Pandemiya səbəbindən iki ilə yaxın bir müddət ərzində ölkə teatrları müvəqqəti olaraq bağlansa da, teatr sahəsində çalışan hər kəsə dövlət tərəfindən əməkhaqqı ödənilib. Heç şübhəsiz, bu müddət ərzində səhnədən ayrı düşmək aktyorlar üçün çox çətin keçdi və onların yaradıcılıq imkanlarının məhdudlaşmasına səbəb oldu.
Teatrların fəaliyyətinin bərpa edilməsi ərəfəsində teatr aləmində bəzi xoşagəlməzliklər haqqında danışıldığını eşitdik. Teatr aləmində gəzən söz-söhbətlərə görə, bəzi teatr məmurları aktyorların maaşına əl uzadır, tamaşalara ayrılan pullar göz dikir. Bunun sadəcə quru söz-söhbət, yoxsa reallıq olduğunu bilmirik, amma bu barədə danışılırsa, demək “torbada pişik var”. Teatrların iflic duruma düşdüyü bir dövrdə üstəlik də bu halın yaşanması narahatlıq doğurur.
“Bu bir həyəcan təbilidir”
Bakı Uşaq və Gənclər Teatrının direktoru və bədii rəhbəri İntiqam Soltan bizimlə söhbətində təəssüflə bildirdi ki, bu kimi hallar mövcuddur və bunu edənlər teatrı, onun uğurlarını düşünməyən adamlardır. İ.Soltan qeyd etdi ki, hələ bu barədə ətraflı danışmaq istəmir, zamanı çatanda geniş danışacaq: “Pandemiyanın teatrlara vurduğu zərər azmış kimi, üstəlik də, çox təəssüflər olsun ki, son dövrlər teatrlara qənim kəsilən fərdlər mövcuddur və bir az dərinə getsək mən onları bir-bir faktlarla açıqlayacağam. Amma hələ ki, sakit durmağa üstünlük verirəm. Teatra, teatr sənətinə, birbaşa aktyorlara, aktyorların aldığı beş-üç qəpik pula qənim kəsilən, onu “çox bilən” fərdlər artıq mövcuddur. Bu bir həyəcan təbilidir. İstəyirəm ki, bunu cənab nazirimiz də, yuxarı instansiyalarda oturan teatrsevər dövlət məmurları da bilsinlər. Yüksək vəzifəli dövlət məmurları, eləcə də mədəniyyət naziri bunu bilsə, “bu qənimlər” əl saxlayacaqlar”- deyə İ.Soltan qeyd etdi.
İ.Soltan qeyd etdi ki, pandemiya dövründə nə qədər çətin günlər yaşasalar da, yaradıcılıqdan qalmayıblar və uşaqlar üçün bir neçə alleqorik formatda qısa metrajlı film çəkiblər. “Məqəsədlərimdən biri odur ki, bizim uşaqların gələcəkdə söykənə biləcəyi xatirələr yığnağı olan uşaqlar üçün oyunlara həsr olunmuş həm tamaşalar işləyək, həm də hər oyunla bağlı qısa metrajlı 5-7 dəqiqəlik film işləyək. Baxmayaraq ki, ən yaddan çıxmış teatrlar sırasında Bakı Uşaq və Gənclər Teatrı da yer alıb. Mən bundan heç də qüssələnmirəm. Bu sadəcə yada salmayanların ləyaqətsizliyidir deyə düşünürəm. Bir nəfər tamaşaçı olsa da yenə işləyəcəyik. Bu teatrı əlimdə külüng yaratmışam, əlbəttə, tək yox, dostlarımla birgə. Səhnədə 10 aktyor olanda zalda bir tamaşaçı olduğu vaxt da olub. Amma tamaşanın əvvəlində bir, sonra görmüşük 10-15 tamaşaçı olub. Hətta o qədər tamaşaçı olub ki, çöldə gözləyiblər biz tamaşanı oynayaq. zaladakı tamaşaçılar çıxsın, onlar zala daxil olsun və biz tamaşanı onlar üçün də oynayaq. Bu həddə qədər gəlib çıxan vəziyyətimiz olub, yenə də olacaq, bu tam mümkündü. Bizim xalq teatrsevər xalqdır, amma nədənsə, yenə də deyirəm. bəzilərimiz teatrlara qənim kəsilirik”-deyə Bakı Uşaq və Gənclər Teatrının direktoru və bədii rəhbəri İ.Soltan bildirdi.
İradə SARIYEVA
