1918-ci ildə nəşrə başlayan “Azərbaycan” qəzeti bu gün də fəaliyyət göstərir. Lakin Milli Məclisin iyunun 13-də keçirilən iclasında “Azərbaycan Respublikasının 2023-cü il dövlət büdcəsi haqqında” qanuna təklif edilən dəyişikliyin müzakirəsi zamanı “Azərbaycan” qəzetinin Baş redaktoru, deputat Bəxtiyar Sadıqov deyib ki, “Azərbaycan” qəzetinə sistemli pul ayrılmasa, qəzet fəaliyyətini dayandıracaq.
Mətbuatın məlumatına görə, deputat bildirib ki, ötən il müraciətləri əsasında qəzetə birdəfəlik yardım göstərilib: “Mən cari ildə qəzetin yaşadılması üçün Milli Məclisə müraciət etdim. Amma aldığım cavabdan bəlli oldu ki, heç bir yardım mümkün deyil. Halbuki, qəzetimiz Milli Məclisin orqanıdır. Qəzetin maliyyə və texniki təminatı Milli Məclis tərəfindən edilməlidir. Artıq qəzetimiz öz əməkdaşlarının əməkhaqqını ödəyə bilmir. Vəziyyət göstərir ki, hər il bizə ən azı 1,5 milyon manat sistemli maliyyə yardımı edilməlidir. Əks təqdirdə çapımız dayanacaq. Qəzetdə 65 yaradıcı və texniki işçi çalışır. İş rejimimiz, rəsmi materiallardan asılı olaraq, 2 və ya 3 növbəli olur. Bir çox əməkdaşımız uzun illərdir qəzetdə işləyir. Qəzet bağlansa, onlar yeni saytlarda iş tapa bilməyəcəklər. Qəzet bağlansa, qəzetin işçilərinin mətbuat xidmətlərində və digər yerlərdə işlə təmin olunmasını xahiş edirəm”.
B.Sadıqovun açıqlaması ilə bağlı Milli Məclisin Mətbuat Xidməti ilə də əlaqə saxlayıb, "Azərbaycan" qəzetinin sistemli maliyyələşməsinin dayandırılmasının səbəblərini öyrənmək istədik. Milli Məclisin mətbuat xidmətindən bildirdilər ki, bu barədə hər hansı bir mövqe bildirmək istəmirlər, "siz ya Bəxtiyar Sadıqovun özü, ya da redaksiya ilə əlaqə saxlayın" dedilər.
“Azərbaycan” qəzetinə sistemli pul ayrılması nə deməkdir? Sizcə nə üçün qəzetin maliyyələşdirilmısi sahəsində belə ciddi problemlər meydana çıxıb? Bu və başqa sualarla Bəxtiyar Sadıqova vatsap üzərindən müraciət etdik. Çünki zənglərimizə cavab verilmədi. Amma yazı çapa hazırlanana qədər yenə ondan bir cavab ala bilmədik. Ümid edirik ki, B.Sadıqov məsələyə aydınlıq gətirəcək. B.Sadıqovdan cavab alan kimi, onun fikirlərini də dərc edəcəyik.
Qəzetin baş redaktor müavini İxtiyar Hüseynli ilə də əlaqə saxladıq, İ.Hüseynli də bildirdi ki, bu məsələ ilə bağlı yalnız B.Sadıqov danışa bilər.
Baş redaktordan hələ ki, cavab ala bilmədiyimiz üçün ekspertə müraciət etdik.
