“İnanırıq ki, sülhə çağırışımızı BMT-nin Sivilizasiyalar Alyansı dəstəklədiyi kimi, digər beynəlxalq təşkilatlar da dəstəkləyəcəklər”
İyunun 23-də Beynəlxalq Muğam Mərkəzində Mədəniyyət Nazirliyi və tərəfdaşları tərəfindən hazırlanan “Mədəniyyət naminə sülh” adlı qlobal kampaniyanın təqdimatı keçirildi.
Yeni qlobal kampaniyanı tarixi hadisə adlandıran mədəniyyət naziri Anar Kərimov təqdimat öncəsi jurnalistlərə açıqlamasında bildirdi ki, bu tarixi təqdimatın təbliğində BMT-nin Sivilizasiyalar Alyansı (BMT SA) üzrə ali nümayəndəsi Migel Angel Moratinos bizə dəstək olacaq. “Bilirsiniz ki, Moratinos Azərbaycanda səfərdədir. Füzuli və Ağdama səfər edib və orada erməni vəhşilikləri ilə tanış olub. O bu vəhşilikləri bir faciə, şok adlandırıb. Doğrudan da o, gördüklərindən çox mütəssir olub. BMT-nin Sivilizasiyalar Alyansı (BMT SA) üzrə ali nümayəndəsi Migel Angel Moratinos cənab Prezident tərəfindən də qəbul edilib. Biz artıq “Mədəniyyət naminə sülh” adlı qlobal kampaniyaya start veririk. "Mədəniyyət naminə sülh" adlı qlobal kampaniyanın keçirilməsi tarixi hadisədir. Bu kampaniyanın əsas məqsədi Azərbaycanın işğaldan azad olunmuş ərazilərində mədəni irsin, mədəniyyətin dirçəlməsi, insanların ora qayıdışı, orada yaşamasına görə sülhün bərqərar olması üçün bir çağırışdır. Azərbaycan bu kampaniya ilə bir daha göstərir ki, əraziləri işğala, insanları etnik təmizləməyə məruz qalmasına, abidələri, evləri dağıdılmasına baxmayaraq, yenə də dünyaya sülh çağırışı edir. Biz inanırıq ki, sülhə çağırışımızı BMT-nin Sivilizasiyalar Alyansı dəstəklədiyi kimi, digər beynəlxalq təşkilatlar da dəstəkləyəcəklər və bu, qlobal bir hərəkata çevriləcək”.
Sonra isə “Mədəniyyət naminə sülh" adlı qlobal kampaniyanın təqdimatı keçirildi. Təqdimata moderatorluq edən Mədəniyyət Nazirliyinin aparat rəhbəri Vasif Eyvazzadə yeni kampaniyanın məqsədini, hədəflərini, fəaliyyət istiqamətlərini açıqladı. O bildirdi ki, mədəniyyətin sülhə verdiyi töhfələr müzakirə edilib, indi isə sülhün mədəniyyətə dəstəyi və sülh mədəniyyət üçün nə edə bilər məsələsi aktualdır.
Tədbirdə “Mədəniyyət naminə sülh” qlobal çağırışa beynəlxalq miqyasda dəstək mesajları təqdim edildi. Böyük Britaniyanın Sülh, Etimad və Sosial Münasibətlər İnstitutunun idarə heyətinin sədri, professor Maykl Hardi və İSESCO-nun baş direktoru Səlim Bin Məhəmməd Əl-Malikin videomüraciətləri nümayiş olundu.
Sonra isə mədəniyyət naziri A.Kərimov qeyd etdi ki, “Mədəniyyət naminə sülh” adlı qlobal kampaniyanı dəstəkləməsi üçün UNESCO-ya müraciət ünvanlanıb, lakin hələ də UNESCO bu təklifə cavab verməyib: “Layihənin tərəfdaş ölkələr tərəfindən dəstəklənməsi önəmlidir. Biz ümid edirik ki, bu qlobal layihə dəstək alacaq. Biz bu qlobal kampaniyanın dəstəklənməsi üçün UNESCO-ya da müraciət etmişik, amma hələ bu təşkilat tərəfindən cavab verilməyib”. Nazir digər tərəfdaşlar kimi, UNESCO-nun da öz mandatına uyğun məsələyə müsbət cavab verəcəyinə ümid edir.
Nazir qeyd etdi ki, Azərbaycan hər zaman sülhün, birgəyaşayışın təbliğatçısı olub. Azərbaycanın sülh çağırışları etdiyini və humanizmi əsas götürdüyünü deyən nazirin sözlərinə görə, Azərbaycanın sülh naminə həyata keçirdiyi qlobal layihələrin daha çox tanınmasında ölkə başçısının təşəbbüsü ilə keçirilən “Bakı prosesi”nin xüsusi rolu olub. Nazir hesab edir ki, yeni qlobal kampaniya bütün dünyada özünə dəstək qazanacaq.
İradə SARIYEVA
