Qulu İsmayılov: “Strateji yol xəritəsini beynəlxalq qurumlara bəyəndirən faktor da məhz bu mükəmməlliklə bağlıdır”
Azərbaycanda iqtisadi islahatların reallaşdırılması məqsədilə qəbul edilmiş strateji yol xəritəsi milli iqtisadiyyatın şaxələndirilməsinə xidmət edəcək və qeyri-neft sektorunun inkişafına təkan verəcək. Bunu Avropa İttifaqının (Aİ) Bakıdakı nümayəndəliyinin əməkdaşlıq şöbəsinin rəhbəri Jeron Villems "Azərbaycan akkreditasiya sisteminin gücləndirilməsi" tvininq layihəsinin təqdimatında deyib.
Onun sözlərinə görə, bu layihə Azərbaycan məhsullarının dünya bazarında tanınması məqsədi daşıyır və bu məhsulların ixracının genişlənməsinə vacib töhfə verəcək: "Bununla yanaşı, biz xərcləri azaltmaqla Azərbaycan məhsullarının Avropa bazarına çıxışını sadələşdirəcəyik".
J.Villems onu da vurğulayıb ki, Azərbaycan Avropa qonşuluq siyasətində aparıcı mövqelərdə yer alır: "Bu, artıq Aİ-nin Azərbaycanda reallaşdırdığı 51-ci tvininq layihəsidir. Bu layihənin başa çatması ilə Aİ və Azərbaycanın müvafiq strukturları arasında münasibətlər daha da möhkəmlənəcək".
Azərbaycanın hazırladığı strateji yol xəritəsinin belə yüksək qiymətləndirilməsi nə ilə bağlıdır?
İqtisadçı Qulu İsmayılov hesab edir ki, hazırlanan strateji yol xəritəsi doğrudan da mükəmməl sənəddir: “Prezident İlham Əliyevin 6 dekabr 2016-cı il tarixdə imzaladığı "Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında" Fərman ölkəmizin yaranmış yeni iqtisadi situasiya ilə əlaqədar müvafiq çağırışlara əsasən qədəm qoyacağı və ya başqa sözlə desəm, seçməli olduğu növbəti inkişaf modelinin, bir növ, bünövrə mexanizmini müəyyən etməklə, buna konkretlik gətirir.
Qeyri-neft sektorunun inkişafı, əslində, hələ illər öncədən prioritet seçilmişdi. Lakin postneft dövrünün belə tez yetişəcəyi gözlənilmirdi. Hansı ki, bu, rəsmi surətdə də açıq etiraf edilmişdi. Belə ki, hökumət əsasən 2020-ci ildən sonrakı dövrü hədəf götürürdü. Ancaq təəssüf ki, bir sıra qlobal siyasi səbəblər və problemlər üzündən sözügedən vəziyyət tez yetişdi. Başqa sözlə desəm, hökumət postneft dövrü ilə gözlədiyindən 4-5 il tez üzləşdi”.
İqtisadçı vurğulayır ki, bundan əvvəl Prezident tərəfindən ölkədə həyata keçirilən iqtisadi siyasətin strateji yol xəritələri başda milli iqtisadiyyatın perspektivi üzrə olmaqla, 1-ci neft və qaz sənayesinin (kimya məhsulları daxil olmaqla) inkişafı, 2-ci kənd təsərrüfatı məhsullarının istehsalı və emalı, 3-cü kiçik və orta sahibkarlıq səviyyəsində istehlak mallarının istehsalı, 4-cü ağır sənaye və maşınqayırmanın inkişafı, 5-ci ixtisaslaşmış turizm sənayesinin inkişafı, 6-cı logistika və ticarətin inkişafı, 7-ci uyğun qiymətə mənzil təminatının inkişafı, 8-ci peşə təhsili və təliminin inkişafı, 9-cu maliyyə xidmətlərinin inkişafı, 10-cu isə telekommunikasiya və informasiya texnologiyalarının inkişafı və ən nəhayət, 11-cisi isə kommunal xidmətlərin (elektrik və istilik enerjisi, su və qaz) inkişafından ibarət olmaqla hazırlanıb”.
Ekspert hesab edir ki, bundan sonra bütün atılacaq zəruri addımlar və tədbirlər, o cümlədən görüləcək işlər, imzalanacaq hər bir sənəd məhz qeyd olunan sahələr və istiqamətlər üzlə hazırlanmış strateji yol xəritələrinə uyğun olmalıdır və olacaq: “Hesab edirəm ki, bu da hədəfə çatmaq üçün olduqca məqsədəuyğun və əhəmiyyətli xarakter daşıyacaq. Qalır sözügedən yolları addımlamaq işi. Strateji yol xəritəsini beynəlxalq qurumlara bəyəndirən faktor da məhz bu mükəmməlliklə bağlıdır”.
Məhəmmədəli QƏRİBLİ
