İsrailə uçan “FlyDubai” təyyarəsində baş verən məlum insidentdən sonra Təl-Əviv və Tehranın yenidən münasibətlərini döyüş meydanında aydınlaşdırmağa başlayacaqları barədə yeni məlumatlar yayılır. İsrail və İran bir-birini yeni hücumlar hazırlamaqda ittiham edir. Rəsmi səviyyədə səslənən ittihamlar fonunda o da xüsusi qabardılır ki, cavab zərbələri əvvəlkilərdən daha sərt, daha dağıdıcı olacaq. İranla danışıqları rədd edən ABŞ də regionda hərbi qüvvələrini artırır. Region ölkələri də mümkün savaşa hazırlıq görürlər. Əgər qarşıdurma növbəti mərhələyə keçərsə, savaşda iştirakçı dövlətlərlə yanaşı, Livan, Yəmən, İraq, Suriya və Körfəz ölkələri ətrafında yeni cəbhələrin açılması riski də müzakirə mövzusudur.
İran mediası İsrailin MOSSAD qurumu tərəfindən bölgədəki aviasiya hədəflərinə hücum etmək üçün hazırlıq planları barədə məlumat yayıb. Bu məlumatlar Dubaydan İsraildəki “Ben Qurion” hava limanına uçan “FlyDubai” təyyarəsində baş verən hadisədən qısa müddət sonra verilib. Tehran iddia edir ki, MOSSAD tərəfindən hazırlanan belə bir əməliyyatın məqsədi hadisəyə görə məsuliyyəti İranın üzərinə qoymağa və ölkəyə beynəlxalq təzyiqi artırmağa hesablanıb. İranın “Fars” xəbər agentliyi təhlükəsizlik mənbələrinə istinadən iddia edir ki, sözügedən ssenari təyyarələrə və ya hava limanlarına hücumları, həmçinin çox sayda itkini əhatə edir. Nəticədə İsrail beynəlxlaq dəstək qazanaraq, İran üzərinə yenidən hücumlara başlamaq imkanı əldə edəcək. “Fars” agentliyi həmçinin bildirir ki, İran kəşfiyyat xidmətləri artıq iddia edilən əməliyyatın qarşısını almaq üçün çalışır. İran İslam İnqilabı Keşikçiləri Korpusu da İsrailin tezliklə İslam Respublikasına hücum etməyi planlaşdırdığını və buna cavabın sərt olacağını bildirib. İran Ordusunun hərbi sözçüsü Məhəmməd Əkrəmi Niya qeyd edir: “İsrail seçkilərdən əvvəl bizə hücum etmək istəyir, çünki Netanyahu seçkiləri uduzacağı təqdirdə həbsxanaya düşəcəyini bilir. Ölkəyə hücum hazırlıqları təsdiqlənərsə, İsrailə qabaqlayıcı zərbə endirməyə hazırıq. Düşmənlərin açıq məqsədi İslam Respublikasını zəiflətmək və devirməkdir, digər strateji məqsəd isə bölgədə “Böyük İsrail” planlarını irəli sürməkdir. İran xalqı müqaviməti ilə düşmənin məqsədlərinə çatmasının qarşısını uğurla alır”. Israillə yanaşı, İran ABŞ-nin də savaşa aktiv hazırlıq gördüyünü bildirir. Qeyd edilir ki, ABŞ bölgədəki əlverişsiz vəziyyətə görə yenidən İrana hücum edə bilər. İran Milli Neft Şirkətinin baş direktoru Həmid Bord bildirib ki, ölkəsi düşmənin ölkənin neft obyektlərinə hücum planları barədə kəşfiyyat məlumatı alıb. O, mümkün tədbirlərə birbaşa zərbələr, sanksiyalar və ya dəniz blokadasının daxil ola biləcəyini qeyd edib. Öz növbəsində ABŞ və İsrail İran daxilində baş qaldırmaqda olan etirazlardan diqqəti yayındırmaq