Dubaydan Təl-Əvivə uçan “Flydubai” şirkətinin FZ1073 reysi ilə uçan təyyarənin ikinci pilotu uçuş zamanı kapitana hücum edərək və təyyarənin idarəsini ələ keçirməyə cəhd edərək terror aktı törətməyə cəhd edib. Bu barədə şənbə günü BƏƏ-nin baş prokuroru Həməd Saif əl-Şəmsi bildirib.
Onun sözlərinə görə, ikinci pilot kokpitdəki kapitana balta ilə hücum edib və sonra təyyarəni idarə etməyə cəhd edib. İstintaq davam edir. Müstəntiqlər hadisənin şərtlərini, hücumçunun motivlərini və mümkün əlaqələrini müəyyən edir, həmçinin fiziki və rəqəmsal sübutları araşdırırlar.
Sözügedən təyyarə 30 sentyabrda Dubaydan Təl-Əvivə uçurmuş. Uçuş zamanı kabinədə dava düşüb və sərnişinlər davaya müdaxilə edib. Təyyarə istiqamətini dəyişərək Səudiyyə Ərəbistanındakı Təbuk hava limanına təcili eniş edib. Dava zamanı bir neçə heyət üzvü yaralanıb.
“Reuters” agentliyinin məlumatına görə, təyyarədə 174 nəfər olub. Hadisə zamanı təyyarə tez bir zamanda 16.000 futdan çox hündürlük itirib. Yaralı kapitan kabinənin qapısını açmağı bacarıb, bundan sonra sərnişinlər və göyərtədəki digər pilot hücumçunu zərərsizləşdirməyə kömək edib. Təyyarə sonda Təbukda təhlükəsiz şəkildə eniş edib.
Əvvəlcə BƏƏ hakimiyyəti hadisəni yalnız "təhlükəsizlik hadisəsi" adlandıraraq səbəb və şəraitin araşdırıldığını vurğulayıb. 1 oktyabrda xüsusi istintaq qrupu yaradılıb.
BƏƏ Dövlət Prokurorluğu artıq ikinci pilotun hərəkətlərini rəsmi olaraq "terror" hücumu törətmək cəhdi kimi xarakterizə edib. Lakin onun motivləri və mümkün əlaqələri ilə bağlı istintaq hələ də davam edir.
Hadisədən sonra “Flydubai” şirkəti İsrailə və İsraildən uçuşları müvəqqəti olaraq dayandırıb. İsrail həmçinin ölkəyə uçan pilotların yoxlanılmasını gücləndirdiyini elan edib.
Tahir TAĞIYEV
