İsrail Tramp administrasiyasına Suriya hava bazasına son hücumunun məqsədinin ərazidə Türkiyə ordusunun cəmləşməsinin qarşısını almaq olduğunu bildirib. Bu barədə “Axios” Amerika və İsrail rəsmilərinı istinadən məlumat yayıb.
İsrailin zərbələri İsrail və Türkiyə arasında Suriya məsələsi ilə bağlı təhlükəsizlik gərginliyinin artdığı bir vaxta təsadüf edib. Bildirilir ki, İsrailin Suriyadakı hərbi bazaya zərbələri Türkiyə ilə birbaşa hərbi qarşıdurma təhlükəsi yaradıb.
Hücum çərşənbə axşamı səhər tezdən baş verib. Suriyanın şimalında, Türkiyə sərhədindən təxminən 72 kilometr aralıda yerləşən Əbu əl-Duhur hava bazasında uçuş-enmə zolaqlarına və bir neçə anqara ən azı səkkiz bomba atılıb.
Amerika və İsrail rəsmilərinin sözlərinə görə, İsrail hökuməti qarşıdan hücum barədə Ağ Ev rəsmilərini əvvəlcədən məlumatlandırıb. İddialara görə, İsraillilər Ağ Evə bildiriblər ki, hücumun məqsədi Türkiyənin aviabazaya qabaqcıl silah sistemləri göndərməsinin və obyektdə daha geniş hərbi qüvvələrin toplanmasının qarşısını almaq olub.
Bir Türkiyə rəsmisi isə İsrailin iddialarını təkzib edib və bildirib ki, hərbi hava bazasında Türkiyə ordusu olmayıb: “İsrail qonşu ölkələri bombalamaq və regionda sabitliyi pozmaq üçün bəhanələr uydurur".
Bəzi yüksək vəzifəli ABŞ rəsmiləri isə hücumun İsraildə oktyabr ayında keçirilən seçkilərlə bağlı olduğunu düşünür. ABŞ rəsmiləri bildiriblər ki, Tramp administrasiyası Suriya hökumətini təmkinli olmağa çağırıb və məsələnin İsrail seçkilərindən sonra daha asan həll olunacağını vurğulayıblar.
Bu arada, İsrail Baş Nazirinin Ofisinin açıqlamasına görə, İsrail və Suriya təhlükəsizlik status-kvonu qorumaq barədə razılığa gəliblər. Iddia edilir ki, Suriya Türkiyə qoşunlarının Hələb yaxınlığındakı hava bazasında yerləşməsinə icazə verməklə bu status-kvonu pozmaq üzrə olub.
Qeyd edilib ki, İsrail dəfələrlə Suriyaya belə bir yerləşdirmənin İsrailin təhlükəsizliyinə təhdid yaradacağı barədə Dəməşqə xəbərdarlıq edib, lakin Suriya bu xəbərdarlıqları qulaqardına vurur.
Xatıqladaq ki, Türkiyə sərhədindən təxminən 70 kilometr məsafədə yerləşən Əbu əl-Duhur aviabazası 2013-cü ildən etibarən ixtisaslaşmış hərbi aerodrom kimi istifadə olunmur. Hərbi mənbənin məlumatına görə, 2024-cü ilin sonunda Bəşər Əsəd hakimiyyətdən devrildikdən sonra baza yeni Suriya ordusu üçün təlim mərkəzi kimi istifadə olunmağa başlayıb.
Tahir TAĞIYEV
