Məlum olduğu kimi, Bakıdan Azərbaycan Qızıl Aypara Cəmiyyəti tərəfindən Qarabağda yaşayan erməniəsilli şəxslərin ehtiyaclarını qarşılamaq üçün humanitar yardım yola salınıb. Humanitar yardım karvanında ilkin mərhələ üçün 40 ton un məmulatları var. Yardım qəbul edildiyi halda onun çeşidinin və həcminin artırlması da tamamilə gözlənilən hal hesab olunur. Yardım Ağdam-Xankəndi yolu vasitəsilə göndərilib.
Azərbaycan bununla bir daha Qarabağdakı erməniəsilli vətəndaşlarına qarşı humanitar yanaşma sərgiləyir. Azərbaycan Qızıl Aypara Cəmiyyətinin prezidenti Novruz Aslan da bildirib ki, bu addımın Xankəndidə yaşayan ermənilər və beynəlxalq ictimaiyyət tərəfindən müsbət qarşılanacağına ümid edir: “Gələcəkdə qiymətləndirmə prosesini həyata keçirə bilsək, onların digər ehtiyacı olduğu ləvazimatları da çatdıra bilərik”. Beləliklə, seçim imkanı indi ermənilərindir. “Laçın” sərhəd-buraxılış məntəqəsi yaxınlığında “humanitar böhran şousu”nun davam etdiyi bir vaxtda bu addım anti-Azəraycan qüvvələrə, o cümlədən Fransaya tutarlı cavabdır. Xatırladaq ki, Qarabağda yaşayan ermənilərə humanitar yüklərin çatdırılması ilə bağlı Ermənistan və himayədarları tərəfindən qərəzli və çirkin kampaniya aparılır. Məhz belə bir məqamda Azərbaycan Qızıl Aypara Cəmiyyəti Qarabağda yaşayan erməniəsilli şəxslərin ehtiyaclarını qarşılamaq üçün humanitar yardım göndərir. Qeyd edək ki, Azərbaycan Qızıl Aypara Cəmiyyətinin əməkdaşları və könüllüləri hər zaman milliyyət, irq, dini inanc, sinif və siyasi fikir ayrıseçkiliyi etmədən insanlara 1920-ci ildən etibarən humanitar yardım göstərib. Təşkilatın bir neçə gün əvvəl yaydığı bəyanatında da bu xüsusi vurğulanır. Bildirilir ki, təşkilat Beynəlxalq Qırmızı Xaç və Qızıl Aypara Hərəkatının tərkib hissəsi olaraq, Beynəlxalq Hərəkatın 7 fundamental prinsipini, xüsusilə “bitərəflik”, “qərəzsizlik”, “vahidlik” prinsiplərini rəhbər tutaraq, həm sülh dövründə, həm hərbi münaqişələr şəraitində, eyni zamanda, fövqəladə hallar zamanı dini etiqadından, milli mənsubiyyətindən, irqindən, siyasi baxışlarından asılı olmayaraq, insanlar arasında fərq qoymadan müharibə qurbanlarına, məcburi köçkün və qaçqınlara, minadan zərərçəkmişlərə və digər ehtiyaclı insanlara zəruri humanitar yardımlar göstərir.
Qeyd edək ki, bundan əvvəl Azərbaycan Qarabağdakı ermənilərin humanitar təminatı üçün Ağdam-Xankəndi yolundan istifadə etməyi təklif etsə də, ermənilər sülhməramlıların dəstəyi ilə alternativ yolları beton bloklar qoymaqla bloklayaraq, guya Azərbaycan tərəfindən blokadaya alınaraq “humanitar fəlakət”lə üzləşmələri ilə bağlı saxta siyasi şou yaratmağa cəhd etdilər. Halbuki, Azərbaycanın təqdim etdiyi Ağdam-Xankəndi yolu Avropa İttifaqı və Beynəlxalq Qızıl Xaç Komitəsi tərəfindən çox müsbət dəyərləndirilib. Separatçıların təşkilatçılığı ilə Xankəndidə keçirilən aksiyalar nəticəsiz qaldığına görə Ermənistan yeni ssenari hazırlamaqla beynəlxalq ictimaiyyətin diqqətini Laçın yoluna cəlb etməyə çalışdı. Ermənistan Azərbaycanla razılaşdırılmadan humanitar yük adı altında avtomobil karvanını Laçın keçid məntəqəsinin qabağına yığaraq Avropa İttifaqının missiyasını və riyakar Qərb diplomatları ora gətirməklə siyasi şou yaratmağa cəhd etdi. Halbuki, beynəlxalq normalara görə, bir dövlət digər dövlətin ərazisinə humanitar yükləri göndərmək istəyəndə qəbul edilən dövlətlə bu yardımı mütləq şəkildə razılaşdırılmalıdır. “Laçın” sərhəd keçid məntəqəsinin qarşısına avtomobil karvanının yığılması Azərbaycanın suveren ərazilərinə qarşı Ermənistanın növbəti təxribatı oldu. Bu prosesdə ona Fransa da yardım edir. Qarabağda yaşayan erməni əsilli sakinlərimizin humanitar yüklərə ehtiyacı varsa, bunu Azərbaycan özü edə bilər. Necə ki, indi edir. Azərbaycanın iqtisadi imkanları nəinki Qarabağdakı ermənilərin təminatını həyata keçirməyə , lazım gələrsə həm də Ermənistanın ümumi ehtiyacını təmin edə bilər. Azərbaycan ehtiyacı olan ölkələrə humanitar yardımlar göndərir. Belə olan halda səfalət içində batan Ermənistandan Qarabağa “humanitar yardım” adı altında yüklər göndərilməsi absurddur və başqa məqsədlər güdür. Ermənistanın Qarabağda yaşayan ermənilərə münasibətdə humanitar təzyiq üsullarından istifadə edilməsi ilə bağlı ucuz bəyanatları regionda stabilliyin pozulmasına hesablanıb. Xatırladaq ki, Azərbaycan tərəfi Ermənistanla sülh müqaviləsi imzalamaq niyyətində olduğunu bəyan edib və bununla bağlı təkliflərini də qarşı tərəfə təklif edib. Bu, əraziləri uzun illər işğal altında qalmasına baxmayaraq, ölkəmizin sülhsevər siyasət yürütdüyünü göstərir. Eyni zamanda, Azərbaycan tərəfi Ermənistanı vəziyyəti gərginləşdirəcək hər hansı təxribatçı əməllərdən çəkinməyə çağırıb. Lakin Ermənistan tərəfi Fransa kimi ağalarının diqtəsi ilə tamam fərqli mövqe sərgiləyir. İllərdir Qarabağ ermənilərini girovluqda saxlayan separatçılara dəstək verən İrəvan indi də eyni ssenari üzrə hərəkət edir. Azərbaycan öz suverenliyinə təhdid yaradacaq, qəsd edəcək hər hansı addıma yol verməyəcək. Əgər söhbət həqiqətən də yardımın çatdırılmasından gedirsə, Azərbaycan bunu göndərib. İndi seçim ermənilərindir. Ermənistan və Fransa kimi ölkələr isə fakt qarşısında qalıblar.
Samirə SƏFƏROVA
