Akif Nağı: “...Rəy sorğusunu uduzursa Netanyahunun qələbə qazanacağı ehtimalı həddən artıq azdır”
Kanal 13-ün sorğusuna görə, Netanyahunun bloku yerini itirir, Eisenkotun partiyası liderliyini qoruyur. Bir neçə gün əvvəl Kanal 13, Knesset seçkilərinin bu gün keçiriləcəyi təqdirdə səslərin necə bölüşdürüləcəyini göstərən ictimai rəy sorğusunun nəticələrini dərc edib. Sorğuya görə, Qadi Eisenkotun Yaşar partiyası 22 yer, Benyamin Netanyahunun Likud partiyası isə cəmi 18 yer alacaqdı. Naftali Bennettin Bayahad partiyası 11 yer, Yair Golanın Demokratiyası isə 11 yer qazanıb. Birgə Siyahı, Yisrael Beiteinu və Birləşmiş Torah Yəhudiliyi hər biri 8 yer qazanıb. Otzma Yehudit və Shas hər biri 7 yer, Zionut Datit 6 yer, Ofer Winterin Amha Yisrael və Ra'am isə hər biri 5 yer qazanıb. Yoaz Hendel və Yaron Zeliçinin birgə siyahısı seçki həddini aşaraq 4 yer qazanıb. Benni Qantsın Mavi və Ağ partiyası Knessetə daxil ola bilmir. Koalisiya partiyaları Knessetdə 51 yer qazanır. Hazırkı müxalifət partiyaları (ərəb partiyaları və Hendel-Zeliha siyahısı istisna olmaqla) 52 yer qazanır. Baş nazirliyə üstünlük verdikləri namizəd barədə soruşulduqda, respondentlərin 48%-i Eisenkot, 36%-i Netanyahu, daha 16%-i isə qərarsız olduğunu bildirib. Netanyahunun seçkiqabağı rəy sorğularını belə parlaq şəkildə uduzması nə ilə bağlıdır? Azad Vətən Partiyasının sədri Akif Nağı baki-xeber.com-a bildirdi ki, İsrailin hazırkı baş naziri ölkəsində və dünyada get-gedə nüfuzunu itirir, bu baxımdan onun rəy seçkilərində aşağı səs toplaması gözlənilməz deyildi. "İsraildə mürəkkəb proseslər gedir. Netanyahu həm özünün şəxsi keyfiyyətləri, həm atdığı adımlarla, həm Qəzzadakı hərbi əməliyyatlarla bağlı dünyada da, öz ölkəsində də birmənalı qarşılanmır. Nə etmək, nəyə nail olmaq istəyir? Özünü elə göstərir ki, o, sanki yəhudilərin maraqlarını müdafiə edir. Yəhudi xalqına, İsrailə nə lazımdır, onu sanki hamıdan yaxşı bilir. Bu şəkildə də gedir, xəttini davam etdirir. Bunu irəliyə aparan hansısa bir qrupun maraqlarıdır, yoxsa yox. Bu da sual yaradır. Netanyahudan narazılıq həmişə olub. Hətta onun üzərində məhkəmə prosesləri var. Bu proseslərin hamısı yarımçıq qalır, kimlərinsə görünməz əli o məhkəmələri yarımçıq saxlayır. Yəni artıq o populyar adam deyil. Şəxsi həyatı ilə bağlı da o qədər fərqlənmir. Əsas tənqidlər onun həyat yoldaşı ilə bağlıdır. Onu İsraildə çox xoşlamırlar. Bu da onun həyat yoldaşının siyasətə qarışması ilə bağlıdır ki, daim Netenyahunun yanında olur, bu da narazılıq doğurur. Bu narazılığın da olması müəyyən hərəkətləri ilə bağlıdır. Ne elə bir ciddi reytinqi yoxdur, amma hələ də hökumətdə qalır. Siyasətdə oynamağı bacarır. Netanyahunun reytinqinin aşağı düşməsi təbiidir, burada qəribə bir şey yoxdur". A. Nağı vurğuladı ki, onun rəqibləri cəmiyyətdə o qədər də tanınmayan qüvvələrdir, bunun da maraq doğuran tərəfləri