Azər Həsrət: “Macarıstan bu qurumdan çıxmaq istəsəydi işarətlərini verərdi, amma bu vaxta qədər...”
Macarıstanın Buğac şəhərində Hun-Türk xalqlarının Qurultayı keçirilib. Qurultayda Türk Dövlətləri Təşkilatının baş katibi Kubanıçbek Omurəliyev də iştirak edib.
Qeyd edək ki, Macarıstandakı Hun-Türk Xalqlarının Qurultayı (Böyük Qurultay) hər iki ildən bir Buğaç kəndində keçirilən genişmiqyaslı ənənəvi etnoqrafiya festivalıdır. Tədbirdə Avrasiyanın 25-dən çox türk və hun xalqının nümayəndələri mədəni əlaqələri gücləndirmək, qədim ənənələri qorumaq və atçılıq irsini nümayiş etdirmək üçün bir araya gəlir.
Burada maraqlı bir məqam var. Macarıstanda hakimiyyət dəyişəndən, Orban hakimiyyətdən gedəndən sonra belə bir ehtiyatlanma vardı ki, Macarıstan Türk Dövlətləri Təşkilatından (TDT) çıxacaq. Bildiyimiz kimi, Macarıstan Türk Dövlətləri Təşkilatında müşahidəçi sifətində iştirak edir.
Amma bu qurultayın keçirilməsi belə ümidlər yaradır ki, Macarıstan Türk Dövlətləri Təşkilatını tərk etməyəcək.
Hun-Türk xalqlarının qurultayının keçirilməsi də Macarıstanda yeni hakimiyyətin türk inteqrasiyasında iştiraka isti baxmağının əlaməti kimi qəbul oluna bilərmi? Demək olarmı ki, Macarıstan Türk Dövlətləri Təşkilatı ilə əlaqələri tam kəsməyəcək?
Siyasi icmalçı Azər Həsrət baki-xeber.com-a bildirdi ki, Hun-Türk xalqlarının Qurultayı ənənəvi olaraq Macarıstanda illərdir keçirilir. “Düşünmürəm ki, hakimiyyət dəyişəndən sonra bu qurultaya münasibət dəyişəcək. Çünki hazırda baş nazir olan Madyar özü Viktor Orbanın partiyasından çıxıb. Yəni onunla əqidə, ideologiya yoldaşı olub. Təbiidir ki, onları məhz türk dünyası ilə bağlı məqamlar da birləşdirir.
Macarıstanın TDT-də müşahidəçi kimi qalıb qalmaması məsələsi əlbəttə ki, bu dövlət rəhbərlərimizin həll edə biləcəyi məsələdir. Düşünürəm ki, Macarıstan bu qurumdan çıxmaq istəsəydi işarətlərini verərdi, amma bu vaxta qədər hər hansı bir işarətə rast gəlməmişik. Yəni Macarıstan belə bir işarət verməyib. Verməyibsə demək çıxmaq fikrində də deyillər. Amma istənilən halda hakimiyyət dəyişikliyi əlbəttə ki, yeni status-kvo, yeni münasibət, yanaşma deməkdir. Hər halda o yanaşmanın həlli ilə bağlı da addımları atacaq qurum TDT-dir. Unutmamalıyıq ki, Macarıstan Avropada TDT-nin ofisinin olduğu yeganə dövlətdir. Düzdür, Avropada yeganə müşahidəçi üzv dövlətdir həm də. Eyni zamanda orada TDT-nin ofisi də fəaliyyət göstərir”.
A.Həsrət düşünmür ki, Madyar ümumiyyətlə bağları kəsib birdəfəlik TDT-dən uzaqlaşmaq yolu tutsun. “Çünki Macarıstan Hun dövlətinin mirasıdır və bunu macarların hamısı da bilir. Onlar özlərini türk dünyasının bir parçası hesab edirlər. Hansısa siyasi lider TDT-dən imtina etsə də, seçicilərin böyük əksəriyyəninin səslərindən özünü məhrum etmiş olar. O baxımdan, düşünürəm ki, problem olmamalıdır”-deyə A.Həsrət vurğuladı.
İradə SARIYEVA
