Rusiya və Ermənistan arasında artan gərginlik fonunda İrəvanın Moskvaya qarşı kampaniyası geniş vüsət alır. Bu hal, xüsusən də Rusiya Xarici İşlər Nazirliyinin rəsmi nümayəndəsi Mariya Zaxarovanın son açıqlamalarından sonra özünü daha qabarıq göstərir. İndi iş o yerə çatıb ki, ermənilər Rusiyanı özünə saxta tarix yaratmaqda ittiham etməkdən belə çəkinmir.
Qeyd edilən xüsusda “armenianreport” portalının yazdıqları xüsusi diqqət çəkir. Burada qeyd edilir: “Rusiya Xarici İşlər Nazirliyinin nümayəndəsi Mariya Zaxarova elə biabırçı reputasiya sahibidir ki, bundan sonra o, hətta Tver boyu çılpaq gəzə, araq içə bilər. Artıq heç nə heç kəsi təəccübləndirməyəcək. Görünür, Zaxarovanın özü də bütün bunları yaxşı bilir. Çünki o, təkcə özünü deyil, bütün Rusiyanı axmaq bir işıqda ifşa edərək, sadəcə şok cəfəngiyatlar səsləndirməyə davam edir. O, keçirdiyi brifinqdə deyib: "Şuşada Türkiyə konsulluğunun açılması Bakı ilə Ankara arasında ikitərəfli münasibətlərin mövzusudur". Zaxarovanın sözlərinə görə, istənilən yerdə, xüsusən Şuşada konsulluq idarələrinin açılması məsələsi ikitərəfli münasibətlərin mövzusu olaraq qalır”. Portal yazır ki, Rusiyanın bu yanaşmasını Ermənistan qəbul etmir və bu səbəbdən Rusiya həqiqətlərinə baxmaq lazımdır: “Məsələn, Rusiyanın tarixinin qlobal şəkildə saxtalaşdırılması prosesi II Yekaterina tərəfindən 1783-cü il dekabrın 4-də xüsusi bir fərman imzalanması ilə başlayıb: “Birgə səyləri ilə faydalı olacaq 10 nəfərə qədər adam təyin edin, qədim tarixə, əsasən Rusiyaya aid qeydlər olsun". Komissiyanın üzvü Xrapovitski öz xatirələrində açıq şəkildə yazırdı ki, Yekaterina Rusiya tarixinin yeni versiyasını şəxsən idarə edirdi. Tatişşevin Rusiyada qadağan olunmuş əsərlərindən belə çıxır ki, 1237-1240-cı illərdə Batı xanın yürüşü zamanı Moskva belə mövcud olmayıb. Orda tatarlarının sənədlərinə görə, Moskvanın yaranma ili 1257-ci ildir. Moskva, Erzey (Ryazan), Vepsian Kostroma və Voloqda arasında əlverişli yerdə yerləşdiyi üçün xərac toplama məntəqəsi kimi tikilib. Bataqlıqlarda tikilmiş Peter haqqında danışmağa dəyməz. Hamıya məlumdur ki, İnqriyan finləri Sankt-Peterburqun yerli əhalisi hesab olunurlar, çünki Neva sahillərində fin yaşayış məntəqələri hələ onun yaranmasından əvvəl və 1703-cü ildə mövcud olub, lakin Rusiya Federasiyasında bütün bunlara susurlar. Halbuki, bu, Ukrayna və onun müttəfiqləri tərəfindən bu şəhərlərin işğalının ruslar üçün böyük faciə olmayacağını inkar etmir. Onlar sadəcə qaçacaqlar, indi etdikləri kimi, milyonlarla insan yenə müharibədən qaçacaq. O cümlədən sığınacaq üçün ölkəmizi seçəcəklər. Biz hər şeyi görürük, hər şeyi başa düşürük...Kremlin cəsarəti, qətiyyəti yoxdur. Orada dönə-dönə Ermənistan-Rusiya münasibətlərinin tarixinə xəyanət yolu ilə getməyə üstünlük verirlər. Və bu, nifrətdən başqa heç nəyə səbəb olmur”.
