Region ölkələri ilə müqayisədə demək olar ki, Azərbaycanda kino sənayesi tam olaraq qurulmayıb, kiçik layihələri nəzərə almasaq kino sahəsində həyata keçirilən heç bir kinonun inkişafına təkan verə bilməyib. Halbuki, dövlət büdcəsindən dövlətin hər zaman pioritet saydığı bu sahəyə kifayət qədər maliyyə də ayrılıb, ancaq dəfələrlə deyildiyi kimi bu vəsait məqsədyönlü xərclənmədiyi üçün nəticəyə nail olunmayıb. Ortada olanları isə o qədər də ciddi nəticə saymaq olmaz.
Son bir neçə aydır ki, Mədəniyyət Nazirliyi kinonun inkişafı ilə bağlı yollar arayır, yeni kinematoqrafiya konsepsiyası hazırlayıb, Milli Kino Agentliyi yaratmaq niyyətini ortaya qoyub. Adlarını çəkdiyimiz və çəkmədiyimiz layihələrin də hədəfi milli kinomuzu bataqlıqdan çıxarıb inkişafa yönəltməkdir. Çoxdan bəri idi ki, ölkəmizdə film komissiyası yaradılmasının zəruriliyi qeyd edilirdi. Nəhayət bu baş tutdu. İyunun 28-də Beynəlxalq Muğam Mərkəzində “Filming Azerbaijan” Azərbaycan Film Komissiyasının açılış mərasimi oldu.
Anar Kərimov: “Ölkəmizə sərmayələr gələcək, iqtisadi baxımdan çox əlverişli imkanlar yaranacaq”
Türkiyə Mədəniyyət və Turizm nazirinin müavini Ahmet Misbah Demircanın, Türkiyənin Mədəniyyət və Turizm Nazirliyi Kino İdarəsinin baş direktoru Erkin Yılmazın, Rusiyanın “Lenfilm” kinostudiyasının nümayəndələrinin, habelə xarici ölkələrin respublikamızdakı diplomatik nümayəndələrinin iştirakı ilə baş tutan “Filming Azerbaijan” Azərbaycan Film Komissiyasının açılışında çıxış edən mədəniyyət naziri Anar Kərimov bildirdi ki, bu komissiyanın yaradılmasında əsas məqsəd Azərbaycan dövləti üçün əsas pioritetlərdən olan kino sənayesinin inkişafına nail olmaq və kinoya vəsait cəlb etməkdir. Nazir qeyd etdi ki, Film Komissiyanın yaradılmasında əsas məqsəd xarici şirkətləri, xarici sərmayədarları Azərbaycana gətirməkdir. Nazirin sözlərinə görə, xarici şirkətlərin Azərbaycanda öz filmlərini çəkməsi üçün hər cür şərait var, onlar Azərbaycan təbiətindən, tarixi abidələrindən və sair istifadə edərək gözəl filmlər çəkə bilərlər. Nazir qeyd etdi ki, artıq bəzi dövlətlərlə əməkdaşlığa da başlanılıb. “Artıq bizim “Netflix” platforması ilə əməkdaşlığımız başlayıb. İnanırıq ki, bu əməkdaşlıq dünyaya Azərbaycanın potensialını nümayiş etdirmək üçün bir vasitə olacaq”.
Nazirin sözlərinə görə, bu yeni bir platformadır və daha çox tərəfdaşların qatqısı ilə reallaşdırılacaq, həm kino sənayemiz inkişaf edəcək, həm kino iqtisadiyyatın, turizmin vacib qoluna çevriləcək, həm də ölkəmizə vəsait cəlb ediləcək. Nazir eyni zamanda qeyd etdi ki, bütün sahələrdə olduğu kimi kino sayəsində də qardaş Türkiyə ilə sıx əməkdaşlıq ediləcək və Türkiyə təcrübəsi yaxından öyrəniləcək. “Komissiyanın məqsədi Azərbaycan kino sənayesinin dünya kino sənayesinə inteqrasiya edilməsidir və Azərbaycanın kino çəkilişi üçün cəlbedici bir məkan olduğunu göstərməkdir. Azərbaycanın həm gözəl təbiəti, zəngin tarixi, mədəniyyəti, mədəni abidələri, gözəl adət-ənənələri var. Biz bizə verilən bu nemətləri maksimum istifadə etmək üçün aparacı xarici kino şirkətlərinin Azərbaycanda çəkiliş aparması üçün Azərbaycan Film Komissiyası kimi belə bir platforma yaradırıq. Bu da imkan verəcək ki, xarici kinostudiyalar gəlib Azərbaycanda filmlər çəksinlər, beləliklə Azərbaycanı tanısınlar. Azərbaycanın turizm potensialının inkişafı ilə ölkəmizə sərmayələr gələcək, iqtisadi baxımdan çox əlverişli imkanlar yaranacaq.
İlkin Məmmədli: “Məqsədimiz ölkənin potensialını ortaya qoymaqdır”
Azərbaycan Film Komissiyasının direktoru İlkin Məmmədli isə vurğuladı ki, komissiyanın fəaliyyətə başlaması bizi beynəlxalq kino axınına qovuşduracaq: “Azərbaycan Film Komissiyasının açılışı yerli və beynəlxalq peşəkar icmalara Azərbaycanı çəkiliş məkanı kimi kəşf etmək imkanı verəcəkdir. Məqsədimiz ölkənin potensialını ortaya qoymaqdır”.
Rüfət Həsənov: “...Təşviq etməyə çalışırıq”
Mədəniyyət Nazirliyinin kinematoqrafiya şöbəsinin müdiri Rüfət Həsənov isə çıxışında bildirdi ki, komissiyanın əsas rolu Azərbaycanı kino ənənələrinə sahib bir ölkə kimi tanıtmaqdır: “Biz həm beynəlxalq kinorejissorları Azərbaycana gəlməyə və yerli kino sahəsinin istedadlı peşəkarları ilə birlikdə layihələr istehsal etmək üçün təşviq etməyə çalışırıq”.
Qeyd edək ki, “Filming Azerbaijan” Azərbaycan Film Komissiyası 2021-ci ilin yanvarında Mədəniyyət Nazirliyi tərəfindən ölkədə film çəkilişlərinə dəstək və təşviq məqsədilə yaradılıb. Qurumun missiyası Azərbaycanı film istehsalı üçün hazır və iqtisadi cəhətdən səmərəli məkan kimi tanıtmaq və ölkənin audiovzual sektorunun potensialından səmərəli istifadə etməkdir.
İradə SARIYEVA