üçün yenidən Tehranın güc variantına əl atmaq niyyətində olduğunu iddia edir. İsrailin baş naziri Benyamin Netanyahu qeyd edir: “İsrail düşmənlərinin yaxın gələcəkdə ölkəmizə hücum edə biləcəyinə dair məlumata sahibdir. Düşmənlərimizin bir neçə gündən sonra ölkəmizdə keçiriləcək parlament seçkilərdən əvvəl bizə hücum etməyə çalışacağına dair əlamətlər var. Onlara bir mesaj çatdırmaq istəyirəm: bizimlə oyun oynamayın. Uzun qolumuz sizə hər yerdə və istənilən vaxt çatacaq. İsrail əhəmiyyətli uğurlar qazanıb, lakin eyni zamanda geri çəkilmək və ordunun hərəkətləri ilə əldə edilən nailiyyətlərdən imtina etmək üçün ciddi təzyiqlərlə üzləşir. Hadisələrin bu istiqamətdə inkişafına yol vermək niyyətində deyilik”. ABŞ kəşfiyyatı da bildirib ki, Vaşinqton Benyamin Netanyahunun seçkilərdən əvvəl İsrailə qarşı hücumun planlaşdırıla biləcəyi ilə bağlı qiymətləndirməsini bölüşür. Kəşfiyyatın açıqlamasına əsasən, potensial təhlükə həm birbaşa İrandan, həm də Yaxın Şərqdə Tehranla əlaqəli silahlı qruplardan gəlir. Elə bu kontekstdə İsrailin “İsrail Hayom” nəşri yazır ki, Amerikanın yardımı ilə İsrail ordusu münaqişə üçün üç mümkün ssenarini nəzərdən keçirir. Nəşrə danışan yüksək rütbəli zabitin sözlərinə görə, bunlara İranın raket hücumuna genişmiqyaslı cavab, ABŞ tərəfindən dəstəklənən “Aslan nəriltisi 2” kod adlı yeni əməliyyat və İsrail Müdafiə Qüvvələri tərəfindən İranda “Aslan kimi xalq” əməliyyatına bənzər müstəqil hərbu kampaniyanın aparılması daxildir. Bundan əvvəl də İran Silahlı Qüvvələrinin Mərkəzi Qərargahı olan “Hatəm əl-Ənbiya” ABŞ-ın İslam Respublikasına qarşı genişmiqyaslı hücum hazırlıqları ilə bağlı kəşfiyyat məlumatı aldığını bildirmişdi. Qərargah xəbərdarlıq edib ki, yeni hücum olarsa, cavab tədbirləri uzunmüddətli və məhdudiyyətsiz olacaq və Yaxın Şərqdəki Amerika hərbi bazalarına və ABŞ-yə bağlı digər obyektlərə təsir edəcək. Tehran rəsmiləri iddia edirlər ki, ABŞ Avropada keçirilən birgə görüş zamanı bir neçə regional ölkədən yeni hücum həyata keçirmək üçün razılıq alıb. İran region ölkələrinə xəbərdarlıq edib ki, Tehrana qarşı potensial Amerika təcavüzünü dəstəkləsələr, hücumda əlbir hesab edilə bilərlər. Maraqlıdır ki, bu fonda ABŞ Prezidenti Donald Tramp İranda yaxın günlərdə baş verəcək dəyişikliklərdən danışıb: “Tezliklə bir çox şeyin baş verəcəyini görəcəksiniz. Hər şey bu və ya digər şəkildə bitəcək. ABŞ yaxın vaxtlarda İrana zərbələri bərpa edib-etməmək və ya Tehranla razılaşma əldə etmək barədə qərar verəcək. Bəlkə də onları partladacağıq. Bu barədə qərar verməliyik. Ya onları partladacağıq, ya da razılaşma əldə edəcəyik. Lakin vaxt azalır”. Bu arada, İran mümkün yeni hücumlara qarşı ölkə ərazisində yeraltı infrastrukturun tikintisini və gücləndirilməsini sürətləndirib.
Samirə SƏFƏROVA
