AŞPA Laçın dəhlizindəki vəziyyətlə bağlı qətnamə qəbul edib və orada sərbəst və təhlükəsiz hərəkətin olmaması qeyd edilib. Bu barədə Ermənistan parlamentinin vitse-spikeri, Ermənistanın təşkilatdakı nümayəndə heyətinin rəhbəri Ruben Rubinyan məlumat verib.
O qeyd edib ki, Azərbaycan nümayəndə heyəti qətnamənin dəyişdirilməsi və ya qəbul edilməməsi üçün hər şeyi edib. Bundan başqa, Azərbaycanın təklif etdiyi 60-a yaxın düzəliş rədd edilib. Rubinyan vurğulayıb ki, qətnamə əsasən “Laçın dəhlizinin blokadasının humanitar nəticələri”ndən və Azərbaycan tərəfindən “insan hüquqlarının pozulması”ndan bəhs edir:
"Sənəd təcili olaraq Laçın “dəhlizi”nə və Qarabağa beynəlxalq faktaraşdırıcı missiyanın göndərilməsinin vacibliyini vurğulayır. Sənəddə, həmçinin, Azərbaycan AİHM və Beynəlxalq Ədalət Məhkəməsinin qərarlarına əməl etməyə, tədarükü bərpa etməyə çağırılır.
AŞPA-nın belə prinsipial məsələ ilə bağlı bu cür qərəzli mövqeyi necə izah edilə bilər?
Demokratik Yüksəliş Partiyasının sədri Əli Mustafa “Bakı-Xəbər”ə açıqlamasında bildirdi ki, AŞPA-nın tutduğu mövqe Avropanın aparıcı dövlətlərinin mövqeyi ilə bağlıdır: “AŞPA abstrakt bir qurum deyil. Ora hər bir ölkədən bəlli sayda nümayəndələr yığırlar. Bu sıraya Fransa, Almaniya, Avropanın digər ölkələrini aid etmək olar. Onların böyük əksəriyyəti də insan hüquq və azadlıqlarına münasibətdə eyni mövqedən çıxış edir. Azərbaycanla olan iqtisadi əlaqələr, neft - qaz sövdələşmələri, strateji tərəfdaşlıq, demək olar ki, bu sferada işləmir. Əlbəttə, mən də təəssüflə qeyd edirəm ki, heç də bu bütün hallarda münasibət obyektiv olmur, gerçək mənada insan hüquq və azadlıqlarına münasibətlə şərtlənmir. Bir çox hallarda siyasi məqamlarla, qərəzli yanaşmalarla da müşahidə olunur. Xüsusilə də nəzərə alsaq ki, Güney Qafqaz uğrunda böyük mücadilə var. Ermənistan daha çox Qərblə, Avropa ilə işləməyə çalışır. Birmənalı olaraq Rusiyanın bölgədən çıxarılmasına səy göstərir. Biz isə bir qədər fərqli, tarazlı münasibət aparırıq. Həm Rusiya, həm Amerika, həm də Avropa ilə işləməyə çalışırıq. Bu baxımdan düşünürəm, Ermənistan anlayır ki, Rusiya sıradan çıxarılır, ona görə də o da Qərbə üz tutur. Qərb də, təbii ki, ona adekvat reaksiya verir. Amma məsələnin digər bir tərəfi də var. Azərbaycan höküməti rəsmiləri Avropanın və Ermənistanın bütün resursları ilə tək üz-üzədir. Burada Ermənistanın və Avropanın vətəndaş cəmiyyəti, siyasi sistemlər, başqa qurumlar və elita iştirak edir. Bir sözlə, bunlar hamısı Azərbaycana qarşı birlikdə mübarizə aparır. Yəni bizim çıxaracağımız nəticə budur ki, Azərbaycanın da nəhayət legetim mücadilə verə biləcək vətəndaş cəmiyyətinə ehtiyacı var. Dövlətin resursları bu cür təzyiqə qarşı yetərli deyil. Cəmiyyətin də imkanlarını səfərbər etmək lazımdır. Burada söhbət legetim resurslardan gedir, yalançı imitasiyadan yox. Dövlət mütləq bu barədə düşünməlidir. Gerçək vətəndaş cəmiyyəti, siyasi, milli güclər dövriyəyə buraxılmalıdır. Bu resursların, potensialın reallaşması, prosesə qatılması baş verərsə, o zaman Azərbaycan Ermənistana, eyni zamanda qüsurlu qurumlara qarşı mübarizədə daha da güclənə bilər”.
Məhəmmədəli QƏRİBLİ
