Bəhruz Quliyev: “Bu, Azərbaycanın təhlükəsizliyinə, suverenliyinə və gələcək inkişafına qoyulan strateji sərmayə kimi qiymətləndirilə bilər”
Prezident İlham Əliyevin Yeni Azərbaycan Partiyasının (YAP) VIII Qurultayındakı çıxışında qarşıda duran vəzifələrdən milli təhlükəsizlik və inkişaf konsepsiyasından da danışıb.
Prezident İlham Əliyev bildirib: “Elə güc əldə etməliyik və bunu əldə edirik ki, heç kimin ağlına belə gəlməsin Azərbaycana qarşı hansısa təxribat törətmək. Ona görə bu, birinci vəzifədir və təsadüfi deyil ki, bizim bu gün müzakirə olunan dövlət büdcəmizdə, gələn ilin büdcəsində hərbi və təhlükəsizlik məsələləri yenə də ön plandadır və təqribən 9 milyard manata yaxın vəsait bu məqsədlər üçün nəzərdə tutulur. Təbii ki, bizim başqa ehtiyaclarımız da var - ilk növbədə, Qarabağın və Şərqi Zəngəzurun bərpası, insanların sosial vəziyyətinin yaxşılaşdırılması. Biz bunu da edirik və müzakirə olunan büdcədə bütün bunlar nəzərdə tutulur. Ancaq əgər biz özümüzü qoruya bilməsək, onda bizim başqa hər hansı bir layihə tamamilə əhəmiyyətsiz olacaq.
Təhlükəsizlik tədbirləri. Bəli, bu gün Azərbaycan xalqı təhlükəsizlik, əmin-amanlıq şəraitində yaşayır. Bu, indiki dünyada böyük sərvət sayıla bilər”.
Prezident İlham Əliyevin Yeni Azərbaycan Partiyasının (YAP) VIII Qurultayındakı çıxışı, ölkənin gələcək milli təhlükəsizlik və inkişaf prioritetlərini müəyyən edən strateji bir yol xəritəsidir. Prezident Əliyev regional reallıqları və qlobal təhlükələri dərin təhlil edərək Azərbaycanın müdafiə qabiliyyətinin daim zirvədə saxlanmasının həyati əhəmiyyətini bəyan edib.
Azərbaycan Prezidenti bəyan edib ki, Azərbaycanla Ermənistan arasında artıq aktiv münaqişə olmasa da, hərbi gücün artırılması ölkə üçün hər zaman əsas vəzifə olaraq qalacaqdır. Tarixdə baş vermiş faciələrin və ədalətsizliklərin bir daha təkrarlanmaması üçün Azərbaycan hər an güclü olmalıdır. Prezident Azərbaycanın ətraf perimetri boyunca-həm Şimalda, həm Cənubda, həm də Yaxın Şərqdə müharibə və münaqişə ocaqlarının alovlandığını diqqətə çatdırıb. O, dünyada beynəlxalq hüququn tamamilə sıradan çıxdığını və müharibələri dayandıracaq heç bir effektiv beynəlxalq mexanizmin qalmadığını vurğulayıb. Bu səbəbdən ölkə hər gün istənilən hərbi təxribata cavab verməyə hazır olmalıdır. Regional risklər fonunda növbəti ilin dövlət büdcəsi layihəsində hərbi müdafiə və milli təhlükəsizlik məsələlərinə təqribən 9 milyard manat (dəqiq layihə üzrə 8 milyard 816 milyon manat) vəsait nəzərdə tutulub. Prezident Əliyev bəyan edib ki, əgər ölkə öz təhlükəsizliyini qoruya bilməsə, icra edilən digər bütün sosial və iqtisadi layihələr əhəmiyyətini itirər.
Bu bəyanatlar ölkənin güclü ordu, müstəqil siyasət və dinamik inkişaf formulasına sadiqliyini növbəti dövrdə də qoruyub saxlayacağını nümayiş etdirir.
“Səs2 qəzetinin baş redaktoru, siyasi ekspert Bəhruz Quliyev baki-xeber.com-a deyib ki, Prezident İlham Əliyevin Yeni Azərbaycan Partiyasının qurultayında qarşıda duran vəzifələrdən danışarkən milli təhlükəsizlik və ölkənin inkişafı məsələlərinə xüsusi diqqət yetirməsi təsadüfi deyil. “Burada söhbət yalnız bugünkü təhlükələrə cavab verməkdən yox, Azərbaycanın gələcək təhlükəsizlik arxitekturasını indidən formalaşdırmaqdan gedir.
Prezidentin vurğuladığı əsas məqamlardan biri hərbi gücün daim artırılmasıdır. Çünki tarix göstərib ki, dövlətin müstəqilliyi və suverenliyi yalnız siyasi bəyanatlarla deyil, həm də real güc imkanları ilə təmin olunur”.
Ekspert qeyd edib ki, Azərbaycan keçmişdə üzləşdiyi təhlükələri, işğal və müharibə reallığını yaşamış ölkədir. Ona görə də tarixin təkrarlanmaması üçün güclü ordu, güclü müdafiə sənayesi və güclü dövlət mexanizmi daim prioritet olmalıdır.
Digər mühüm məqam isə dünyada geosiyasi vəziyyətin mürəkkəbləşməsi və müharibə risklərinin artmasıdır. Bu gün dünyanın müxtəlif regionlarında baş verən proseslər göstərir ki, heç bir ölkə təhlükəsizlik məsələsinə arxayın yanaşa bilməz. Azərbaycanın qarşısında duran vəzifə də məhz belə dəyişkən şəraitdə milli maraqları qorumaq, mümkün riskləri qabaqlamaq və dövlətin dayanıqlığını təmin etməkdir.
Gələn ilin büdcəsində müdafiə və təhlükəsizlik istiqamətinə təxminən 9 milyard manata yaxın vəsaitin nəzərdə tutulması da bu yanaşmanın praktiki ifadəsidir. Bu, sadəcə rəqəm deyil. Bu, Azərbaycanın təhlükəsizliyinə, suverenliyinə və gələcək inkişafına qoyulan strateji sərmayə kimi qiymətləndirilə bilər.
Çünki təhlükəsizlik olmadan davamlı inkişaf mümkün deyil. "Eyni zamanda, iqtisadi güc olmadan güclü müdafiə sistemi qurmaq da mümkün deyil. Deməli, Prezidentin ortaya qoyduğu yanaşmanın mahiyyəti “güclü dövlət – güclü ordu – dayanıqlı iqtisadiyyat” üçbucağında özünü göstərir.
Azərbaycanın qarşısında yeni mərhələdə əsas vəzifələrdən biri əldə edilmiş siyasi, iqtisadi və hərbi imkanları qorumaq və daha da gücləndirməkdir. Prezidentin bu məsələlərə xüsusi həssaslıqla yanaşması da göstərir ki, Azərbaycan yalnız bugünkü reallıqlara deyil, gələcəyin mümkün çağırışlarına da hazırlaşır."-deyə, B.Quliyev əlavə edib.
İradə SARIYEVA
