Arzu Nağıyev: “Azərbaycan artıq öz təhlükəsizliyini, hərbi və iqtisadi potensialını daha da gücləndirməli...”
Prezident İlham Əliyevin Yeni Azərbaycan Partiyasının (YAP) müvafiq iclas və ya çıxışlarındakı bəyanatlarına və Azərbaycanın müasir hərb tarixinə əsasən, ölkənin ərazi bütövlüyü və suverenliyinin tam bərpa edilməsi prosesi məhz bu 3 əsas tarixi mərhələyə bölünür:
1-ci mərhələ (27 sentyabr – 10 noyabr 2020): 44 günlük Vətən Müharibəsi nəticəsində Ermənistan ordusunun darmadağın edilməsi, torpaqlarımızın böyük hissəsinin azad olunması və Ermənistanın kapitulyasiya aktına (10 noyabr bəyanatı) imza atmağa məcbur edilməsi.
2-ci mərhələ (10 noyabr 2020 – 19 sentyabr 2023): Postmüharibə dövründə Qarabağda qalan qanunsuz erməni silahlı birləşmələrinin tamamilə tərksilah edilməsi və suverenliyin tam bərpası üçün həm diplomatik-siyasi (Laçın postunun qurulması və s.), həm də hərbi zəminin (Fərrux, Qisas əməliyyatları) hazırlanması.
3-cü mərhələ (19–20 sentyabr 2023): Cəmi 23 saat davam edən lokal xarakterli antiterror tədbirləri nəticəsində separatçı rejimin çökməsi, Xankəndi, Xocalı və digər ərazilərdə Azərbaycan bayrağının ucaldılması və ölkə ərazisindəki bütün qanunsuz xarici silahlı qüvvələrin təmizlənməsi ilə suverenliyin 100% bərpa olunması.
Bu xronologiya Azərbaycanın strateji hədəflərinə mərhələli və planlı şəkildə necə nail olduğunu göstərən rəsmi dövlət konsepsiyasıdır.
Prezident İlham Əliyevin bəyanatlarına əsasən, təcavüz tarixinin təkrar olmaması və hərbi təxribatların qarşısının alınması üçün Azərbaycan hər gün müharibəyə hazır olmalı, güclü ordu və hərbi potensial formalaşdırmalıdır.
Millət vəkili Arzu Nağıyev baki-xeber.com-a bildirdi ki, Yeni Azərbaycan Partiyasının VIII (səkkizinci) qurultayı Azərbaycanın müasir siyasi tarixində çox mühüm bir vaxtda, mühüm bir mərhələdə keçirilib. “Çünki artıq bu qurultay ərazi bütövlüyümüzün, eyni zamanda suverenliyimizin tam bərpası, bütün Azərbaycan ərazisində Azərbaycan Konstitusiyasının məhz işlədiyi bir dövrə təsadüf edir. Prezident İlham Əliyev də öz çıxışında xüsusi vurğuladı ki, bu qurultay Azərbaycanın ərazi bütövlüyünü və suverenliyini tam bərpa etdiyi yeni reallıq şəraitində keçirilir. Cənab Prezident bunu Azərbaycanın qarşısında duran bir sıra tarixi vəzifələrin həyata keçirilməsinin mühüm nəticəsi kimi qeyd etdi. Əsas məsələ də ondan ibarətdir ki, zəfərin qeyd olunması, bu böyük bir məsələdir. Lakin Prezidentin mesajlarında əsas məqamlar zəfərdən sonrakı mərhələnin mahiyyətinə aydınlıq gətirmək idi. Azərbaycan artıq öz təhlükəsizliyini, hərbi və iqtisadi potensialını daha da gücləndirməli, beynəlxalq mövqelərini möhkəmləndirməli və yeni regional reallıqların milli inkişaf naminə istifadə etməsini məhz qarşıya qoyduğu əsas məsələ kimi qeyd etdi. Burada əsas məqam ondan ibarətdir ki, kimlər isə bizim müdafiə və təhlükəsizlik xərclərinə daha çox diqqət yetirdiyimizlə, onu artırmağmızla bağlı “nə üçün belə