Sahil Kərimli: “Bu forum Asiya qitəsində bir sıra mühüm sahələrdə yeni bir mərhələnin əsasını qoyur”
Media və Yayım Şurasının təşkilatçılığı ilə “Qütbləşmiş dünyada media vasitəsilə etimadın qurulması” mövzusunda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Media Forumu keçirildi. Bakıda bu media forumunun keçirilməsi hansı nəticələr verə bilər?
Ekspertlər hesab edir ki, Bakıda keçirilən AQEM Media Forumu media sahəsində beynəlxalq əməkdaşlığın genişlənməsinə və birgə layihələrin reallaşdırılmasına mühüm töhfə verə bilər.
Forumun gözlənilən əsas nəticələrə gəlincə, ekspertlər hesab edir ki, burada təcrübə mübadiləsi əsas amillərdən biridir.
Ekspertlərə görə, AQEM məkanında dürüst, effektiv və çevik kommunikasiyanın qurulması üçün təcrübə mübadiləsi aparılır.
Burada əməkdaşlığın gücləndirilməsi məsələsi də ön plandadır. Belə ki, dövlət qurumları, media subyektləri, jurnalistlər, rəqəmsal platformalar və vətəndaş cəmiyyəti arasında əlaqələr genişlənir.
Yeni texnologiyaların məsuliyyətli tətbiqi və media savadlılığının artırılması sahəsində yeni mexanizmlər formalaşır. Qütbləşmiş dünyada medianın rolu artırılaraq ictimai etimadın gücləndirilməsi istiqamətində ortaq addımlar atılır.
Bakıda keçirilən ilk AQEM Media Forumu Asiya qitəsində media sahəsində əməkdaşlığın gücləndirilməsi və regionda etimad quruculuğu prosesində yeni bir mərhələnin əsasını qoyur. Bu tədbir, qitə miqyasında rəsmi şəxsləri və media rəhbərlərini bir araya gətirən unikal platformaya çevrilib.
Azərbaycanın Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) sədrliyi çərçivəsində təşkil olunan forumun regional etimada açdığı yeni imkanlar bir sıra əsas amillərlə xarakterizə olunur:
"Qütbləşmiş dünyada media vasitəsilə etimadın qurulması" mövzusunu daşıyan forum, qlobal miqyasda qütbləşmənin artdığı bir dövrdə medianın sülh və qarşılıqlı anlaşma üçün bir dialoq vasitəsi kimi rolunu ön plana çıxarıb.
Xüsusilə süni intellektin və sosial şəbəkələrin informasiya məkanına təsirinin artdığı müasir şəraitdə, dürüst, yoxlanılmış və qərəzsiz xəbər istehsalı istiqamətində üzv dövlətlər arasında praktiki təcrübə mübadiləsi aparılıb.
Forumun 15 oktyabr 2026-cı ildə keçiriləcək AQEM Zirvə Görüşü ərəfəsində təşkili, qəbul olunacaq strateji qərarlar və regional təhlükəsizlik formatları üçün mühüm informasiya və etimad zəmini formalaşdırıb.
Türkiyə, Qazaxıstan, Özbəkistan, Pakistan, İordaniya və Kamboca kimi müxtəlif coğrafiyalardan gələn media menecerləri rəqəmsal transformasiya şəraitində birgə layihələrin reallaşdırılması mexanizmlərini müzakirə ediblər.
Azərbaycan Prezidenti İlham Əliyevin forum iştirakçılarına müraciətində qeyd olunduğu kimi, qitənin 90 faizini əhatə edən AQEM çərçivəsində bu cür media təşəbbüsləri qurumun institusional imkanlarını genişləndirir və Asiyada dayanıqlı sülhün təmin olunmasına mühüm töhfə verir.
Politoloq Sahil Kərimli baki-xeber.com-a bildirdi ki, Bakıda uzun illərdir ən müxtəlif mövzularda beynəlxalq tədbirlər keçirilir.
“Bu tədbirlərin yüksək səviyyədə təşkil olunması ölkəmizin beynəlxalq aləmdə müsbət imicini formalaşdırır. Eyni zamanda media forumları da keçirilir. Xatırlayırıq ki, torpaqlarımız işğaldan azad olunandan sonra türk dünyasının mədəniyyət paytaxtı olan tarixi Şuşa şəhərində də ənənəvi olaraq media forumları keçirilir. Bu media formları həmçinin ölkəmizin paytaxtında da təşkil olunur. Sonuncu “Qütbləşmiş dünyada media vasitəsilə etimadın qurulması” mövzusunda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Media Forumu da bu baxımdan çox yüksək qiymətləndirilməlidir. Bu forumun əvəzsiz töhfələri var. İlk növbədə ölkəmizin beynəlxalq aləmdə imicinin möhkəmləndirilməsi, Azərbaycan ənənələrinin, prinsiplərinin dünyaya çatdırılması istiqamətində bu çox mühüm rol oynayır. Bu gün dünyada media sahəsində də çox ciddi problemlər, təhdidqlər var. Saxta xəbərlərin, saxta məlumatların, dezinformasiyaların yayıldığı bir dövrdə yaşayırıq və belə bir zamanda dünya miqyaslı media forumun Bakıda keçirilməsi, mötəbər kürsü kimi Bakıdan dünyaya verilən mesajlar, xüsusi bəyanatlar xüsusi rol oynayır. Ona görə də bu forum Azərbaycanın həyata keçirdiyi uğurlu bir beynəlxalq platforma kimi qeyd edilməlidir. Aydındır ki, dünyada qütbləşmə gedir və belə bir dövrdə mediaya göstərilən etimad, eyni zamanda medianın dünyada gedən proseslərə vermiş olduğu töhfə vurğulanmalıdır.
Bu forum Asiya qitəsində bir sıra mühüm sahələrdə yeni bir mərhələnin əsasını qoyur”.
S.Kərimli vurğuladı ki, Media və Yayım Şurasının təşkilatçılığı ilə “Qütbləşmiş dünyada media vasitəsilə etimadın qurulması” mövzusunda Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) Media Forumunun yüksək səviyyədə keçirilməsi böyük əhəmiyyət daşıyır.
“Hesab edirəm ki, belə bir beynəlxalq forumun Azərbaycanda keçirilməsi çox mühüm əhəmiyyət daşıyır. Biz gələcəkdə də bunun ənənə halını aldığını görəcəyik”-deyə S.Kərimli qeyd etdi.
İradə SARIYEVA
