Milli Mətbuat 148 il əvvəl – 22 iyul 1875-ci ildə Həsən bəy Zərdabi tərəfindən ilk çap nəşri - "Əkinçi"nin buraxıldığı o müdhiş və o möhtəşəm günün təfərrüatları ilə pərvəriş tapıb. O dövrdən etibarən, mətbuat hər bir dövlətin xüsusi hakimiyyəti kimi xarakterizə edir. Məhz Azərbaycanda da Millli Mətbuatın dördüncü hakimiyyət hesab olunması bu zəruri prosesin əyani təzahürüdür.
Mətbuat həmişə azad və demokratik missiyanın, insanların düşüncə və sözlərinə hörmətin, yeniləşən informasiya vasitəsilə operativ məlumatlandırmanın, plüralizm və tolerantlıq ideyalarının daşıyıcısı olub. Bu gün də mətbuat Azərbaycanda bir çox proseslərin şəffaflığı və hakimiyyətin fəaliyyətinin yaxşılaşdırılması istiqamətində başlıca rol oynayır.
Bilirik ki, Azərbaycan artıq qlobal informasiya sisteminə qoşulub. Bir çox demokratik ölkələrdə olduğu kimi, ölkəmizdə də "Mətbuat haqqında" Qanun qəbul edilib. Azad mətbuatın inkişafı, iqtisadi müstəqilliyin təmin edilməsi, reklam bazarında müəyyən nöqsanların aradan qaldırılması, sosial vəziyyətin yaxşılaşdırılması məqsədilə xüsusi proqram hazırlanıb.
Həmçinin, ölkəmizdə insan hüquqları, siyasi plüralizm, vətəndaş cəmiyyətinin mövcudluğu demokratik institut kimi formalaşdırılmış müstəqil kütləvi informasiya vasitələrinin fəaliyyətində, onların inkişafı üçün yaradılan hüquqi təminatlarda öz təsdiqini tapır.
Ən əsası, bu gün Azərbaycanda azad söz, azad mətbuat, dəyərli, istedadlı söz və qələm sahibləri var. Dövlətimiz mətbuata böyük dəyər verir. Konstitusiyaya əsasən söz, məlumat toplamaq, fikirlərin azad ifadə edilməsi və digər azadlıqlar möhkəmləndirilib.
Ümummilli Lider Heydər Əliyevin 1998-ci il 16 avqust tarixli "Azərbaycan Respublikasında söz, düşüncə və informasiya azadlığının təmin edilməsi tədbirləri haqqında" fərmanı ilə ölkədə kütləvi informasiya vasitələri üzərində senzura ləğv edilib. Bu fərman kütləvi informasiya vasitələrinin sürətli inkişafına ciddi təkan verməklə yanaşı, onların rasionallığının artırılması sahəsində geniş Dövlət Proqramının əsas istiqamətlərini müəyyən edib.
Səmimi etiraf edim ki, “Bakı-Xəbər” qəzeti də 20 ildir azad mətbuata dair həqiqətlərə güzgü tutur, özünün ictimai-mətbu əsaslarını müəyyən edir. Qəzetdə həmişə dövlət ənənələrinə geniş yer verilib, ictimai proseslər qabarıq ehtiva edilib. Bir növ, redaksiya üzərinə götürdüyü məsuliyyəti qanunla müəyyən edilmiş hallara uyğun təsbit edib, kollektiv dövlətçiliyimizin inkişafına zəmin verən mətbu dəyərləri ictimai işin məqsədi bilib.
Bir sözlə, “Bakı-Xəbər” qəzeti tanınmış jurnalist və ictimai xadim Aydın Quliyevin bilavasitə rəhbərliyi altında ötən 20 ildə cəmiyyət resurslarını ideoloji proses kimi xarakterizə edib, jurnalistikanın – medianın inkişafı üçün səylərini əsirgəməyib.
Xoş haldır ki, “Bakı-Xəbər” qəzeti özünün ictimai və dövlət ənənələrini bu gün də inamlı şəkildə sərgiləyir. Milli-mənəvi dəyərlərə qayıdış qəzetin məram və məqsədində özünü aşkar göstərir.
Mətbuata, media işinə xüsusi önəm verən “Bakı-Xəbər”çilər hazırda da Zərdabi ənənələrini inamla davam etdirir, söz azadlığı proseslərini jurnalistika dəyərləri ilə ehtiva edirlər. Fürsətdən istifadə edib hörmətli Aydın Quliyev başda olmaqla, bütün “Bakı-Xəbər”çiləri qəzetin 20 illik fəaliyyəti - yubileyi ilə əlaqədar təbrik edir, onlara daim sözün xidmətində şərəflə durmaq ucalığı arzulayıram.
Nəzakət Məmmədova, Respublika Xatirə Kitabı redaksiyasının və “Yada düşdü” jurnalının Baş redaktoru
