Xocalının Meşəli kəndindəki soyqırım, işgəncə və talanda iştirak edən Vaqif Xaçaturyan “Laçın” postunda yaxalanaraq Bakıya gətirilib. 25 azərbaycanlının qətlə yetirilməsində, 14 nəfərə işgəncə verilməsində, 358 nəfərin yurdundan qovulmasında iştirak edən V.Xaçaturyanın mühakiməsi, cəzalandırılması ilə bağlı müəyyən fikirlər də səslənir.
Məsələn, millət vəkili Nəsib Məhəməliyev təklif edir ki, Vaqif Xaçaturyan üzərində məhkəmə açıq şəkildə, onlayn rejimdə aparılsın və ora erməni cəlladlarına xüsusi sevgisi ilə seçilən ölkələrin nümayəndələri dəvət olunsun.
Millət vəkilinin məlum təklifi ictimai xadimlər, siyasilər tərəfindən yüksək dəyərləndirilir.
Tural İsmayılov: “Xaçaturyanın qatı cinayətkar və cəllad olması nəzərə alınaraq onun məhkəmə görüntülərindən bəzi hissələr ictimailəşə bilər”
Siyasi şərhçi Tural İsmayılov “Bakı-Xəbər”ə açıqlamasında qeyd etdi ki, bununla bağlı qərar Azərbaycanın özü tərəfindən verilə bilər: “Məlumdur ki, Vaqif Xaçaturyan Meşəli və Xocalı soyqırımında iştirak edən qəddar cinayətkarlardan biridir. Beynəlxalq hüquq prizmasından baxılanda da o tək Azərbaycan qanunlarını pozmayıb. Etnik nifrət, faşizm kimi zərərli ideologiyaların daşıyıcısına çevrilmiş bu şəxs normalda heç bir dünya dövləti tərəfindən müzakirəyə çıxarılmamalıdır. Ancaq biz görürük ki, Vaqif Xaçaturyanın Birinci Qarabağ müharibəsi dövründə işlədiyi cinayətləri araşdırmayan, məlumatsız olan bəzi fransız siyasətçiləri Xankəndidəki separatçıların toruna düşərək əsassız ittihamlar irəli sürür”.
Həmsöhbətimiz onu da əlavə etdi ki, Azərbaycanda məhkəmə proseslərinin keçirilməsi ilə bağlı bir qayda var. Bu qaydaya da əməl edilir. Lakin V.Xaçaturyanın qatı cinayətkar və cəllad olması nəzərə alınaraq onun məhkəmə görüntülərindən bəzi hissələr ictimailəşə bilər. Ancaq bu, məhkəmə hüquq sisteminin verə biləcəyi bir qərardır.
Əliməmməd Nuriyev: “Türk və müsəlman olduğuna görə insanları məhv edənlər qanun qarşısında cavab verilməlidir, Xaçaturyanın məhkəməsi də açıq olmalıdır”
Konstitusiya Araşdırmaları Mərkəzinin rəhbəri Əliməmməd Nuriyev bildirdi ki, Azərbaycan məhkəmələrində iclaslar açıq keçirilir: “Yalnız bir neçə istisna hal var. Dövlət sirri və ailə məsələləri ilə bağlı məhkəmələrin müəyyən hissəsi qapalı ola bilər. Xaçaturyanın əməlləri bəşəriyyət və insanlıq əleyhinə cinayətdir. Soyqırım cinayətlərinə yol vermiş şəxslərin məhkəməsi bu siyasəti hazırlayan şəxslər üçün görk olmalıdır. Heç kəs ədalət məhkəməsindən kənarda qala bilməz. Türk və müsəlman olduğuna görə insanları məhv edənlər qanun qarşısında cavab verilməlidirlər. Xaçaturyanın məhkəməsi də açıq olacaq. İstənilən ölkənin nümayəndəsi müdafiə etdikləri ermənilərin hansı cinayətkar fəaliyyətlə məşğul olduqlarını gəlib görə bilər. Yetəri qədər sübut və faktlar var”.
Ə.Nuriyev hesab edir ki, cinayətkarlara qarşı mübarizədə İsrail metodundan istifadə edilə bilər: “Yəhudilərə qarşı soyqırım cinayəti törədən qatillər bu gün də harada olmalarından asılı olmayaraq ya məhkəməyə çıxarılır, ya da yerindəcə məhv edilirlər. Fransanın hazırkı hakimiyyəti də ermənilərin azərbaycanlılara qarşı keçirdiyi soyqırım cinayətlərində birbaşa iştirakçılardan biridir. Hesab edirəm ki, BMT Təhlükəsizlik Şurasında Fransanın hazırkı rəhbərliyinin soyqırımı müdafiə etdiyi üçün beynəlxalq tribunala verilməsi məsələsini də qaldırmalıyıq”.
Günel CƏLİLOVA