var. "Maraq budur ki, o qədər də tanınmayan, reytinqi, nüfuzu, sosial bazası olmayan siyasi qüvvələr rəy sorğularında Netanyahudan daha çox səs alırlar. Deyəsən, İsrail cəmiyyətində "Netanyahu olmasın, kim olur olsun" prinsipi daha çox rol oynayır. Yəni onlar Netenyahuya qarşı dayanan qüvvələrə xüsusi simpatiya bəslədiklərinə, onların doğru yolda olduqlarını bildiklərinə görə yox, məhz Netanyahuya qarşı mənfi mövqedə olduqları, onu sevmədikləri, antipatiya bəslədikləri üçün onun rəqiblərinə, əks tərəfə səs verirlər. Yəni “kim olur olsun Netenyahu olmasın”. Belədir. Bu da onun ölkədə apardığı siyasətlə, daxilindəki problemlərlə bağlıdır. Bu gün İsrailin daxilində problemlər var, yanacaq, ərzaq çatışmazlığı yaşanır, iqtisadi problemlər mövcuddur. İsrail cəmiyyəti həmişə yaxşı yaşayırdı. Onların həmişə hər şeyləri olub. Yəni istehsalı yüksək səviyyədə təşkil edə biliblər. İsraildən xaricdə olan imkanlı, zəngin yəhudilər də həmişə ölkəyə kömək ediblər. Son vaxtlarda orada iqtisadi göstəriciləri bir qədər aşağı düşüb. Bundan başqa İsrail cəmiyyətində belə bir fikir də var ki, nə qədər qonşularla düşmən olmaq olar. Mən şəxsən onların yazılarını da oxuyuram, artıq onlar özləri də beziblər. Yarandıqları gündən qonşularla konfliktədirlər, münaqişədədirlər. Qorxu, həyəcan içərisində yaşayırlar. Hətta deyək ki, psixoloji durumları da normal deyil. Daimi o təzyiq hiss edirlər. Özlərinə, ailələrinə, övladlarına görə narahatdırlar. Yəni bu da o cəmiyyətdə o narazılığı yaradır ki, Netanyahu düzgün yoldan getmir. Netanyahu indi bir proqram yerinə yetirmək istəyir ki, nə qədər mümkündür daha çox torpaqları ələ keçirsin. Guya qədim yəhudi müdriklərinin planını bu yerinə yetirir. Guya belə bir missiyanı daşıyır. Amma o reallıqdan uzaq bir şeydir. O ərazi yaranıbsa, imkan verilibsə, o ərazidə nə qədər mümkündür orada yaşa, qonşularla xoş münasibətdə ol. Yəni ona görə də o yolu tutmur. Türkiyə qarşı aqressiv mövqedədir. İranla ümumiyyətlə tam qan düşmənçiliyi səviyyəsindədir. Ərəb ölkələrinin əksəriyyəti ilə görürsən ki, hansı vəziyyətədir. BMT Baş Assambleyasının iclasında danışığında zalı bir çox ölkələr tərk etdilər. Yəni insanlar belə bir nifrət mühitində yaşamaq istəmirlər. Yəni bu da Netanyahunun siyasəti ilə bağlıdır.
İsrail cəmiyyəti canlarını Netanyahudan qurtarmaq istəyir. Yəqin bu amilin təsiri altında onun reytinqi bu qədər aşağı düşüb. Əgər möcüzə baş verməsə, Netanyahu hansısa siyasi oyunları ortaya qoya bilməsə, böyük ehtimalla seçkilərdən qalib çıxa bilməyəcək. Amma orada hər şey ola bilər. Yəni istənilən cəmiyyətdə, o cümlədən yəhudi cəmiyyətində bir həftənin içərisində rəyi müəyyən şirdirmiş hadisələrlə, müəyyən yanlış təbliğatla dəyişmək olur. Amma proses bu şəkildə gedərsə, rəy sorğusunu uduzursa Netanyahunun qələbə qazanacağı ehtimalı həddən artıq azdır”-deyə A.Nağı qeyd etdi.
İradə SARIYEVA
