Azərbaycan Qızıl Aypara Cəmiyyətinin Xankəndiyə göndərdiyi iki yük maşını (40 ton) həcmində humanitar yükün Ağdam-Xankəndi yolundan keçməsinin qarşısını almaq üçün toplaşan bir qrup erməninin kimliyi üzə çıxıb.
Erməni mediası xəbər verir ki, rus sülhməramlıların Ağdam-Xankəndi yolundakı postuna yaxınlaşan ermənilər ora rusiyalı milyarder, bir müddət öncə xüsusi missiya ilə Xankəndiyə göndərilmiş Ruben Vardanyanın yaratdığı “ictimai” təşkilatın (“Qarabağ Təhlükəsizlik və İnkişaf Cəbhəsi”) üzvləridir və bura təşkilatın təşəbbüsü ilə (Vardanyanın tapşırığı ilə) gəliblər. Başqa sözlə desək, Azərbaycan Qızıl Aypara Cəmiyyətinin TIR-larının Xankəndiyə daxil olmasına qarşı aksiyanı Vardanyan keçirir.
Bildirilib ki, əraziyə toplaşan onlarla erməni gənc artıq çadırlar qurmağa başlayıb, gecə-gündüz növbə çəkməyi düşünürlər.
Aksiyanı Vardanyan keçirirsə, deməli Rusiyanın da buna razı olmadığı üzə çıxırmı?
Politoloq Rəşad Bayramov “Bakı-Xəbər”ə açıqlamasında bildirdi ki, ermənilər tərəfdən yolun kəsilməsi birbaşa Rusiyanın razılığı ilə baş verib: “Dünən erməni mediasında sülhməramlı kontingentin komandirlərindən birinə istinadən deyilən xəbərlər də bunu təsdiq edir. Xəbərdə bildirilirdi ki, Azərbaycanın yük karvanına, yəni humanitar yükə həmin ərazidən keçməsinə imkan verilməyəcək. Bütün bunlar onu göstərir ki, guya ermənilər tərəfindən təşkil opunan həmin aksiyalar birbaşa Rusiyanın nəzarətində və icazəsi ilə keçirilir. Məlumdur ki, son bir həftədir Xankəndində separatçı rejim arasında kəskin qarşıdurma mövcuddur. Vardanyanın, Babayanın tərəfdarları arasında qarşıdurma var. Araiklə Ruben Vardanyanın aralarında da qarşldurma var. Amma nə olmasından, yolun kim tərəfindən bağlanmasından asılı olmayaraq, bir şey dəqiqdir ki, bu gün separatçı rejimin, Ermənistanın və onun havadarlarının uzun müddətdir apardıqları humanitar fəlakət şousu artıq iflasa uğrayır. Əgər doğurdan da humanitar fəlakət, ərzaq çatışmazlığı,un və un məmulatlarına ehtiyac varsa, Azərbaycan da həmin məhsulların ora çatdırılması ilə bağlı müvafiq addımlar atırsa, bu o deməkdir ki, hər hansı bir humanitar fəlakətdən söhbət gedə bilməz. Məqsəd yalnız problemin qalması, münaqişənin gərginləşməsi və nəticə etibarı ilə Azərbaycanla Ermənistan arasında münasibətlərin normallaşması ilə bağlı həyata keçirilən fəaliyyətin dondurulmasıdır. Bu gün nə Rusiya, nə də Cənubi Qafqazın öz maraqlarını təmin etmək istəyən digər güclər, xüsusən də Fransa Azərbaycanla Ermənistanın münasibətlərinin nornallaşmasında maraqlı deyillər. Ona görə də, bütün istiqamətdə, beynəlxalq təşkilatlar, ayrı - ayrı dövlətlərin bəyanatları səviyyəsində faktiki olaraq, işlərin daha da gərginləşməsinə və qızışdırılmasına yönəlik addımlar atılır. Bu gün Azərbaycanın üzərinə düşən bir nömrəli vəzifə ondan ibarətdir ki, baş verənləri operativ şəkildə beynəlxalq birliyin diqqətinə çatdıra bilsin. Əgər, 2014 - cü ildə Rusiyanın Donesk və Luqanskaya humanitar yüklərin çatdırılması ilə bağlı keçirdiyi aksiyaya dərhal BMT, Avropa İttifaqı , ABŞ Dövlət Departamenti tərəfindən sərt təpkilər göstərildisə, Ukraynanın icazəsi olmadan onun ərazisindən hər hansı bir yükün hansısa bölgəyə çatdırılması Ukraynanın ərazi bütövlüyünə, suverenliyinə təhdid olaraq qiymətləndirildisə, bu gün eyni addımın Azərbaycanla bağlı atıldığının şahidi olmadıq. Təbii ki, xristian təəssübkeşkiyi, ikili standartlar da mövcuddur. Amma, məsələ ondadır ki, Azərbaycanın strateji tərəfdaşları olan Avropa İttifaqı ölkələri arasında da bu istiqamətdə, yəni Azədbaycanın yolu bağlaması, orada yaşayan Qarabağ ermənilərini humanitar fəlakətlə üz - üzə qoyması ilə bağlı bəyanatlar səslənir. Bu o deməkdir ki, biz reallığı hələ də tam olaraq çatdıra bilməmişik. Ona görə də, əsas vəzifə realığı tam və operativ şəkilə dünya birliyinin diqqətinə çatdırmaqdan ibarət olmalıdır. Biz dünya birliyini inandırmalı və başa salmalıyıq ki, söhbət hər hansı fəlakətdən deyil, sadəcə erməni separatçılarının, Ermənistanın beynəlxalq birliyin diqqətini çaşdırmağa və yalan informasiyalarla Azərbaycanla bağlı hər hansı qətnamələrin qəbulundan gedir. Azərbaycan olaraq biz Laçın yoluna alternativ daha qısa olan Ağdam - Xankəndi yolunu təklif ediriksə, eyni zamanda lazım olan ərzaqların ora çatdırılmasl ilə bağlı addımlar atırıqsa, amma əks tərəf yolu bağlayıb bundan imtina edirsə, demək söhbət hər hansı humanitar fəlakət və qıtlıqdan gedə bilməz. Söhbət Ermənistan və separatçı rejimin, o cümlədən Rusiya, onun havadarlarının istəyi ilə problemi uzatmasından, sülh müqaviləsinin bağlanmasından imtinadan gedir. Biz nə qədər bunu vaxtında və tez dünya birliyinə çatdıra bilsək, mövqelərimizin bir o qədər möhkəmləndirilməsinə nail ola bilərik”.
Məhəmmədəli QƏRİBLİ
