Moskva Avropa üçün getdikcə daha ciddi bir təhlükəyə çevrilir: Leypsiq hava limanında pilotsuz təyyarənin peyda olması, Polşada Rusiya raketinin vurulması, Rumıniyada pilotsuz təyyarənin qəzaya uğraması və Baltik hava məkanının dəfələrlə pozulması.
ABŞ-ın keçmiş Mərkəzi Kəşfiyyat İdarəsinin (MKİ) direktoru Leon Panettanın sözlərinə görə, bunlar Vladimir Putinin Avropanın müdafiə qabiliyyətlərini sistematik şəkildə sınaqdan keçirdiyinə dair həyəcanverici əlamətlərdir.
Panetta "Bild"ə müsahibəsində hətta Rusiyanın Almaniya torpağında hərbi əməliyyatlar keçirməsi ehtimalını da dilə gətirib. Keçmiş Mərkəzi Kəşfiyyat İdarəsinin direktorunun sözlərinə görə, Moskva ilk növbədə Qərbin qarşılıqlı müdafiə öhdəliklərinə həqiqətən əməl edib-etmədiyini yoxlamaq istəyir.
Panetta Putinin aqressivliyinin iki səbəbini açıqlayıb: Kreml lideri Ukraynadakı müharibə səbəbindən böyük təzyiq altındadır və ABŞ prezidenti Donald Trampla avropalı NATO tərəfdaşları arasındakı gərginlik, onu diqqəti yayındırmaq üçün yeni cəbhələr axtarmağa daha da sövq edə bilər.
Panetta xəbərdarlıq edib ki, Putin zəifliyə dərhal reaksiya verir və əgər NATO və ABŞ-da zəifliyi hiss edərsə, təxribatlara və hücumlara davam edəcək. O, həmçinin Ukraynadakı müharibə ilə bağlı Vaşinqtonu sərt tənqid edərək, Trampın "ikiüzlü şəkildə" hərəkət etdiyini bildirib.
“ABŞ indi Ukraynaya silah, hava hücumundan müdafiə sistemləri və lazımi dəstəyi təmin etmək üçün əlindən gələni etməlidir. Lakin silah çatışmazlığı səbəbindən NATO və ABŞ hazırda yalnız "seyr etməklə kifayətlənirlər” – deyə Panetta bildirib.
Tahir TAĞIYEV
