Xaqani Cəfərli: “...Tərəflərin bir-birinə informasiya müharibəsindən başqa bir şey deyil”
İranın yüksək vəzifəli rəsmisi “Reuters” agentliyinə bildirib ki, ABŞ həftələr ərzində müvəqqəti sülh sazişini tam şəkildə yerinə yetirməsə, İran Hörmüz boğazında və ondan kənarda gərginliyi artıracaq və hücuma başlayacaq.
Rəsmi əlavə edib ki, ABŞ bu son tarixə əməl etməsə və diplomatiya uğursuz olarsa, Tehran ABŞ-ın İslam Respublikasına qarşı dəniz blokadasını qırmaq üçün "vaxtında və dəqiq" zərbə endirəcək.
Tehran və Vaşinqtonu iyun ayında əldə edilən razılaşma çərçivəsində danışıqlara qaytarmaq üçün diplomatik səylər son həftələrdə dalana dirənib.
"İran tərəfindən müəyyən edilmiş bir neçə həftə ərzində sazişin bütün müddəaları ABŞ tərəfindən tətbiq olunmalıdır. Bu, ABŞ-la gələcək danışıqlar üçün ilkin şərtdir" – deyə rəsmi “Reuters” agentliyinə bildirib. O, əlavə edib ki, vasitəçilər Tehranın son tarixinin təfərrüatlarını Vaşinqton və regional dövlətlərlə bölüşəcəklər.
"İran qurumları Hörmüz boğazında və daha geniş regionda gərginliyin artmasına hazır olmalıdır, İran çətin məsələlərdə qərarlar qəbul etməyə və tədbirlər görməyə hazır olacaq", - deyə rəsmi bildirib.
Onun sözlərinə görə, Tehran Vaşinqtonla diplomatiyanın effektivliyinə inamını itirdiyindən müdafiə siyasətindən hücum siyasətinə keçir. "Sübut olunmuş fakt budur ki, ABŞ atəşkəslə bağlı ciddi deyil və heç bir öhdəlik götürmək istəmir, ona görə də düşmənə təzyiq göstərmək və ya daimi atəşkəsə nail olmaq ümidi ilə vasitəçilərə güvənmək real deyil", - deyə rəsmi vurğulayıb.
İran ABŞ-ın dəniz blokada qüvvələri üzərinə hücuma hazırlaşır, İran müdafiə müharibəsindən hücuma keçir.
Nə baş verəcək?
Politoloq Xaqani Cəfərli baki-xeber.com-a bildirdi ki, İranın ABŞ-a bir neçə həftə vaxt verməsi, əgər tələbləri yerinə yetirilməsə Hörmüz boğazında, ondan kənarda gərginliyi artıracağı və hücuma başlayacağı haqqında “Reuters” agentliyinin yaydığı məlumat ciddi qəbul oluna bilməz. “Birincisi, “Reuters” agentliyi adı açıqlanmayan İranın yüksək vəzifəli rəsmisinə istinadən yayıb. Həmin yüksək vəzifəli rəsminin kim olduğu, Tehranın siyasətinin müəyyən olunmasında rolunun nədən ibarət olduğu aydın deyil. İkincisi və ən əsası, son hərbi əməliyyatlar zamanı ABŞ-ın güclü hücumuna məruz qalmasına baxmayaraq İran İsrailə zərbə endirmədi. Aydın göründü ki, Tehran əməliyyatların miqyasının böyüməsini istəmir. İsrailin hərbi əməliyyatlara başlamasından çəkinən İranın ABŞ-a hücum edəcəyi mümkün deyil. Bunlar əsasən diplomatik danışıqlar zamanı tərəflərin bir-birinə informasiya müharibəsindən başqa bir şey deyil. “Reuters” agentliyinin istinad etdiyi adı açıqlanmayan İranın yüksək vəzifəli rəsmisindən fərqli olaraq İran prezidenti Məsud Pezeşkian ölkə iqtisadiyyatının dağılmaqda olması ilə bağlı açıq fikirlər səsləndirir. Məncə, Tehranda da, dünyada da diqqət İran iqtisadiyyatına yönəlməlidir. İqtisadiyyat dağılandan sonra heç bir dövlət mövcudluğunu qoruya bilməz”-deyə X.Cəfərli qeyd etdi.
İradə SARIYEVA