oldu” kimi sualları, məsələni gündəmə gətirməyə çalışırlar. Lakin cənab Prezident də öz çıxışında qeyd etdi ki, bu, sülhün bərqərar olması istiqamətində atılan addım və sərhədlərimizdən çox da uzaq olmayan ərazilərdə müharibələrin getməsi fonunda məhz Azərbaycanın daha güclü olması üçün bu addımların atılmasıdır. Cənab Prezident öz çıxışında əsas vəzifələrdən biri kimi hərbi gücün artırılmasını, iqtisadi müstəqilliyin daha da möhkəmləndirilməsini, Qarabağ və Şərqi Zəngəzurun bərpasını, Böyük Qayıdışın davam etdirilməsini və Azərbaycanın tranzit imkanlarının genişləndirilməsini xüsusi vurğuladı. Orta müddətdə ölkə ərazisindən keçən tranzit yük həcminin 30 milyon tona çatdırılması hədəfi Azərbaycanın nəqliyyat, logistika imkanlarının strateji əhəmiyyətini göstərir. Cənab Prezidentin çıxışında ən mühüm mesajlardan da biri “zəfərin əldə edilməsindən sonra qarşıda yeni məsuliyyətli mərhələ dayanır” deməsidir. Bu yanaşma çox mühüm məsələdir. Suverenliyin bərpası son deyil, yeni inkişaf mərhələsinin başlanğıcıdır. Qarabağın, Şərqi Zəngəzurun gücləndirilməsi, güclü ordu, iqtisadi dayanıqlılıq, nəqliyyat və enerji layihələri, insanların öz doğma torpaqlarına qayıdışı. bunlar çox mühüm məsələdir. Eyni zamanda beynəlxalq mövqelərin daha da möhkəmləndirilməsi bu mərhələnin əsas istiqamətindəndir”.
Millət vəkili hesab edir ki, bu baxımdan VIII (səkkizinci) qurultay həm də gələcəyə baxış qurultayı kimi xarakterizə oluna bilər. “Azərbaycanın qarşısında artıq işğal olunmuş ərazilərin azad edilməsi deyil, əldə edilmiş suverenliyin və ərazi bütövlüyünün, dövlət gücünün davamıdır, bu şəkildə möhkəmlənməsidir. Ölkənin regional və beynəlxalq əhəmiyyətinin daha da artırılmasıdır. Cənab Prezidentin çıxışında Azərbaycanın öz imkanlarına arxalanması xətti də çox mühüm əhəmiyyət kəsb edir. Siyasi müstəqillik, iqtisadi müstəqillik, güclü hərbi potensialı, milli imkanların maksimum istifadə edilməsi düşünürəm ki, Ali Baş Komandanın uzunmüddətli inkişaf strategiyasının əsas dayanqları kimi təqdim olunması idi. Yəni VIII (səkkizinci) qurultayının əsas mesajını belə ifadə etsək, Azərbaycan tarixi zəfərlərlə öz suverenliyini təmin etdi. İndi isə həmin zəfərin nəticələrini davamlı inkişaf, təhlükəsizlik və güclü dövlət quruculuğu ilə möhkəmləndirmək mərhələsinə qədəm qoyub. Eyni zamanda cənab Prezident bir sıra dövlətlərə də mesajlar ötürdü ki, biz bu gün müstəqilik, biz bugün öz siyasətimizi suveren və müstəqil şəkildə həyata keçiririk. Balanslı siyasətimizi də qoruyuruq. Bizim üçün kiminsə bizə istiqamət göstərməsi və yaxud bizə “bunu belə et” deməsi bizim üçün əhəmiyyət kəsb etmir. Çünki biz müstəqil dövlətik, biz bu gün çox çətin sınaqlardan keçərək bu günkü nailiyyətə nail olmuşuq. Bir daha qeyd etmək istəyirəm, cənab Prezidentin çıxışında da vurğulanılan əsas məqam ərazi bütövlüyü, suverenliyin qorunması və hər bir Azərbaycan vətəndaşının rifahıdır”-deyə A.Nağıyev qeyd etdi.
İradə SARIYEVA
