Bu ilin 6 ayında Azərbaycanda doğumda, nikah və boşanmada azalma davam edib, ölüm isə artıb. Dövlət Statistika Komitəsinin yaydığı açıqlamaya görə, ilin əvvəlindən ölkə əhalisinin sayı 11099 nəfər və ya 0,1 faiz artaraq iyulun 1-də 10 milyon 273 min 450 nəfərə çatıb. Amma son illərə xas olaraq doğuşda azalma davam edir.
Cari ilin birinci yarısında Ədliyyə Nazirliyinin rayon və şəhər qeydiyyat şöbələrində 40 min 798 doğulan körpə qeydə alınıb və 2025-ci ilin müvafiq dövrü ilə müqayisədə əhalinin hər 1000 nəfərinə bu göstərici 9,0-dan 8,0-a düşüb. Halbuki, 2025-ci ilin 6 ayında ölkədə 45 min 616 körpənin doğulduğu açıqlanmışdı. Əvəzində isə ölümdə artım var. Hesabat dövründə ölkədə 30 min 625 ölüm halı qeydə alınıb. Ötən ilin müvafiq dövrü ilə müqayisədə əhalinin hər 1000 nəfərinə bu göstərici 5,8-dən 6-ya qədər artıb. Ötən ilin 6 ayında isə 29 min 400 ölüm halı qeydə alınmışdı. Ölkədə evlənənlərin sayında da azalma var. Azərbaycanda 6 ayda 19 min 224 nikaha daxilolma və 9776 boşanma qeydə alınıb. 2025-ci ilin müvafiq dövründə isə 24 min 815 nikah və 10 min 350 boşanma rəsmiləşdirilmişdi. Son illər Azərbaycanda, bir qayda olaraq, doğumda azalma, ölümdə isə artım müşahidə edilir. Statistik rəqəmlərin təhlili göstərir ki, son 10 ildə Azərbaycanda doğumda azalma 50 faizə yaxındır. Ekspertlər bu prosesin müəyyən qədər qarşısının alınması üçün bir sıra təkliflərlə çıxış edirlər. Onlar hesab edirlər ki, hər şeydən əvvəl 2006-cı ildən ləğv edilən uşaqların aylıq müavinətinin verilməsi bərpa edilməli və çoxuşaqlı ana statusunda uşaq sayı 5-dən 3-ə endirilməlidir. Düzdür, dövlət yeni doğulan uşaqlara görə ailələrə birdəfəlik sosial dəstək göstərir. Hazırda uşağın doğulmasına görə birdəfəlik müavinətin məbləği 600 manatdır. Vətəndaşların vəfatı ilə bağlı da dövlət tərəfindən dəfn müavinəti verilir. Hazırda bu məbləğ bir sıra kateqoriyalar üzrə 600 manat təşkil edir. Əmək pensiyaçıları vəfat etdikdə isə dəfn müavinəti minimum əmək pensiyasının üç misli həcmində hesablanır.
Samirə SƏFƏROVA
