Elşən Manafov: “Qlobalistlər xaricdəki erməni diasporası ilə Paşinyan iqtidarına güclü təzyiqlər edirlər”
Ermənistan Xarici İşlər Nazirliyi delimitasiya prosesinin gedişi ilə bağlı erməni mediasının sorğusunu cavablandırıb: “İrəvan və Bakı sərhədlərin demarkasiyası işinin növbəti mərhələlərinin işçi qaydada təşkili ilə bağlı fikir və təklif mübadiləsini davam etdirir”.
O da məlum olub ki, bununla bağlı Ermənistan XİN-ə 3 həftə əvvəl sorğu göndərilib, amma qurum bunu operativ cavablandırmaqdan yayınıb. Görünən odur ki, Ermənistan müxtəlif vasitələrlə delimitasiya prosesindən yayınır. Maraqlıdır, demarkasiyanın növbəti mərhələsinin müəyyən edilməsi niyə gecikir?
“Zəngəzur dəhlizi ətrafında region dövlətləri və beynəlxalq güclərin mövqeyi də, demarkasiya...”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov bunun səbəbini bir sıra amillərlə əlaqələndirdi: “Əvvəla, Ermənistanla demarkasiya prosesləri mahiyyət etibarı ilə rəsmi Bakının müəyyən etdiyi prinsiplər üzrə xeyrimizə olaraq davam edir. Məsələ ondadır ki, keçən il Azərbaycanın Qazax rayonunda əvvəllər işğal altında olan 4 kəndimiz bir güllə atılmadan azad edilib. Prezident İlham Əliyevin qeyd etdiyi kimi, biz bir güllə atmadan erməni tərəfi ilə danışıqlarda bu uğura imza atmışıq. Danışıqların gedişi Qazaxın 3 eksklav kəndinin də azad ediləcəyi fikrini söyləməyə əsas verir. O cümlədən, Sədərək rayonunun işğal altında olan Kərki kəndi də azad ediləcək. Keçən il oktyabrın 24-də Ermənistan parlamenti demarkasiya və demilitasiya ilə məşğul olacaq komitənin fəaliyyətini təsdiq edən əsasnaməni təsdiq etdikdən sonra bəlli proseslər ətrafında danışıqların daha intensiv ola biləcəyi ilə bağlı proqnozlar var idi və əsassız da deyildi. Lakin rəsmi İrəvan müxalifətin daxili auditoriyaya ünvanlanmış müraciətlərindən sonra özünün korporativ maraqlarından çıxış edərək qeyri-müəyyən mövqe sərgiləməyə başlayıb. Konstruktiv əməkdaşlıq mövqeyindən çəkinməyə başlayıb. Buna səbəb isə müxalifətin, habelə onunla iş birliyində olan erməni Qriqorian Kilsəsinin Paşinyan hökumətini Azərbaycanla danışıqlarda təslimçi mövqelərdə ittiham etməsi, hətta dövlətçiliyə və xalqa xəyanətlə bağlı çağırışları olub. Müxalifətin kilsə ilə bahəm məlum mövqeyi isə qarşıdakı seçkilərin gedişatında iqtidarın xeyrinə olmayacaq dəyişikliklərə səbəb olacaq amillər kimi nəzərdən keçirilir. Üstəlik, regionda Azərbaycanın nüfuz və təsir imkanlarının artmasından ehtiyat edən beynəlxalq güclər, ilk növbədə qlobalistlər də xaricdəki erməni diasporası ilə Paşinyan iqtidarına güclü təzyiqlər edirlər. Zəngəzur dəhlizi ətrafında region dövlətləri və beynəlxalq güclərin mövqeyi də demarkasiya proseslərində əyləc mexanizmləri rolunda çıxış edir”.
Vidadi ORDAHALLI
