Əli Orucov: “Bir sıra faktorlar və düzgün qərarlar Azərbaycanın mütləq qələbəsini təmin etdi”
Vətən müharibəsinin başlamasından altı il ötdü. Altı il əvvəl Azərbaycan Ordusu Ermənistanın işğalçı siyasətinə və cəbhəboyu hərbi təxribatlarına cavab olaraq sürətli əks-hücum əməliyyatına start verib. Prezident, Silahlı Qüvvələrin Ali Baş Komandanı İlham Əliyevin əmri ilə ordumuz torpaqlarımızın azadlığı uğrunda mübarizəyə başlayıb. Ordumuz 30 il işğalda qalan əraziləri sürətlə düşmən tapdağından təmizləyib.
Ümumilikdə, müharibəyə başlamaq böyük riskdir. Heç bir halda qabaqcadan onun nə qədər çəkəcəyini qabaqcadan proqnozlaşdırmaq mümkün deyil. Məsələn, 2022-ci ilin fevralında Rusiya Ukraynaya qarşı müharibəyə başlayanda Kremldəkilərin xəyalına da gəlməzdi ki, müharibə indiyə qədər uzanacaq. Mühribənin uzanması isə hər iki tərəf üçün böyük itkilər deməkdir. O baxımdan Azərbaycanın 44 günlük müharibədə belə böyük nəticə əldə etməsinin kökü nədə idi?
Sözügedən məsələyə aydınlıq gətirən AMİP funksioneri Əli Orucov baki-xeber.com-a açıqlamasında Azərbaycanın müharibəni uğurla bitirə bilməsini bir sıra amillərlə əlqələndirdi: “Burada bir sıra amillər var. Başlıca amil o idi ki, beynəlxalq hüquq Azərbaycanın tərəfində idi. İşğal olunmuş ərazilərlə bağlı BMT Təhlükəsizlik Şurasının 4 qətnaməsi var idi. Ötən müddət ərzində heç bir dövlət, o cümlədən Ermənistan separatçıların müstəqilliyini tanımadı. Digər tərəfdən, atəşkəsin illərlə uzanmasına və ATƏT-in Minsk Qrupunun həmsədrlərinin Ermənistanın tərəfində olmasına rəğmən, Azərbaycan danışıqlarda geri addım atmadı. Ötən dövr ərzində ölkəmizi işğalla barışmağa məcbur edə bilmədilər. İşğalın uzanmasına rəğmən, Azərbaycan təxribatlara getmədi. Yəni hazır olmadan genişmiqyaslı hücum əməliyyatlarına başlanılmadı. Neft gəlirləri hesabına güclü ordu quruldu, ən müasir silahlar alındı, NATO üzvü olan Türkiyə ilə tez-tez müştərək hərbi təlimlər keçirildi. Ordunun silahlanmasında pilotsuz uçuş aparatlarına, zərbə dronlarına xüsusi önəm verildi. Ən nəhayət torpaqları azad etmək üçün uyğun geosiyasi şəraitin yaranmasını gözlədik. Hesab edirəm ki, bu, çox önəmli məqamdır. 2020-ci ildə həmin məqam yarandı və Azərbaycan yaranan fürsət pəncərəsindən səmərəli istifadə etdi. Ermənistanın o qədər resursu yox idi ki, uzun müddətli müharibəyə duruş gətirsin. Həm insan resursları Azərbaycanla müqayisədə 3 dəfə az idi, həm də açıq dənizə çıxışın və Rusiya ilə quru sərhədinə malik olmaması onların məğlubiyyətini sürətləndirdi. Buna baxmayaraq, Rusiya 2020-ci ildə imkan vermədi ki, Qarabağı tam azad edək. Ancaq Rusiyanın Ukraynaya qarşı başladığı işğalçı müharibə 2023-cü ildə Qarabağda suverenliyimizin tam təmin edilməsinə gətirib çıxartdı. O baxımdan 2020-ci ilin 10 noyabrında müharibəni dayandırmaq doğru qərar idi. Əgər ölkə rəhbərliyi buna getməsəydi, vəziyyət əleyhimizə dəyişə bilərdi. Bir sözlə, bir sıra faktorlar və düzgün qərarlar Azərbaycanın mütləq qələbəsini təmin etdi. Bu, olmasaydı, o zaman müharibə illərlə uzana və böyük itkilər baş verə bilərdi. Rusiya kimi böyük dövlət 5 ilə yaxındır müharibəni bitirə bilmir”.
Vidadi ORDAHALLI
