Xəbər verildiyi kimi, Fransa Prezidenti Emmanuel Makron Prezident İlham Əliyevə zəng edib. Telefon danışığı əsnasında regiondakı vəziyyət, Ağdam-Xankəndi və Laçın-Xankəndi yollarının açılması məsələsi müzakirə olunub.
Dövlət başçısı bildirib ki, Ağdam-Xankəndi yolunun istifadəsinə məqsədyönlü şəkildə Ermənistan və onun Azərbaycanın Qarabağ bölgəsində yaratdığı və dəstəklədiyi qondarma rejim tərəfindən süni əngəllər yaradılır və bundan siyasi manipulyasiya məqsədilə istifadə edilir.
Prezident İlham Əliyev qeyd edib ki, Ermənistan və qondarma rejim Beynəlxalq Qırmızı Xaç Komitəsinin vasitəçiliyi ilə Ağdam-Xankəndi yolu ilə yüklərin daşınması barədə əldə olunmuş ilkin razılaşmadan imtina edib. Həmçinin Ermənistan rəhbərliyi Azərbaycan tərəfi ilə razılaşdırmadan dövlət sərhədi istiqamətinə humanitar təyinatlı olduğunu iddia etdiyi yüklər gətirib ki, burada məqsəd siyasi möhtəkirlikdir. Dövlət başçısı Azərbaycanın Qarabağın erməni əhalisinin təmsilçilərinin reinteqrasiya məsələlərini müzakirə etmək üçün paytaxt Bakıya və Azərbaycanın digər şəhərlərinə dəvət etdiyini, ancaq onların bundan da imtina etdiklərini və məqsədyönlü şəkildə vəziyyətin guya humanitar gərginlik xarakteri daşıdığını təqdim etməyə çalışdıqlarını bildirib. Prezident İlham Əliyev qeyd edib ki, Ağdam-Xankəndi yolu açıldıqdan sonra Azərbaycanın gömrük və sərhəd rejimi qaydalarına riayət edilməklə Laçın-Xankəndi yolundan istifadə edilə bilər.
Makron vəziyyətin sabitləşdirilməsi və mövcud gərginliyin aradan qaldırılması üçün Fransanın da öz tərəfindən töhfə verməyə hazır olduğunu bildirib, Fransanın və Azərbaycanın aidiyyəti qurumlarının təmaslarının davam etdirilməsini təklif edib.
“Telefon danışığında Əliyevin Azərbaycanın mövqeyini qətiyyətli şəkildə ortaya qoyması önəmli hadisədir”
Ümumilikdə, iki ölkə başçısının telefon zəngini ekspertlər necə dəyərləndirir?
Sözügedən məsələni “Bakı-Xəbər”ə şərh edən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynovun fikrincə, telefon danışığında Prezident İlham Əliyevin Azərbaycanın mövqeyini qətiyyətli şəkildə ortaya qoyması önəmli hadisədir: “Əvvəla, Fransanın anti-Azərbaycan siyasəti səngimək bilmir. İstər qlobal, istərsə də regional müstəvidə bu, son vaxtlar özünü daha çox göstərir. Makron və onun komandasının Azərbaycana məlum münasibəti həm də belə qənaətə gəlməyə əsas verir ki, mövcud davranış Fransanın Cənubi Qafqazdakı planları ilə bağlıdır. Fransa daxilində mövcud olan erməni diasporu İkinci Qarabağ müharibəsindən sonra yaranmış yeni reallığı qəbul etmir. Fransa da buna alət olur. Makronun əsas marağı erməni diasporunu əldən buraxmamaq və məhz həmin diaspordan istifadə etməklə Cənubi Qafqazda Fransanın maraqlarını təmin etməkdir. Bu məsələdə Fransa Qarabağ separatçılarından bir alət kimi istifadə edir. O da məlumdur ki, Makron birinci dəfə deyil Əlyevə zəng edir. Xüsusən də 44 günlük müharibə dövründə və ondan sonra Makron bir neçə dəfə Prezident İlham Əliyevə zəng edib. Ancaq hər dəfə Əliyev tutarlı mövqe ortaya qoyaraq Azərbaycanın maraqlarını müdafiə edib. Bu dəfə də bunun şahidi olduq. Bu, Fransa diplomatiyasında yeni bir hal deyil. Azərbaycan da Parisin yalançı sözlərinə inanan deyil. Ona görə də Makronun Əliyevlə danışıqları Azərbaycan-Fransa münasibətlərindəki Ermənistanla bağlı təməl mübahisələrə son qoymaqdan uzaqdır. Fransanın niyyəti Azərbaycan-Ermənistan münasibətləri üzərindən informasiya şəraiti yaratmaq, bununla özünün rolunu beynəlxalq gündəmdə təbliğ etməkdir. Ancaq Fransanın Cənubi Qafqazda siyasi mövqelərini gücləndirmək istəyi nəticəsiz qalacaq. Çünki Cənubi Qafqaz nə Afrika, nə də Aralıq dənizi regionudur. 44 günlük Vətən müharibəsindən sonra yaranan yeni reallıqlara əsasən mövcud geosiyasi prosesləri diqtə edən tərəf Azərbaycan-Türkiyə tandemidir. Ona görə də Fransanın bu kimi siyasi təxribatları onların xeyrinə olmayacaq. Prezident İlham Əliyev apardığı məqsədyönlü, uğurlu siyasəti ilə Fransanın bütün məkrli oyunlarını neytrallaşdıracaq”.
Vidadi ORDAHALLI
