Akif Nəsirli: “Bu isə həm tranzit haqları, həm logistika xidmətləri, həm də yeni investisiyalar hesabına Naxçıvanın gəlirlərinin artmasına şərait yarada bilər”
Prezident İlham Əliyev Azərbaycan Televizyasına müsahibəsində bildirib ki, istənilən halda gələn il dəmir yolu da Ermənistan sərhədinə gəlib çatacaq. Prezident Əliyev bildirib: “O ki qaldı, Naxçıvan dəmir yolunun tikintisinə, hazırda işlər gedir. Mənim göstərişimlə Nəqliyyat Nazirliyi bu işlə məşğuldur. Azərbaycan Dəmir Yolları Ordubad istiqamətində inşa işlərinə başlamışdır və olmayan hissələr yenidən tikiləcək. İki hissə mövcud deyildi, hər ikisi də Ermənistan sərhədinə yaxındır - biri Ordubad, ikincisi isə Sədərək rayonlarının ərazisindədir. Hər iki hissənin uzunluğu o qədər də böyük deyil, təqribən 3-5-7 kilometrdir. Qalan dəmir yolu isə prinsipcə işlək vəziyyətdədir və bu gün də ondan istifadə edilir və edilə bilər. Sadəcə olaraq, bu gün mövcud olan dəmir yolunun yükaşırma qabiliyyəti 1,5 milyon tondur. İlkin mərhələ üçün Zəngəzur dəhlizinin və ümumiyyətlə, Şərq-Qərb dəhlizinin bir qolu olan bu yolun fəaliyyətə başlaması kifayətdir. Amma bizim istəyimiz ondan ibarətdir ki, bu nəqliyyat dəhlizindən ən azı 15 milyon ton yük keçsin. Onun üçün bu gün mövcud olan dəmir yolu yenidən qurulmalıdır, reabilitasiya edilməlidir. Bu gün mənə verilən məlumat və təqdimat çox vacib idi. Mənim də göstərişlərim ondan ibarət idi ki, vaxt itirmək lazım deyil, Azərbaycan öz vəsaiti hesabına bu dəmir yolunu tam işlək və 15 milyon ton yükaşırma qabiliyyətinə malik olan vəziyyətə çatdıra bilər və çatdırmalıdır".
Bunun Naxçıvana faydası nə olacaq?
Ekspertlərə görə, ildə 15 milyon ton yükün Zəngəzur dəhlizindən keçməsi onun Naxçıvanın üstündən keçməsi deməkdir və Naxçıvan buradan böyük gəlir götürəcək.
Liberal İqtisadçılar Birliyinin rəhbəri Akif Nəsirli baki-xeber.com-a bildirdi ki, Zəngəzur dəhlizinin Naxçıvan üzərindən tam gücü ilə fəaliyyətə başlaması muxtar respublikanın iqtisadiyyatı üçün ciddi imkanlar yarada bilər. “İllik 15 milyon tona qədər yükün Naxçıvandan keçməsi bölgəni sadəcə tranzit ərazidən mühüm logistika qovşağına çevirə bilər. Bunun nəticəsində yükdaşıma, logistika, anbar, gömrük, sığorta, servis və digər xidmət sahələrində yeni biznes imkanları formalaşacaq.
Naxçıvanın burada əsas üstünlüyü onun coğrafi mövqeyidir. Muxtar respublika Azərbaycanla Türkiyə arasında ən mühüm quru bağlantı nöqtələrindən birinə çevrilə, Şərq-Qərb nəqliyyat marşrutunda əlavə tranzit imkanları qazana bilər. Bu isə həm tranzit haqları, həm logistika xidmətləri, həm də yeni investisiyalar hesabına Naxçıvanın gəlirlərinin artmasına şərait yarada bilər”.
A.Nəsirli vurğuladı ki, 15 milyon tonluq potensial yalnız dəmir yolunun özündən gəlir əldə etmək demək deyil, bu həcmdə yük axını ətrafında logistika mərkəzləri, yük terminalları, anbar kompleksləri, gömrük və xidmət infrastrukturu, təmir-servis müəssisələri yarana bilər. “Nəticədə yeni iş yerlərinin açılması və yerli sahibkarlığın genişlənməsi mümkündür.
Daha mühüm məqam isə Naxçıvanın iqtisadiyyatının şaxələndirilməsi ilə bağlıdır. Tranzit imkanlarının genişlənməsi regionda sənaye və emal müəssisələrinin yaradılmasına, yerli məhsulların Türkiyə və digər bazarlara çıxarılmasının asanlaşmasına da təkan verə bilər. Yəni dəhliz Naxçıvan üçün yalnız yol deyil, yeni iqtisadi fəaliyyət platforması rolunu oynaya bilər.
Bu baxımdan dəmir yolunun 1,5 milyon tondan 15 milyon ton yükaşırma qabiliyyətinə çatdırılması Naxçıvan üçün böyük iqtisadi potensial deməkdir. Əsas məsələ isə bu tranzit imkanından maksimum istifadə etmək, yük axınının yalnız Naxçıvandan keçməsini deyil, onun yaratdığı əlavə dəyərin mümkün qədər böyük hissəsinin regionda qalmasını təmin etməkdir. Belə yanaşma Zəngəzur dəhlizini Naxçıvanın iqtisadi inkişafını sürətləndirən əsas layihələrdən birinə çevirə bilər”-deyə A.Nəsirli bildirdi.
İradə SARIYEVA
