Erməni mediasının verdiyi məlumata görə, Avropa Parlamentinin Təhlükəsizlik və Müdafiə üzrə Alt Komitəsinin sədri Natali Loizeaunun başçılıq etdiyi nümayəndə heyəti Ermənistana gəlib.
Natali Loizeau keçirdiyi mətbuat konfransında Laçın dəhlizinin bağlanmasının qanunsuz olduğunu vurğulayıb. O, həmçinin, İrəvanda rəsmi şəxslərlə görüşlər keçirdiyini və Gorusa səfər etdiyini, burada Ermənistan Respublikasının Sünik vilayətinin qubernatoru və digər rəsmi şəxslərlə görüşdüyünü bildirib:
“Daimi sülhün bərqərar olmasının vaxtı çatıb. Mən Avropa Parlamentinin mövqeyini təsdiq etmək istəyirəm: Laçın dəhlizinin bağlanması qanunsuzdur və buna son qoyulmalıdır. Dağlıq Qarabağ ermənilərinin hüquqları( ?) və rifahı qorunmalı, Ermənistanın suverenliyinə və ərazi bütövlüyünə hörmət edilməlidir”.
Avropa missiyasının bu mövqeyindən neytrallıq hiss edilirmi?
AMİP Mərkəzi Şurasının sədri, politoloq Rəşad Bayramov “Bakı-Xəbər”ə açıqlamasında bildirdi ki, Avropa Parlamentinin müdafiə və təhlükəsizlik komissiyasının sədri Natali Loizeau, məlum olduğu kimi, Fransadan seçilmiş Avropa Parlamenti deputatıdır: “O, bundan qabaq da uzun illər Fransa Xarici İşlər Nazirliyində işləyib. Xarici İşlər Nazirliyində olduğu dönəmdə də, ondan sonra Avropa Parlamentinin deputatı seçildiyi dönəmdə də mütəmadi olaraq özünün anti-Azərbaycan bəyənatları ilə seçilən şəxs olub. Yəni birbaşa erməni lobbi təşkikatları ilə əlaqəsi olan adamdır. Bu baxımdan da onun rəhbərlik etdiyi komissiyanın bu cür Azərbaycan əleyhinə qərarla çıxış etməsində təəccüblü və qeyri-adi heç nə yoxdur. Bu qadının mövqeyi əvvəlcədən məlumdur. İndi də Laçın dəhlizi istiqamətində səfər etmək, yerində vəziyyətlə tanış olmaq niyyətlərini bildiriblər. O cümlədən də Avropa İttifaqının Ermənistanda olan müşahidə missiyasının rəhbəri ilə birlikdə bunu edəcəklərini deyiblər. Əvvəla, Laçın dəhlizinə həmin şəxslərin səfəri ilk növbədə Azərbaycan tərəfi ilə razılaşdırılmalıdır. Çünki Ermənistan tərəfdən Həkəri çayının üzərindəki körpüyə kimi gələ bilmələrinə, təbii ki, Azərbaycan tərəfi heç nə deyə bilməz. Amma konkret Laçın dəhlizində bu və ya digər şəkildə minitorinq aparmaq istəyirlərsə, bilməlidirlər ki, bu Azərbaycan torpaqlarıdır və razılaşdırılmadan mümkün deyil. İkinci bir məqam - Laçın dəhlizinin bağlanması və güya erməni vətəndaşlarının orada blokadaya düşməsi ilə bağlı sərsəmləmələrin heç bir əsası yoxdur. Laçın dəhlizi müvəqqəti olaraq sərhəddə olan insidentdən sonra bağlanıb. Əslində bu bağlanış həm də həmin kənddə olan ermənilərin təhlükəsizliyi məqsədi ilə baş verib. Çünki hər kəs insidentin yaranmasını, baş vermə səbəbini və hadisənin necə gerçəkləşdiyini gördü. Hər kəs gördü ki, Azərbaycan Bayrağının asılması zamanı ermənilər tərəfindən həm Azərbaycan sərhədçiləri, həm də orda dayanan sülhməramlı qüvvələrin təmsilçiləri faktiki olaraq hədəfə alındılar. Bu o deməkdir ki, həmin yoldan keçən ermənilər də istənilən vaxt hədəfə alına bilərlər, qarşısıalınmaz proseslər baş verə bilər. Üçtərəfli bəyanatın şərtlərinə görə, Azərbaycan həmin yoldan ermənilərin keçidinə təhlükəsizlik zəmanəti verir. Bu və ya digər şəxsin təhlükəsizlik keçidinə zəmanət verirəmsə, onun təhlükəsizliyinin qorunması birbaşa mənim cavabdehliyimdədir. Mən də məhz onların təhlükəsizliyini qorumaq üçün bu insidentlə bağlı konkret qərarlar qəbul olunmayana qədər, atəş açan ermənilər müəyyənləşdirilməyənə qədər yolun bağlanmasını ona görə həyata keçirirəm ki, məhz elə təhlükəsizliyi həyata keçirə bilim. Bir daha təkrar edirəm ki, həmin yolun kiminsə bəyanatından asılı olmayaraq açılması o yoldan istifadə edən ermənilərin belə həyatını böyük təhlükə altına alır. Bunu Avropa Parlamenti, hazırda Ermənistanda olan Avropa İttifaqının müşahidə missiyası yaxşı başa düşməlidir və prosesin nədən qaynaqlandığını dərk etməlidir. Ona müvafiq olaraq da, bu və ya digər şəkildə bəyanatlar qəbul etməlidir. Yoxsa birtərəfli şəkildə, ancaq Fransanın mövqeyini əks etdirməklə bu mümkün deyil. Fransa Xarici İşlər Nazirliyinin bəyanatı ilə Avropa Parlamentinin müdafiə və təhlükəsizlik komissiyasının hazırladığı sənəd arasında elə bir prinsipial fərq yoxdur. İkisi də birtərəfli şəkildə Azərbaycanı günahlandıran, ikisi də Azərbaycan maraqlarına zidd olan bəyanatlardır. Təbii ki, heç bir halda qəbuledilən deyil”.
Məhəmmədəli QƏRİBLİ
