Ermənistan-Azərbaycan münasibətləri ilə bağlı yanlış təsəvvürlərin ən başlıca səbəbi ikili standartlardan qaynaqlanır. Yəni başqa sözlə desək, beynəlxalq birlik, əslində nə baş verdiyini yaxşı bilsə də, bir çox hallarda xristian təəssübkeşliyindən və erməni diasporunun alətinə çevrilmək səbəbindən anti-Azərbaycan mövqeli bəyanatlar səsləndirir.
Misal olaraq son günlərdə baş verən “humanitar yük” şousunu göstərə bilərik. 2014-cü ildə Rusiya Donetsk və Luqanska humanitar maşın karvanı göndərmək istəyəndə ABŞ, BMT, ATƏT və digərlər dərhal bəyanatlarla çıxış edərək Rusiya tərəfindən atılan bu addımı Ukraynanın ərazi bütövlüyünə və suverenliyinə təhdid olaraq qiymətləndiridilər. Onlar bildirirdi ki, humanitar yüklərin daşınması Ukrayna ilə razılaşdırılmayıb və Ukrayna tərəfinin icazəsi olmadan belə bir addımın atılması qətiyyən yolverilməzdir. İndi də eyni şey Ermənistan tərəfindən edilir. Azərbaycanla razılaşdırılmadan ermənilər guya Qarabağda “humanitar fəlakətin” qarşısını almaq üçün onlara yardım aparmaq adı ilə çıxış edirlər. Lakin bu dəfə beynəlxalq birlik 2014-cü ilə sərgilədiyi mövqeyi, yəni Ukraynaya göstərdikləri münasibəti göstərmirlər. Əksinə, o mövqedən çıxış edirlər ki, bu mövqe Azərbaycanın ərazi bütövlüyünə və suverenliyinə birbaşa təhdiddir. Odur ki, ikili standartların olması fakt olaraq ortadadır.
Müdafiə deyil, hücum diplomatiyası həyata keçirilməlidir
Amma bu yeganə səbəb deyil. Digər bir səbəb də bizim hələ də beynəlxaq birliyə real həqiqətləri çatdıra bilməməyimizdən qaynaqlanır. Belə ki, erməni təbliğatına uyaraq Azərbaycan əleyhinə çağırış edən dövlətlər içərisində ölkəmizlə strateji tərəfdaşlıq müqaviləsi olanlar da var. Bu isə o deməkdir ki, biz hələ də real həqiqətləri çatdıra bilmirik, erməni yalanlarını ifşa etmək üçün yetərli qədər fəaliyyət göstərmirik. Burada həm xarici siyasət qurumlarımızın, həm diaspor təşkilatlarımızın, o cümlədən də beynəlxaq səviyyəyə çıxa bilən media qurumlarımızın üzərinə böyük məsuliyyət düşür.
Həqiqətlərin çatdırılması, beynəlxalq müstəvidə erməni yalanlarının ifşası epizodik olaraq həyata keçirilməməlidir. Azərbaycan həqiqətlərinin təbliği mütəmadi və davamlı xarakter almalı və nəhayət ki, müdafiə deyil hücum diplomatiyası həyata keçirilməldiir. Uzun illər ərzində erməni yalanının girovuna çevrilmiş, erməni media qurumlarının və diaspor təşkilatlarının alətinə çevrilmiş ayrı-ayrı dövlətlər və beynəlxaq təşkilatlarla iş üçün ayrıca proqramın qəbuluna ehtiyac var. Həqiqətləri çatdıra bilmək üçün hər kəs üzərinə düşən vəzifəni icra etməlidir.
