Paşinyan yenə bir-birinə zidd iki bəyanatla çıxış edib. Əvvəlcə o, Qarabağdakı separatçıları qondarma “müstəqillik günü” ilə bağlı təbrik edib. Daha sonra onun İtaliya mediasına müsahibəsində dedikləri Ermənistanın sülh sazişi imzalamaqdan uzaq olduğunu göstərir. O, səhər başqa, axşam başqa söz deməklə prosesi uzada biləcəyini düşünür.
Nikol Paşinyan İtaliyanın “La Repubblica” qəzetinə müsahibəsində deyib:
“Əgər Ermənistan və Azərbaycan Almatı bəyannaməsinə əsaslanaraq bir-birinin ərazi bütövlüyünü qarşılıqlı şəkildə tanımasa, bu heç vaxt sülhün olmayacağı anlamına gəlir.
“Dağlıq Qarabağ”dakı vəziyyət həmişə “Dağlıq Qarabağ hakimiyyəti”nin nəzarətində olub. Ən azı 2018-ci ildən bəri belədir. Və bu gün də Dağlıq Qarabağdakı vəziyyətə “Dağlıq Qarabağ”dan seçilmiş nümayəndələr nəzarət edir, orada Rusiya sülhməramlıları da var.
Söhbət tamamilə fərqli bir şeydən gedir. Əgər Ermənistan və Azərbaycan Almatı bəyannaməsinə əsaslanaraq bir-birinin ərazi bütövlüyünü qarşılıqlı şəkildə tanımazsa, bu, heç vaxt sülhün olmayacağı anlamına gəlir”.
Qeyd edək ki, Azərbaycanın ərazi bütövlüyünü tanımasından bəhs edən Paşinyan “Dağlıq Qarabağ hakimiyyəti” sözləri ilə öz-özünü təkzib edir.
Paşinyan bir tərəfdən Azərbaycanın ərazi bütövlüyünü tanıdığını bəyan edir, digər tərəfdən isə qondarma qurumun yaranmasının növbəti ildönümünü publik olaraq təbrik edir. Bu ikiüzlü siyasətə dünya birliyinin reaksiyası necə olmalıdır?
Azad Vətən Partiyasının sədri Akif Nağı “Bakı-Xəbər”ə açıqlamasında deyib ki, Paşinyanın bu cür ziddiyyətli mövqe tutması artıq adi haldır: “Əsas da bu onların vəziyyəti ilə bağlıdır. Əvvəla, onların sülh bağlamaq niyyəti yoxdur. Çünki məğlub durumdadırlar. İndiki şəraitdə onların sülh sənədini imzalaması kapitulyasiyaya bərabər bir şeydir. Sözdə deyirlər ki, sülh imzalayaq, Azərbaycanın ərazi bütövlüyünü tanıyırıq. Ancaq hərəkətə keçəndə prosesi pozmağa çalışırlar. Bir tərəfi bununla bağlıdır. Digər tərəfi isə Laçın yolu uğrunda mübarizə aparmalarıdır. Onlar üçün əhəmiyyətli bir məsələdir bu. Çünki ermənilər çalışırlar ki, Qarabağda ermənilərin hərbi - siyasi mövcudluğunu qoruyub saxlasınlar. Əgər hərbi - siyasi mövcudluq qorunub saxlanırsa, Ermənistanla quru əlaqəsi olmalıdır. Onlara görə çox vacib şərtdir bu. Onların bu mövqeyini isə Amerika da, Rusiya da müdafiə edir. Rusiyanın öz maraqları var ki, ermənilərin hərbi - siyasi maraqları orda saxlanılsın. Amerika da birmənalı şəkildə Ermənistanın istəklərinə uyğun proseslərin getməsini istəyir. Bu şəkildə müqavimət göstərirlər. Amma Azərbaycanın Laçın yolunda post qurması, nəzarət buraxılış məntəqəsini qurması onların bütün planlarını pozdu. Onlar Laçın yoluna eksterritorial hüquq vermək istəyirdilər. Yəni Ermənistanın nəzarətində olan bir ərazi olsun. Azərbaycanın nəzarətində olmasın, Ermənistandan Qarabağda yaşayan ermənilərlə heç bir maneə olmadan əlaqələr saxlanılsın. Ona görə də belə müqavimət göstərirlər, bütün dünyada aksiyalar keçirirlər, ayrı - ayrı dövlətlərin mövqe bildirməsinə nail olurlar. Bütün imkanlarını səfərbər edirlər ki, prosesi pozsunlar və Azərbaycanın Laçındakı postu ləğv olunsun. Azərbaycan da bu təzyiqləri görür. Ona görə də, bu təzyiqləri neytrallaşdırmaq üçün ağıllı hərəkət edirlər və variantlar ortaya atırlar. Mən belə hesab edirəm ki, Ağdam - Xankəndi yolu ermənilərin Azərbaycana qarşı hücumunun qarşısını almaq üçün bir vasitədir. Ermənilər onsuz da Ağdam - Xankəndi yoluna razılaşmayacaqlar. Ona görə də, Azərbaycan bilərəkədən ki, razılaşmayacaqlar, onları bu şəkildə sual qarşısında qoyur. Vəziyyət bu şəkildədi. Paşinyan hələ oynayacaq. Bu gün bir söz deyəcək, sabah arxasından qaçaçaq. Hətta hər hansı bir sənədi imzalasa da, əməl etməyəcəyi bəllidir. Onların vəziyyəti elədir ki, verdikləri sözün üstündə durmağı, hər hansı imzaladaqları sənədə əməl etməyi onlardan gözləmək mənasızdır”.
Məhəmmədəli QƏRİBLİ
