaç Komitəsinin (BQXK) vasitəçiliyi ilə tibbi evakuasiya təyinatlı keçidə şərait yaradıldığı barədə məlumat verilib. Qeyd olunub ki, Ermənistan tərəfi sərhəd-buraxılış məntəqəsindəki mövcud vəziyyətdən piar kampaniyaları üçün təbliğat vasitəsi kimi istifadə etməyə çalışır. Elə indinin özündə də ermənilər kampaniyanı davam etdirir. Onlar iddia edir ki, artıq Azərbaycan tərəfi Beynəlxalq Qırmızı Xaç Komitəsinin də Laçındakı sərhəd-buraxılış məntəqəsindən keçidiinə icazə vermir. Məh zbelə bir vaxtda Azərbaycan qarşı tərəfi fakt qarşısında qoyub. Belə ki, ölkəmiz Beynəlxalq Qırmızı Xaç Komitəsinin vasitəsilə Ağdam-Xankəndi yolundan istifadə etməklə Qarabağdakı erməni sakinlərə yardım göstərmək imkanının mövcud olduğunu bildirir. Azərbaycan Xarici İşlər Nazirliyinin bu xüsusda yaydığı məlumatda qeyd olunur ki, belə bir məsələ nazir Ceyhun Bayramovla Beynəlxalq Qırmızı Xaç Komitəsinin Azərbaycan nümayəndəliyinin rəhbəri Draqana Kojiçin görüşündə səsləndirilib. Qeyd olunur ki, görüş zamanı, Azərbaycanla Beynəlxalq Qırmızı Xaç Komitəsi arasında əməkdaşlıq məsələləri, Laçın yolu ətrafında vəziyyət, BQXK-ın Azərbaycanın Xankəndi şəhərində fəaliyyəti məsələləri müzakirə olunub. Məlumatda vurğulanır ki, nazir aprelin 23-dən, yəni keçid-buraxılış məntəqəsinin açıldığı gündən iyunun 15-dək keçid məntəqəsi şəffaf və təhlükəsiz fəaliyyət göstərdiyini, erməni sakinlərlə sərhədçilər arasında normal ünsiyyət formalaşdığını bildirib. Amma bu prosesi həzm edə bilməyən Ermənistanın 15 iyun tarixində keçid məntəqəsini atəşə tutması ilə nəticələnib və bu, Laçın sərhəd buraxılış məntəqəsindən təhlükəsiz keçidə maneçilik törədib. XİN-in yaydığı məlumatda vurğulanır ki, görüşdə nazir baş verən hadisə ilə müvafiq tədbirlər görüldüyünü bildirib. Xəbərə görə, nazir həm də Ermənistanın gələcəkdə bu kimi təxribatlarının təkrarlanmayacağına dair Azərbaycan tərəfinə müvafiq zəmanətin verilməsinin zəruri olduğunu diqqətə çatdırıb.
O da vurğulanır ki, BQXK nümayəndəsi ilə görüşdə nazir Azərbaycanın komitə vastəsilə erməni sakinlərin sərhəd məntəqəsindən zəruri tibbi ləvazimatların təchizatna imkan yaratmağa hazır olduğunu bildirib. Sakinlərin digər ehtiyaclarına gəlincə, görüşdə Azərbaycan tərəfinin BQXK vasitəsilə Ağdam-Xankəndi yolundan istifadə etməklə yardım göstərmək imkanının mövcud olduğu qeyd edilib. Bunu qəbul etməyən ermənilər Qarabağı tərk edə bilərlər. Ermənistanın “Qraparak” nəşri məsələnin bu tərəfinə nəzər salaraq yazır: “Qarabağ dekabrın 12-dən hər tərəfdən nəzarət altındadır və son 10 gündə kommunikasiya kəsilib. Bununla belə, bəzi insanlar hələ də Qarabağdan çıxmağı bacarırlar. Bu yaxınlarda Qarabağda və Ermənistanda bizneslə məşğul olan Arman Hakobcanyanın Ermənistana köçdüyü və biznesini genişləndirdiyi yazılıb. Məsələn, o, Haqik Tsarukyanın yanacaqdoldurma məntəqələrini alıb. Ruben Vardanyan “təyin olunan” kimi onu “dövlət nazirinin müşaviri təyin etdilər”, amma Qarabağda deyirdilər ki, əslində əsas “dövlət naziri” məhz odur. Vardanyan “tutduğu vəzifədən azad edilən” kimi Hakopcanyan da “azad edilib” və Ermənistana köçüb. Bu günlərdə Arayik Arutyunyanın ailə üzvlərinin də Ermənistana köçməsi barədə xəbərlər yayılıb. Məlum olub ki, onun böyük qızı Qarabağda deyil, həyat yoldaşı və kiçik qızı hazırda Qarabağdadır. Böyük qızına gəlincə, o, 3 ay əvvəl xaricə oxumağa gedib. Bakalavr təhsilini başa vurduqdan sonra təhsilini xaricdə davam etdirmək istəyib. Təhlükəsizlik səbəbi ilə ölkənin adı çəkilmir. Bizə dedilər ki, onun qayıtması və Qarabağdan uzaqdan təhsilini davam etdirməsi üçün Qarabağa gedən yolun açılmasını gözləyirlər. Amma yəqin ki, bu olmayacaq”. Bu arada bir məqamı da diqqətə çatdıraq ki, Rusiya sülhməramlılarının ərzaq təminatı Ermənistandakı rus hərbi bazasından təmin olunur. Amma indu bu mümkün deyil. Ona görə də onlar təminat üçün Azərbaycan tərəfi ilə danışıqlar aparırlar. Azərbaycan humanitar jest edərək, rus sülhməramlılar və Xankəndidəki erməni əhalinin bütün ehtiyaclarını qarşılamağa hazır olduğunu elan edib. Onlar ərzaq və digər zəruri malları Ağdamdan ala biləcəkləri barədə Bakının mövqeyini ifadə edib. Ermənilər də bundan istifadə edə bilərlər. Ölkəmizdən ərzaq tədarükü isə Azərbaycanla inteqrasiya yolunda daha bir addım deməkdir. Ermənilər bunu dəyərləndirməlidirlər. Hər halda, onların seçim üçün vaxtı və şansı çox deyil.
Samirə SƏFƏROVA
