Rusiyanın Ermənistandakı səfiri Sergey Kopırkin erməni mediasına müsahibəsində deyib ki, Rusiya sülhməramlılarının Qarabağda alternativi bugünkü gündə yoxdur:
O bildirib ki, Rusiya sülhməramlıları, tənqidlərə baxmayaraq, öz vəzifələrini yerinə yetirirlər. “Söhbət təhlükəsizliyin təmini, Qarabağda erməni sakinlərin yaşamına şərait yaratmaq, genişmiqyaslı eskalasiyanın qarşısını almaqdan gedir. Bu rol icra edilir. Və mən Qarabağda bu rolu əvəz edəcək başqa qüvvə görmürəm” - o deyib.
Kopırkin qeyd edib ki, gələcəkdən danışırıqsa, o zaman bəzi qüvvələrin yeridilməsi üçün bütün tərəflərin razılığı lazımdır:
“Bundan əlavə, mövcud təcrübəni nəzərə alaraq, müxtəlif beynəlxalq və digər strukturların sülhməramlı imkanları ilə bağlı eyforiyaya qapılmaq olmaz. Xüsusilə Ukrayna, Yuqoslaviya təcrübəsi var”.
Rus səfirin Ermənistanı Ukrayna və Yuqoslaviya ilə hədələməsi hansı anlama gələ bilər?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, Rusiya səfirliyinin sülhməramlılarla bağlı söylədiklərinin nə anlama gəldiyinə nəzər yetirək: “Məlumdur ki, İkinci Qarabağ müharibəsinin sonlarına yaxın ABŞ Skandinaviya sülhməramlılarını bölgəyə yeritmək istəyirdi. Bu barədə ABŞ prezidentinin Milli Təhlükəsizlik üzrə müşaviri Robert Obrayn noyabrın 1-də bəyanat vermişdi ki, Skandinaviya sülhməramlıları hazırdı və tərəflərin razılığı olmadan bölgəyə yeridilə bilər. Ancaq bunun üçün heç bir addım atmadılar və edə bilmədilər. Müxtəlif səbəblərdən Rusiya sülhməramlıları Qarabağda yerləşdirildi. Rusiyanın Ukraynanı işğal etməsinin birinci mərhələsində Ukrayna Birləşmiş Millətlər Təşkilatına müraciət edərək, sülhməramlılar göndərilməsini xahiş etdi. Məsələ BMT-də müzakirə olundu və Rusiya veto qoyaraq buna imkan vermədi. Çünki sülhməramlıların yeridilməsi üçün ya BMT-nin qəbul olunan qərarı olmalıdır, yaxud da tərəflərin razılığı olmalıdır. Hər iki variantda Rusiya buna mane oldu. Bu müsahibədə Ukraynanı xatırlatmaqla, görünür, Kopırkin bu məqamı nəzərdə tutur. Qeyd edir ki, tərəflərin razılığı olmasa, sülhməramlılar bölgəyə yeridilə bilməz. Yuqoslaviyanı xatırlatmaqda məqsəd nədir? Söhbət 1995 - ci ilin iyulunda törədilmiş Srebrenitsa qətliamından gedir. Həmin dövrdə serblər 8 min müsəlmanı Hollandiya sülhməramlı kontingentinin gözü qarşısında qətl etmişdilər və onlar heç bir yardım göstərə bilməmişdilər, yaxud da istəməmişdilər. Düzdür, kontingent 600 nəfərlikdir, bu məsələnin öhdəsindən gəlmələri çox çətindir. Son nəticədə İkinci Dünya müharibəsindən sonra ən dəhşətli soyqırım hadisəsi baş vermişdi və Bosniya müsəlmanları qırılmışdı. Kopırkin bu faktı qeyd etməklə erməniləri qorxutmaq istəyirdi ki, başqa fikrə düşməsinlər və Bosniya müsəlmanlarının taleyini unutmasınlar. Həmçinin qeyd etmişdi ki, rus sülhməramlılarının Qarabağda olduğu müddətdə ciddi hadisə baş verməyib və onlar öz vəzifələrinin öhdəsindən gələ biliblər. Ancaq güman edirəm ki, burda erməniləri hədələməyə heç bir ehtiyac yoxdur. Çünki ilk növbədə Azərbaycan bölgədə sülhməramlıların yerləşdirilməsinin əleyhinədir. Əlindən gələni edir ki, müddət bitəndən sonra Rusiya sülhməramlıları Qarabağı tərk etsinlər və sonra heç bir sülhməramlı kontingent bölgəyə yeridilməsin. Azərbaycan artıq ermənilərlə danışıqlara başlayıb. Qarabağ separatçıları buna mane olsalar da, bu prosesin qarşısını almaq mümkün olmayacaq. Heç bir sülhməramlı qüvvə yeridilmədən Azərbaycan ermənilərin reinteqrasiyasını təmin edəcək və ermənilər də normal yaşamaqda davam edəcəklər. Reallıq bundan ibarətdir. Kopırkinin güman etdiyi və istədiyi hadisələr, təbii ki, baş verməyəcək. Onun məqsədi hamımıza aydındır: Rusiya sülhməramlılarını daha uzun müddətdə bölgədə saxlamağa nail olmaq. Bunun üçün də erməniləri hədələyir. Ancaq ermənilər istəsələr də, Azərbaycan Rusiya sülhməramlılarının qalmasına imkan verməyəcək”.
Məhəmmədəli QƏRİBLİ