Norveç doğumlu, əslən cənubi azərbaycanlı xanım qələmə aldığı yazıda…
Bildiyiniz kimi, dünya Azərbaycanın Ermənistan ilə dövlət sərhədində “Laçın” dövlət sərhədindən buraxılış məntəqəsini yaratması ilə erməni yalanlarının yeni dalğasına şahid olmağa başladı. Yalana “həqiqət donu” geyindirərək dünyaya sırımağa çalışan ermənilərin həyasızlığına və məkrliyinə dair tarixdə saysız-hesabsız nümunələr var. Lakin təəssüf doğuran hal odur ki, dünya ictimaiyyəti ermənilərin bu manipulyasiyalarına və yalanlarına nəinki inanır, hətta bəzən onun fəal iştirakçısına, alətinə çevrilir. Çox təəssüf ki, bu hala beynəlxalq ictimaiyyətin ermənilərin Azərbaycanın Qarabağdakı erməni əhalisinin guya “blokada”da qalması və “humanitar fəlakət” hay-küyünə qulaq verməsində bir daha şahid oluruq. Lakin yalan ayaq tutar, yeriməz deyirlər. Qarabağdakı ermənilərin bu yalanları elə onların özləri tərəfindən biabırçı formada üzə çıxarılır. Norveçin nüfuzlu “Aftenposten”, “Klassekampen” və “Utrop” kimi qəzet və jurnallarında, habelə kütləvi informasiya vasitələrində dərc olunan yazılarda “Azərbaycana qarşı əsassız ittihamlar irəli sürülür”, “Qarabağın lənəti” və “Qarabağ: Blokada şəraitində dəbdəbli istiqamət?” sərlövhəli məqalələrində Qarabağdakı ermənilərin guya “humanitar fəlakət”lə üzləşmələri barədə erməni yalanlarından bəhs edilib. Məqalənin müəllifi, Norveç doğumlu, əslən cənubi azərbaycanlı, qadın geyimi brendinin yaradıcısı, modelyer-dizayner, “CAN” diaspor təşkilatının sədri Şervin Nəcəfpurun qələmə aldığı yazıda “Laçın” dövlət sərhədində buraxılış məntəqəsinin yaradılmasından sonra Qarabağdakı ermənilərin guya blokadada qalmaları barədə əsassız iddiaları müəllifin topladığı, Qarabağdakı ermənilərin gündəlik həyatları ilə bağlı sosial şəbəkələrdəki paylaşımları ilə alt-üst edilib.
Azərbaycanın mənafeyi üçün gördüyü yaxşı işlər onların hər biri üçün nümunə olmalıdır
Məqalələrdə vurğulanıb ki, Azərbaycana qarşı guya Qarabağdakı erməni əhalisini qida, su, dərman, yanacaq və elektrik enerjisi ilə təmin olunmadan dünyanın qalan hissəsindən təcrid etməsi ilə bağlı əsassız ittihamlar irəli sürülür. Lakin Azərbaycan ermənilərin bütün ehtiyaclarını ödəməyə hazırdır. Azərbaycan Qarabağa malların daşınması üçün Ağdam rayonu ilə Xankəndi arasındakı açıq yoldan istifadə olunmasını təklif edir. Lakin bu təklifi qəbul etməyən ermənilərin “humanitar böhran” və “blokada” iddialarının sırf siyasi manipulyasiya olduğu xüsusi vurğulanıb. Ermənistan KİV-lərinin, eləcə də ermənilərin bəzi havadarlarının da bu siyasi manipulyasiyalardan faydalanmağa və erməni yalanlarını daha da şişirtməyə çalışdıqları bildirilib.
Ş.Nəcəfpurun Qarabağın erməni sakinlərinin gündəlik həyatları ilə bağlı sosial şəbəkələrdən topladığı paylaşımlar onların “blokada” şəraitində yaşamaları, “humanitar fəlakət” ilə üzləşdikləri yalanlarını tamamilə ifşa edir.
Hazırda milyonlarla azərbaycanlı dünya üzrə müxtəlif ölkələrdə yaşayır. Məhz, Şervin və onun timsalında digər vətəninə, xalqına bağlı olan azərbaycanlıların Azərbaycanın mənafeyi üçün gördüyü yaxşı işlər onların hər biri üçün nümunə olmalıdır. Ermənilərin azğın və böhtan dolu təbliğatı qarşısında yalnız onların cəmləşərək yaratdıqları sipər mühüm təsir vasitələrindən biri ola bilər.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
