Gürcüstanın üçüncü prezidenti Mixeil Saakaşvili bildirib ki, hakim partiya olan “Gürcü Arzusu” ölkənin xarici siyasətində əhəmiyyətli dəyişikliklərə səbəb ola biləcək bir sıra addımlara hazırlaşır. Onun sözlərinə görə, bu addımlar Rusiya ilə diplomatik münasibətlərin bərpasını, Abxaziya və Cənubi Osetiya ilə güc tətbiq etməmək barədə müqavilələrin imzalanmasını, Abxaziya dəmir yolunun açılmasını və Gürcüstanın neytrallığının elan edilməsini əhatə edir.
Saakaşvili bu barədə Facebook-da yazıb və məlumatı ölkə rəhbərliyinə yaxın mənbələrdən aldığını iddia edib. Keçmiş prezidentin sözlərinə görə, Moskva “Gürcü Arzusu”nun təsisçisi və fəxri sədri Bidzina İvanişvilidən daha konkret addımlar tələb edir, çünki Saakaşvilinin fikrincə, açıqlamalar, müxaliflərin həbsi və Qərbə qarşı tənqidlər artıq Rusiya tərəfi üçün kifayət deyil.
“Təzə aldığım və sizinlə bölüşmək istədiyim yeni məlumata görə, öz təslimçilik siyasəti ilə küncə sıxışan İvanişvili qarşıdakı həftə və aylarda aşağıdakı addımlara hazırlaşır: Rusiya ilə müqavilə imzalamaq, diplomatik münasibətləri bərpa etmək və Qərb əleyhinə pakt yaratmaq; Abxaziya və Sxinvalinin kukla hakimiyyətləri ilə güc tətbiq etməmək barədə müqavilə imzalamaq və müvafiq olaraq onları təbəə kimi tanımaq; Abxaziya dəmir yolunun açılması və Gürcüstanın neytrallığını elan etmək. Bütün bunların bir neçə ay ərzində həyata keçirilməsi planlaşdırılır”, - deyə Saakaşvili yazıb. Lakin keçmiş prezident iddiaları üçün dəlil təqdim etməyib və ya bu məlumatın mənbələrini dəqiqləşdirməyib. Saakaşvili həmçinin qarşıdan gələn payızın Gürcüstan üçün “həqiqət anı” olacağına inandığını bildirib. O, müxalifət qüvvələrini birləşməyə və mövcud hakimiyyətin siyasətinə qarşı çıxmağa çağırıb.
Keçmiş prezident həmçinin gürcü müxalifətini tənqid edərək, onun hərəkətlərinin cəmiyyətin bir hissəsinin məyusluğuna səbəb olduğunu iddia edib. Onun sözlərinə görə, bir çox vətəndaş İvanişviliyə müqavimət göstərməyin mümkün olmadığına inanır. "İnsanlar həmçinin İvanişvilini mənjm məğlub edə biləcəyimə inanırlar, amma eyni zamanda heç kimin məni sərbəst şəkildə Gürcüstana buraxmayacağını düşünürlər"- o deyib. Eks-prezident tərəfdarlarını mübarizədən əl çəkməməyə və qarşıdakı ayları mümkün siyasi hadisələrə hazırlaşmaq üçün istifadə etməyə çağırıb: "Bütün bunlar doğrudur, amma bu, bizə dayanıb təslim olmaq hüququ vermir. İndi ümidsizlik vaxtı deyil, həlledici payıza hazırlaşmaq vaxtıdır!"
SAMİRƏ
