Ermənistan hökuməti dəmir yolu şəbəkəsinin Türkiyə ilə sərhədə doğru hissəsinin yenidən qurulması üçün ilk addımı atıb. Bunu ölkənin infrastruktur naziri Davit Xudatyan deyib. Xudatyan bildirib ki, hökumət Gümrüdən sərhədə qədər uzanan 21 kilometrlik hissənin layihələndirilməsi üçün beynəlxalq tender elan edib. Bu yol 1990-cı illərin əvvəllərindən bəri istifadəsiz qalıb və yararsız hala düşüb.
Ölkənin dəmiryolu şəbəkəsini Rusiyanın dövlətə məxsus “Rusiya Dəmir Yolları” şirkəti İrəvanla 2008-ci ildə imzalanmış 30 illik müqavilə çərçivəsində idarə edir. Baş nazir Nikol Paşinyan ötən ilin sonlarında dəfələrlə “Rusiya Dəmir Yolları”nı bu və Azərbaycana aparan hissəni təmir etməyə çağırıb. Paşinyan Ermənistanın Türkiyə və Azərbaycanla nəqliyyat əlaqələrinin bərpası üçün addımlar atdığını vurğulayıb. Bu il fevralın 12-də Rusiya baş nazirinin müavini Aleksey Overçuk buna hazır olduqlarını bildirib. Paşinyan ertəsi gün deyib ki, Ermənistan dəmir yollarını Rusiyanın idarə etməsinə son qoymaq istəyir. Onun sözlərinə görə, bu, Türkiyə və Azərbaycanı yaxın gələcəkdə Ermənistan ərazisinin daha böyük bir hissəsini tranzit məqsədləri üçün istifadə etməkdən çəkindirir. Moskva isə Paşinyanın idarəetmə hüquqlarını başqa bir xarici ölkəyə və ya şirkətə vermək tələblərini dəfələrlə rədd edib.
Keçən ayın sonlarında gərginlik daha da artıb. Paşinyan “Rusiya Dəmir Yolları”nı bu hüquqlardan məhrum etmək üçün qanuni tədbirlər görməklə, Rusiya operatorundan hər il 2 milyard dollara qədər pul alacağı ilə hədələyib. Rusiya rəsmiləri sərt xəbərdarlıqlar səsləndirəndən sonra baş nazir təhdidlərə ara verib. İndi Xudatyanın açıqlaması İrəvanın Rusiyanı dəmir yolunun Gümrü-Axurik hissəsinin yenidən qurulmasından uzaq tutmaq istəməsinin göstəricisidir. Paşinyan mayda bu işi hökumətin maliyyələşdirəcəyini bildirmişdi. Xudatyan onu da deyib ki, bu ilin sonlarında hökumət tikinti üçün ayrıca tender elan edəcək və bundan ötrü təxminən 15 milyon dollar tələb olunacaq. Türkiyənin sərhəd şəhəri Akyakanın meri Erduger Toptaş ötən ay bildirib ki, Türkiyə tərəfdə yenidənqurma işləri artıq başlayıb və iki-üç aya başa çatacaq. Artıq Akyakadan Gümrüyə qədər uzanan hissədə, o cümlədən torpaq yolunun tikintisi ilə bağlı tender elan olunub. Toptaş bildirib ki, dəmir yolu infrastrukturunun yenidən qurulması Türkiyə və Ermənistan üçün iqtisadi baxımdan faydalı olacaq. Merin sözlərinə görə, layihə iki ölkə arasında kənd təsərrüfatı və sənaye sahələrində əməkdaşlıq imkanlarının genişlənməsinə də şərait yaradacaq. Beləliklə, Ermənistan və Türkiyə arasında Gümri-Qars dəmir yolu açıla bilər. Ermənistan və Türkiyə rəsmiləri hələ ötən il bu dəmiryolu xəttinin açılması üzərində işləmək barədə razılaşıblar.
Tahir TAĞIYEV
