"Həm tarixi təcrübə, həm də dövlət tərəfindən verilən dəstək gülçülüyün inkişafına təkan verə bilər"
Məlum olduğu kimi, Azərbaycan Respublikasının Prezidenti İlham Əliyev avqustun 3-də Zaqatalada "AzRose" MMC-nin tikintisi davam edən qızılgül yağı istehsalı müəssisəsi ilə tanış olub. Prezident Zaqatala rayonunda olarkən gülçülük sahəsinin inkişafının vacibliyi barədə fikir səsləndirib.
O qeyd edib ki, gülçülük sahəsinə qoyulan sərmayə də böyük sərmayədir: "Baxın, ən müasir texnologiyalarla təmin edilmiş zavod. Bu böyük vəsait tələb edir. Xaricdən mütəxəssislər cəlb edilib. İndi xarici bazarlara çıxmaq üçün araşdırmalar aparılır. Dövlət hər zaman sahibkarların, kəndlilərin yanındadır. Ona görə mən çox şadam ki, belə gözəl sahə yaradılıb. Bu günə qədər işlə təmin olunmayan yüzlərlə insan burada iş tapıb işləyir, pul qazanır, evinə aparır, özü də razıdır, dövlət də razıdır.
Ölkəmizdə qızılgül istehsalı, xüsusilə Zaqatala rayonunda qızılgül yağının istehsalı əsrlər boyu inkişaf edib. Sovet dövründə bu sahəyə böyük diqqət göstərilmişdir. Ondan sonrakı illərdə nədənsə bu sahəyə o qədər də böyük diqqət göstərilmirdi. İndi mənim göstərişimlə bu sahə bərpa edilir. Yeni müasir müəssisə tikilir, yaxın vaxtlarda istifadəyə veriləcək. Yüz hektardan çox sahədə qızılgül əkilib. Burada istehsal olunacaq qızılgül yağı həm daxili bazara, həm də xarici bazarlara ixrac ediləcək. Beləliklə, mənə verilən məlumata görə, artıq burada yüzlərlə insan işlə təmin edilib. 500-dən çox daimi və mövsümi iş yeri yaradılıb. Burada işləyənlər yaxşı maaş alacaqlar və ölkəmizə xeyir gətirəcəklər. Çünki indi əsas vəzifəmiz təbii imkanlarımızdan, iqlim şəraitimizdən istifadə edərək maksimum dərəcədə kənd təsərrüfatını inkişaf etdirməkdir".
Mövzu ilə bağlı Azərbaycan Dövlət İqtisad Universitetinin dosenti Qadir Bayramlıya müraciət etdik. O, "Bakı-Xəbər"ə açıqlamasında qeyd etdi ki, keçmiş SSRİ ərazisində Azərbaycan gülçülük üzrə ən inkişaf etmiş bölgələrdən biri olub. Amma SSRİ dağılandan sonra, başqa sahələrdə olduğu kimi, bu sahədə həm istehsal, həm də maraq azalmağa başladı. Xüsusilə də Abşeron bölgəsində 1990-cı illərdə gülçülüyün inkişafına mənfi təsir edən səbəblərdən biri də təbii qazın azalması oldu. Çoxlu sayda istixanalar vardı ki, orada gül yetişdirilirdi və keçmiş SSRİ respublikalarına göndərilirdi.
Azərbaycan gülçülük sahəsində əvvəlki şöhrətini qazanmaq üçün yenidən bir sıra tədbirləri həyata keçirməyə başladı.
Hazırda Azərbaycan gül ixrac edən ölkədən idxal edən ölkəyə çevrilib. Dövlət tərəfindən atılan bu addımlar gülçülük sahəsinin yenidən dirçəlməsinə səbəb olacaq".
Q.Bayramlının sözlərinə görə, gülçülük sahəsinin inkişafı məqsədilə həm subsidiya, həm də dövlət dəstəyi olmalıdır: "Vaxtilə Azərbaycanda qərənfil, qızılgül və digər gül növləri istehsal olunurdusa, bu gün çeşidin sayı artırılmalıdır. Nəzərə almaq lazımdır ki, dünya bazarında gülçülük sahəsində rəqabət güclüdür. Həm tarixi təcrübə, həm də dövlət tərəfindən verilən dəstək gülçülüyün inkişafına təkan verə bilər".
Həmsöhbətimiz onu da əlavə etdi ki, Azərbaycanda bu sahədə reklam işi güclü şəkildə aparılmalıdır. Gülün ixracı üçün müəyyən subyektiv amillər aradan qaldırılmalıdır. Bunlar həyata keçirilsə, gülçülük sahəsinə həm maraq, həm də ixracat gəlirləri artar.
Günel CƏLİLOVA
