Bu ilin II rübünü zərərlə başa vuran bankların siyahısı məlum olub. Aprel-iyun ayları ərzində Azərbaycandakı banklar 217,6 mln. manat xalis mənfəət əldə ediblər ki, bu da ötən ilin eyni rübü ilə müqayisədə 46,2 faiz çoxdur.
Buna baxmayaraq, yeddi bank II rübü zərərlə başa vurub. Bunlar “AccessBank”, “Bank Avrasiya”, “Günay Bank”, “Muğanbank”, “Yapı Kredi Bank” (Azərbaycan), “Pakistan Mill Bankı” (Azərbaycan) və “Bank Melli İran”dır (Azərbaycan).
Belə ki, hesabat rübündə "AccessBank" 2 159,0 min manat, “Bank Avrasiya” 4 279,16 min manat, “Muğanbank” 1 037,53 min manat, “Günay Bank” 252,51 min manat, “Yapı Kredi Bank” (Azərbaycan) 109,54 min manat, “Pakistan Mill Bankı” (Azərbaycan) 45,31 min manat, “Bank Melli İran” (Azərbaycan) isə 39,265 min manat zərər edib.
Məlumat üçün bildirək ki, qeyd etdiyimiz banklardan “AccessBank”, “Bank Avrasiya”, “Yapı Kredi Bank” (Azərbaycan) və “Pakistan Mill Bankı” (Azərbaycan) bütöv yarım ili də zərərlə başa vurublar. Belə ki, 2021-ci ilin ilk yarısında sözügedən maliyyə təşkilatları müvafiq olaraq 2 024,0 min manat, 3 928,57 min manat, 231,69 min manat və 114,97 min manat zərər ediblər.
Maraqlıdır, zərərlə işləyən bankların sayının artması bank sektorunda yeni bağlanmalara səbəb ola bilərmi?
“Zərər uzun müddət davam edərsə, bu zaman bir neçə bankın bağlanma risqi ilə üz-üzə qalması istisna edilmir”
İqtisadçı ekspert Kamran Məmmədli bildirdi ki, bankların uzun müddət zərərdə olması və zərərlə çalışması davam edə bilməz. Qısamüddətli vaxtda bank bunu kompensasiya edə bilər: “Zərər uzun müddət davam edərsə, bu zaman bir neçə bankın bağlanma risqi ilə üz-üzə qalması istisna edilmir. Xüsusilə biz son illərdə bu təcrübəni yaşamışıq. Ən son ötən il eyni anda 4 bankın lisenziyasının ləğv olunması kimi bir situasiya ilə üzləşdik. Nəzərə almaq lazımdır ki, maliyyə sektoru hələ ki, pandemiyanın mənfi təsirlərindən çıxmayıb. İstər qlobal, istərsə də yerli bazarlarda gələcək proqnozlar əsasən pandemiyanın gedişatından birbaşa asılı olacaq. Daxili bazarda fəaliyyət göstərən qurumlara bununla bağlı çox iş düşür. Xüsusilə banklar gələcək planlarını çoxşaxəli qurmaq məcburiyyətindədirlər. Azərbaycanda, xüsusilə kredit faizlərinin artımına səbəb olan izafi xərclərini mütləq şəkildə azaltmalıdırlar. Çünki bu, əsas faktorlardan biri kimi görünür. Ümumilikdə banklar gələcəkdə gedişatın müsbət yox, mənfi versiyasına hazır olmalıdırlar”.
Ekspert hesab edir ki, Mərkəzi Bank bir tərəfdən maliyyə institutlarına dəstəyini davam etməli, banklarla sıx işləməli, digər tərəfdən vətəndaşlara və hüquqi şəxslərə dəstəyini nümayiş etdirməlidir. Xüsusilə keçən təcrübəmizdə olduğu kimi, bağlanan banklarda vətəndaşların sığortalanan vəsaitləriı ödənilir, lakin hüquqi şəxslərin vəsaitləri de-fakto qorunmur. Hüquqi şəxslər vəsaitləri geri qaytarılanlar siyahısında ən sonda yer aldığı üçün əslində çox zaman onların vəsaitləri ödənməmiş olur.
Günel CƏLİLOVA
