Ermənistanın Ətraf Mühit Nazirliyi Azərbaycanın Naxçıvanla sərhədə yaxın ərazidə yerləşən Ararat rayonunun Yerasx kəndində gələcək metallurgiya müəssisəsinin fəaliyyəti ilə bağlı izahat yayıb.
Bildirilir ki, güya son günlər bu yaşayış məntəqəsi Azərbaycan Silahlı Qüvvələri tərəfindən atəşə tutulub. Nə qədər qəribə olsa da, Ermənistan tərəfi bunu təqribən 70 milyon dollar sərmayə ilə iri iqtisadi layihənin həyata keçirilməsini zorakılıqla pozmaq cəhdi ilə əlaqələndirir.
Ekologiya departamenti Bakının müəssisənin Azərbaycan ərazilərinə ekoloji ziyan vuracağı ilə bağlı arqumentlərini əsassız dəlillərlə bənd-bənd “təkzib” edib. Nazirlik Transsərhəd Kontekstdə Ətraf Mühitə Təsirin Qiymətləndirilməsi haqqında 1991-ci il Konvensiyasına istinad edərək qeyd edir ki, sərhəddəki qara metal qırıntıları emal ediləcək və qeyd olunan beynəlxalq sənədə əsasən ekoloji transsərhəd təhlükə yaradan obyektlər kateqoriyasına daxil deyil. Əlvan metallurgiya müəssisələri, domna və marten sobaları təhlükəli obyektlər kateqoriyasına aiddir, Yerasx zavodunda isə elektrik enerjisi ilə işləyən induksiya sobasından istifadə ediləcək.
Ermənistanın bu cavabını nə dərəcədə əsaslı saymaq olar?
BDU-nun professoru, İqtisadi ve siyasi cografiya uzrə mütəxəssis Çingiz İsmayılov “Bakı-Xəbər”ə bildirdi ki, Ermənistan nə istəsə bəyan edə bilər, ancaq reallıqlar tam başqadır: “Son 35 ildə Oxçuçayı necə ölü çaya çevirdikləri gözümüzün qabağındadır. Çayın bu vəziyyətə düşməsinə səbəb mis mədən tulantılarının axıdılması olub. Bu prosesə onlar hətta biz eyni ölkənin tərkibində yaşayanda, yəni 1987-ci ildə başlayıblar. Onlara çox sadəlövh insanlar inana bilər. Birincisi budur ki, Ermənistan əsasən əlvan metal emal edir. Qara metalın təkrar emalına dair 180 min ton ehtiyatın olması gülünc görünür. Zavod bir illik tikilmir. Hər il onlarda 180 min ton metalalomun yığılması inandırıcı olmayan cəfəngiyatdır. İkincisi, ekologiyaya təhlükənin olması ilə bağlı dedikləri də boş məsələdir. Fakt odur ki, bu cür istehsal prosesi ətraf mühitə təsir edir. Zavodun qazla işləyəcəyi də yalandır. Çünki onları buna lazım olan həcmdə qaz ehtiyatı yoxdur. Təbii qazı Rusiyadan və İrandan idxal edirlər. Layihəyə başlayanda təhlükənin miqyası daha aydın görünəcək. Bütün tullantılar axıdılacaq Araz çayına. Həmin sudan da biz bütün sahələrdə istifadə edirik. Bu məsələni beynəlxalq səviyyəyə qaldırmaq lazımdır. Beynəlxalq ekoloji ekspertiza təyin edilməlidir. Yalnız bundan sonra biz konkret danışa bilərik. Onların hazırda səsləndirdiyi fikirlərin heç bir əsası yoxdur. Düşmən dövlət hər gün yeni təxribatla bizi narahat edir. Belə ölkədən pozitiv nəsə gözləməyə dəyməz. Paşinyan öz çıxışında deyib ki, sülh müqaviləsi bağlasalar da, həmin sənəd onlar üçün yalnız kağız parçası rolunu oynayacaq. Buradan onların əsl niyyəti aydın görünür. Biz onların davranışlarına adekvat addımlar atmalıyıq. Çünki dost yox, düşmən ölkədir”.
Məhəmmədəli QƏRİBLİ
