Fikrət Yusifov: “Bu, minlərlə iş yerlərinin açılması və ölkə iqtisadiyyatına töhfə verilməsi demək olacaqdır”
Orta Dəhlizin imkanlarından tam istifadə Azərbaycan üçün ümumi daxili məhsulun (ÜDM) əlavə olaraq 1,84 faiz artımını təmin edə bilər. Bu barədə Dünya Bankının “İnteqrasiya: Trans-Xəzər nəqliyyat marşrutu boyu yüksək səviyyəli ticarət logistikası” adlı hesabatında deyilir.
Hesabatda bildirilir ki, bu artım cari qiymətlərlə təxminən 1,3 milyard dollar məbləğində qiymətləndirilir. Orta Dəhlizin inkişafı Azərbaycanda ümumi məşğulluğun da 1,5 faiz artmasına imkan yarada bilər. Bildirilir ki, Orta Dəhlizin inkişafı uzunmüddətli perspektivdə marşrut üzrə iştirakçı ölkələrin ümumi ÜDM-ni 3,3 faiz və ya cari qiymətlərlə təxminən 58 milyard dollar artıra bilər. Bu ölkələrdə ümumi məşğulluğun isə 2,9 faiz artacaq.
Sözügedən məsələni baki-xeber.com-a şərh edən sabiq maliyyə naziri, professor Fikrət Yusifovun fikrincə, Orta Dəhliz Şərqlə Qərbi birləşdirən ən qısa yoldur: “Hal-hazırda Avrasiya məkanında baş verən hadisələr fonunda bu dəhlizin siyasi və iqtisadi əhəmiyyəti daha da artır. Dəfələrlə demişik – yolun Azərbaycan üzərindən keçməsi yalnız yüklərin ölkəmiz üzərindən şərqdən qərbə və əksinə daşınması demək olmayacaqdır. Bu həm də yolun keçdiyi ölkələrə və təbii ki, Azərbaycana yol boyunca yeni sərmayələrin qoyulması, yeni infrastruktur layihələrinin reallaşdırılması və xidmət müəssisələrin yaradılması demək olacaqdır. Bu isə öz növbəsində minlərlə iş yerlərinin açılması və ölkə iqtisadiyyatına töhfə verilməsi demək olacaqdır. Heç şübhə etmirəm ki, Orta Dəhliz fəaliyyətə tam olaraq başladıqdan bir neçə il sonra onun iqtisadi dvidendlərinin nə qədər maraqlı olduğunu görən dövlətlər və ilk növbədə Azərbaycan bu yolun əsaslı şəkildə genişləndirilməsi təşəbbüsü ilə çıxış edəcəklər. Heç də əbəs deyil ki, Prezident cənab İlham Əliyev 26 sentyabr 2026-cı ildə II Azərbaycan Beynəlxalq İnvestisiya Forumunda çıxışı zamanı dedi ki, iqtisadiyyatın ikinci mühüm hərəkətverici qüvvəsi, əlbəttə ki, logistika, nəqliyyat və bağlantılardır. Biz fiziki infrastruktur yaradaraq, investorlar üçün daha anlaşılan biznes mühiti formalaşdıraraq və dənizə birbaşa çıxışı olmayan ölkə olduğumuza görə qonşularla birlikdə işləyərək bunun üzərində kifayət qədər uzun müddət çalışmışıq. Qonşular olmadan biz böyük tranzit ölkəsi ola bilmərik. Beləliklə, bu, xüsusilə bəzi ənənəvi təchizat zəncirlərinin müəyyən risklərlə üzləşdiyi hazırkı geosiyasi vəziyyəti nəzərə alsaq, əlavə stimullaşdırıcı amil ola bilər – deyib. Bəli, doğrudan da bu yolun uğurlu fəaliyyəti və onun potensial imkanlarının gələcəkdə reallaşdırılması məhz Orta Dəhlizin keçdiyi ölkələrin iş birliyi və yüksək qarşılıqlı anlaşma şəraitində fəaliyyət göstərə bilməsindən bilavasitə asılı olacaqdır. Bu gün Azərbaycanın Orta Dəhlizin keçdiyi bütün ölkələrlə və ilk növbədə Mərkəzi Asiya ölkələri ilə yüksək səviyyədə əlaqələr qurub. Demək olar ki, bu vəzifəni artıq yerinə yetirilib”.
Vidadi ORDAHALLI
