“2020-ci ildə sahibkarlıq subyektlərinə 358 milyon manat məbləğində dəstək göstərilib və 115 milyon manat güzəştli kredit verilib”. Bunu iqtisadiyyat naziri Mikayıl Cabbarov "Postpandemiya dövründə vergi sistemi" adlı konfransda deyib.
O bildirib ki, pandemiyanın fəsadlarının aradan qaldırılması, iqtisadi fəallığın bərpası, kiçik və orta biznesin aktiv fəaliyyətə qayıtması bu il qarşımızda dayanan əsas prioritet istiqamətlərdir.
Maraqlıdır, kiçik və orta biznesin fəallığının bərpası nə qədər vaxtda mümkün ola bilər?
“...görülən işlər sayəsində Azərbaycanda kiçik və orta biznesin inkişafında yeni imkanlar yaranacaq”
İqtisadçı-ekspert Natiq Cəfərli bildirdi ki, kiçik biznesin inkişafına mane olan bir sıra nüanslar var: “Ən böyük problemlər qanunvericilik bazasının təkmilləşdirilməsi üçün rəqabət məcəlləsi və digər qanunvericilik aktlarının qəbulu ilə bağlı məsələlərin gecikməsidir. Bununla yanaşı, vergi ilə bağlı tez-tez qaydaların dəyişməsini də qeyd etmək lazımdır. Həmçinin, Sosial Müdafiə Fonduna ödənişlərin minimum əməkhaqqına bağlı olması da problemlər sırasındadır”.
Həmsöhbətimiz onu da əlavə etdi ki, uzunmüddətli və aşağı faizli kreditlərə çıxış imkanlarının məhdud olması kiçik biznesə problem yaradır: “Bu, kiçik və orta biznesin inkişafına mane olan əsas amillərdən biridir. Kiçik bizneslə məşğul olan şəxs uzunmüddətli və çox aşağı faizli kredit ala bilmir. Digər bir məsələ məmurların biznesə müdaxiləsidir. Bu sahənin inkişafı istiqamətində görülən işlər sayəsində Azərbaycanda kiçik bə orta biznesin inkişafında yeni imkanlar yaranacaq”.
Günel CƏLİLOVA