Bu arada qeyd edək ki, rəsmi səviyyədə də İrəvanın Moskvaya diplomatik sferada, belə demək olarsa, hücumları artıb. Xüsusən də Laçın sərhəd-buraxılış məntəqəsində baş verənlərdə sonra bu özünü qabarıq büruzə verir. Xatırladaq ki, Azərbaycan sərhədçiləri Laçın sərhəd-keçid məntəqəsinin girişində, erməni tərəfinin çəkdiyi asfaltın qurtaracağından başlayan bir neçə metrlik asfaltsız yoldan (neytral ərazidən) postumuza tərəf, Azərbaycanın sərhədinin girişində bayrağımızı qaldırarkən düşmən təxribata əl atmış, bir sərhədçimizi yaralamışdı. Daha sonra rus sülhməramlıların iştirakı ilə yenidən bayrağımız qaldırılarkən ermənilər rus sülhməramlıları da atəşə tutmuşdular. Bundan sonra Mariya Zaxarova bildirib ki, iyunun 15-də Laçın dəhlizində baş vermiş hadisə Ermənistan tərəfindən Ermənistan-Azərbaycan sərhədinin delimitasiya olunmaması problemi ilə bağlıdır: “Rusiya tərəfi dəfələrlə məsləhət yardımı ilə Ermənistan-Azərbaycan sərhədinin delimitasiyası üzrə səmərəli, əsaslı işə start verməyə çağırıb. Biz sərhədin bu hissəsində də sərhəd xəttinin müəyyənləşdirilməsinə kömək etməyə hazırıq”. Bundan sonra Ermənistan XİN mətbuat katibi Ani Badalyan sərsəm açıqlamalar verib və iddia edib ki, 15 iyun hadisəsi Rusiya Xarici İşlər Nazirliyinin rəsmi nümayəndəsinin qeyd etdiyi kimi, Laçın dəhlizində deyil, Ermənistan Respublikasının suveren ərazisində - Həkəri körpüsünün Ermənistan tərəfində baş verib: “Rusiya tərəfinin şərhində açıq-aşkar ziddiyyət var. Ermənistanla Azərbaycan arasında sərhədin demarkasiya olunmaması səbəbindən sərhəd xəttinin haradan keçdiyini dəqiq söyləmək mümkün deyilsə və Rusiya Xarici İşlər Nazirliyinin rəsmi nümayəndəsinin iddia etdiyi kimi, bu, davam edən problemlərin səbəbidirsə, o zaman sual yaranır: iyunun 15-də Ermənistanla Azərbaycan sərhədinin bu hissəsində, körpünün bu tərəfində hansı əsasla və hansı prinsiplə Azərbaycan bayrağı asılmışdı?”.O qeyd edib ki, Zaxarovanın sözləri Azərbaycanın sözləri ilə eynidir, çünki Azərbaycan da vaxtaşırı demarkasiyanın olmadığını təkrarlayır: “Həm məqsəd, həm də həyata keçirilmə yeri açıq-aydın sülhməramlıların funksiya və vəzifələrinin bir hissəsi deyildisə, Rusiya sülhməramlılarının Azərbaycanın bu əməliyyatında niyə iştirak etdiyi aydın deyil. Xatırladaq ki, Rusiya sülhməramlılarının bu bölgədəki yeganə funksiyası 5 kilometrlik Laçın dəhlizinə nəzarət etməkdir”. Halbuki, bayrağımız Azərbaycanın suveren ərazisində qaldırılıb. Amma iddia edildiyi kimi, ərazi mübahisələndirilsə belə, bu, rus sülhməramlılara atəş açılmasına səbəb olmamalıdır. Rus sülhməramlılara atəş açmaq açıq-aşkar 10 noyabr 2020-ci il bəyanatını pozma, Kremlə meydan oxumaqdır. Elə Mariya Zaxarova da qeyd edib ki, diqqəti 2020-ci ildən etibarən ən yüksək səviyyədə üçtərəfli sazişlər kompleksinin həyata keçirilməsinə yönəltmək lazımdır: “Biz diqqəti 2020-ci ildən 2022-ci ilə qədər olan dövrdə ən yüksək səviyyədə üçtərəfli sazişlər kompleksinin həyata keçirilməsinə yönəltməliyik. Onlar fundamentaldır, alternativi yoxdur, çünki onlar yol xəritəsi kimi fundamentaldır: bu, Ermənistan-Azərbaycan münasibətlərinin normallaşması prosesidir. Axı bu bəyanatlar hər üç tərəfdə hazırlanandan sonra qəbul edilib! Yoxsa kimsə o vaxt razılaşdırılan sənədlərdən imzasını geri götürmək istəyir?”.
Nahid SALAYEV