“Milli Məclis onlara pul ayırmamaqla düzgün qərar verib”
B. Sadıqovun açıqlamasına şərh verən tanınmış media eksperti Azər Həsrət "Bakı-Xəbər"ə "Sistemli maliyyə ayrılması o deməkdir ki, qəzet büdcəyə oturub. Yəni dövlət büdcəsindən maliyyələşir. İndi bunu Milli Məclis vasitəsilə edirlər. Adamlar işlərinin nəticəsindən asılı olmayaraq sabit şəkildə maliyyə alırlar. Tutaq ki, o qəzet ictimai rəyə təsir edir, yoxsa etmir, o qəzetin cəmiyyətə faydası var, yoxsa yoxdur - bu məsələ müzakirə edilmir, sadəcə olaraq sabit bir məbləğdə maliyyə alırlar, bu maliyyə də, qeyd olunduğu kimi, 60-dan yuxarı işçinin əməkhaqqını ödəməyə və digər texniki xərclərə yönəlir. Təsəvvür edirsizmi, bir qəzet, yaxud bir qəzet rəhbərliyi “necə edək ki, ictimai rəydə önə çıxaq, yeni texnologiyalar tətbiq edək, bizim qaldırdığımız məsələlər geniş ictimai rezonans doğursun” kimi məsələlər barədə düşünmür, ancaq “biz oturduğumuz yerdə maaş almalıyıq, işləməlik”-deyirlər. İşin nəticəsi nədir? Açığını deyim, şəxsən mən təəssüflə qeyd edirəm ki, bu qədər resursları, bu qədər işçisi olan bir media cəmiyyətdə yox kimidir. Biz baxırıq, bəzən 5-3 nəfərlə işləyən saytlar, təkbaşına fəaliyyət göstərən jurnalistlərimiz var, amma onların yazdıqları 5-10 cüümləlik yazı cəmiyyətdə yeri yerindən oynadır, tufanlar qoparır. Amma onlara heç kəs pul filan vermir. Yəni effektivlik baxımından bu boyda böyük kollektivlə nəticə əldə edə bilməmək və sonra da durub ildə bir milyon yarım pul istəmək doğru bir yanaşma deyil. Düşünürəm ki, Milli Məclis “Azərbaycan” qəzeti ilə bağlı ciddi-ciddi qərarlar verməlidir”- deyə bildirdi.
A.Həsrətin sözlərinə görə, müqayisə etsək, dövlət büdcəsindən maliyyələşən “Xalq qəzeti” “Azərbaycan”dan fəqrli olaraq son zamanlar çox inkişaf edib: ”Qarşıdurma üçün demirəm, sadəcə müqayisə üçün deyirəm. “Xalq qəzeti” də bir vaxtlar o gündə idi. Yəni ictimai rəydə yox idi. Amma Əflatun Amaşov baş redaktor olduqdan sonra bu qəzet həqiqətən də ictimai rəydə önə çıxmağa başladı, yeni texnologiyanın tətbiqində çox ciddi irəlləyişləri var. “Xalq” TV qurublar, internet üzərindən qəzetin gündəlik xülasəsini verirlər, ayrı-ayrı səsli xəbərlər yayırlar. Görürsüz nə qədər işlər görürlər. Yəni demək imkanlar var, o imkanları tətbiq etmək lazımdır. “Azərbaycan” qəzeti nələrsə edirmi? Edirsə, şəxsən mənim xəbərim yoxdur, bəlkə edirlər bizim xəbərimiz yoxdur. Yaxud siz “Azərbaycan” qəzetinin ictimai rəydə sonuncu dəfə qaldırdığı hansı məsələ ətrafında ciddi ajiotaj yarandığını, müzakirələr getdiyini, ya da onların yazdıqlarının rezonans doğurduğunu müşahidə etmisiz? Eyni zamanda bu qəzet beynəlxalq müstəvidə nələr edib, edir, yaxud o qəzetin jurnalistləri arasında beynəlxalq, xarici mediada bu və ya digər şəkildə yazıları dərc olunan, səs gətirən hansısa addımları olan kimisə tanıyırsızmı? Şəxsən mən tanımıram. O baxımdan düşünürəm ki, dövlət pulu boşuna xərcləməməlidir. Əslinə qalanda, Milli Məclis onlara pul ayırmamaqla düzgün qərar verib. Ümumiyyətlə, düşünürəm ki, “Azərbaycan” qəzeti yaşadılmalıdır, bu bizim tarixi qəzetimizdir, amma bu şəkildə deyil. “Azərbaycan” qəzeti tamamilə yenilənməlidir. Şəxsən mənim əlimdə elə böyük kollektiv olsa və onlara o boyda daimi maddi təminat olsa, mən dağı-dağ üstə qoyaram. Biz lazım olanda iki-üç adamla bütün dünyaya səs salırıq, amma bunlar 60-65 nəfərlik kollektivlə işləyirlər, ortalıqda görünmürlər. Bu halda dövlət onlara niyə maliyyə ayırmalıdır?”- deyə müsahibimiz qeyd etdi.
Leyla QARAXANLI
